Salmos 89
89
Salmo 89
Sukan ni skuiso Su'si ma nuu rey David ma
1Ni‑kani ni‑jika ko kata sa yaa
ja ká'an sukan nda'vi ini ni a, vi Su'si Iya Tátnuni.
Nuu in jichi in jichi ñayii kenda koo‑ka ma,
ndaka'an ndakachi sa nuu i ja maa ni kúu Su'si
iya va'a ini iya kuu jin kukanu ini sa.
2Te kuña'a sa ja ni‑kani ni‑jika koo tnu'u nda'vi ini ni ma
nuu sa a, vi Su'si, te másu na in xtandiyo.
Te onde andivi ma, te ni skuiso ni
ja ndimaa tnu'u ndaa tnu'u ndija kúu ja ká'an ni ma.
3Vaa sa'a ni ka'an ni:
“Tee ni kaji maa sa ja kunukuechi de nuu sa a kúu David ma,
te ni skuiso sa nuu de, te sa'a ni jiña'a sa:
4Ni‑kani ni‑jika sa'a sa ja ne'un sa'ya tata ni a,
te kee in tee ko kuu rey sukan kúu maa ni a”,
kúu ni ká'an ni.
5Ndaka i ja ka iyo i andivi ma,
jin ndaka'an i ndaka milagru sa'a ni ma,
te jin ndachiñu'u ña'a i, vi Su'si.
Te ndaka nuu ka ndatna'a ñayii ma ja jin ndachiñu'u ña'a i ma
chi ndimaa tnu'u ndaa tnu'u ndija ni a jin ndaka'an tna i.
6Vaa másu na in ka iyo andivi ma ja inuu kúu i ji'in maa ni,
vi Su'si Iya Tátnuni.
Vaa ni a in ángel iyo andivi ma, másu kuu sa'a i sukan sa'a ni a.
7Te chukan kúu ja ndaka ñayii ñatuu‑ka na ja u'vi ka sa'a i ma
chi ka yu'u ña'a i maa ni,
vaa maa ni ndakan kuenda nuu i ma, vi Su'si,
te vivii ni ka ndakonduu ña'a ndaka i,
te ka ndachiñu'u ña'a i, vi Su'si.
8Su'si iya tátnuni nuu ndaka ángel ma,
¿na in kuu sa'a sukan sa'a ni a?
Vaa maa in‑ni ni kúu iya kúu sa'a ndaka,
te maa ni chi ndimaa sa'a ni sukan ká'an ni ma, vi Su'si.
9Vaa maa ni kúu iya tátnuni nuu mar ma,
te sa'a ni ja ndúu nañii ndute ma ora îyo kua'an vee nuu de ma.
10Vaa maa ni kúu iya ni xtnakue'e kiti ñunee nuu mar ma
ja nani ti Rahab ma,
te kuenda tnu'u ja ni ji'i ti,
te ji'in tnu'u ndee tnu'u ndatnu ni a
ni jatenuu ni ñayii ñatuu ka kunimani nuu ni ma.
11Vaa kuenda maa ni kúu andivi ma ji'in ñu'ú ya.
Maa ni ni sa'a ni‑ka'nu ñuu ñayivi a.
12Te maa ni ni sa'a ichi ninu ma ichi nuu vee ma,
te chukan kúu ja yuku nani Tabor ma ji'in yuku nani Hermón ma,
kuenda tnu'u ja ka jita i ja ka ndachiñu'u ña'a i maa ni.
13Te nuu nda'a maa ni iyo tnu'u ndee tnu'u ndatnu,
te kúndee ni nawa sa'a ni ma.
14Ndimaa ja va'a ja ndaa sa'a ni nuu núkoo ni ja tátnuni ni ma,
te yoxtnuu tnu'u ndaa tnu'u ndija tnu'u nda'vi ini ma nuu ni
nde kua'an nde vee ni.
15¡Naka vii naka va'a ko kuu ñuu nuu ka iyo ñayii
ka jini i jin ndachiñu'u ña'a i maa ni ma!
Vaa maa ni xtnuu ñu'u nuu kuan koo ve koo i ka kuu i ma.
16Te ja maa ni, te jin koo sii ini ñayii ma nii nduu ma,
te ja sa'a ni ja va'a ja ndaa ma, te jin koo sii ini i.
17Vaa maa ni chindee chituu i,
te jin koo tnu'u ndee tnu'u ndatnu i,
te jin ni'i i jayiñu'u.
Te ja sukan va'a ini ni ma,
te skuta'vi‑ka ña'a ni tnu'u ndee tnu'u ndatnu.
18Vaa maa ni kúu Su'si jasi ndee jasi ndoso
ja ñatuu na ja u'vi kí tna'a ña'a,
te maa ni kúu Rey iya ii ñuu Israel ma.
19Te ni sa'a ni ja ni jininuu ña'a tee jinukuechi nuu ni a,
te sa'a ni jiña'a ni de:
“Ni chindee sa tee iyo tnu'u ndee tnu'u ndatnu ma,
te ni sa'a sa ja iyo jayiñu'u tee ni kaji sa ñuu sa ma.
20Ni ni'i sa David ma ja kunukuechi de nuu sa a,
te ni chiso sa aceite xini de ja ko kuu de tee tatnuni.
21Te ko tnii sa nda'a de ni‑kani ni‑jika,
te kua'a sa de tnu'u ndee tnu'u ndatnu.
22Te ni in ñayii ñatuu kúnimani nuu de ma
másu ke'en su'va ña'a i,
ni a sa'ya ñayii sa'a ja u'vi ma,
masu xtnakue'e i de.
23Su'va sa'a sa ja kuni de ja maa sa xtnakue'e ñayii
ñatuu ka kunimani nuu de ma te ka saxiko i de ma.
24Tnu'u ndaa tnu'u ndija sa ma ji'in tnu'u nda'vi ini sa ma
koo ji'in de,
te ja maa sa, te koo tnu'u ndee tnu'u ndatnu de,
te koo jayiñu'u de.
25Te maa sa sa'a ja kúu tatnuni de onde yu'u mar ma,
onde yute nuu jika kua'a ndute ma.
26Te maa de ndakune'e ña'a,
te sa'a ka'an de: Maa ni kúu yuva sa.
Maa ni kúu Su'si sa.
Maa ni kúu toto nuu kuu kaku sa.
27Te suni sa'a sa ja maa de ko kuu sa'ya sa tee java'a‑ka,
te maa de ko kuu tee tatnuni‑ka
sana ndaka tee ka kuu rey ni‑ka'nu ñuu ñayivi a.
28Te ndimaa ko kunda'vi ini sa de,
te masu ndunaa sa ja ni skuiso sa nuu de ma.
29Te ni‑kani ni‑jika jin koo sa'ya tata de ma ñuu ñayivi a,
te sa'ya tata de ma, jin ko tatnuni i nani iyo‑ka ñuu ñayivi ya.
30Te nú sa'ya tata de ma,
na jin xndoo i tnu'u tátnuni sa a
te ma jin ko sa'a i sukan ká'an tnu'u ndaa tnu'u ndija sa ya,
31te nuna jin sa'a i tna'a ja masu játna ini sa ma
te ma jin kandija i ja tátnuni sa a,
32sani te xndo'o xneni sa i,
vaa ñatuu ka kandija i tnu'u tátnuni sa a,
te jin ndo'o jin neni maa i kuechi ja ni ka sa'a maa i ja u'vi ma.
33Kovaa koo tnu'u nda'vi ini ma nuu i,
te tnu'u ndaa tnu'u ndija ni ka'an sa ma másu ndaxsama sa.
34Te másu ndunaa sa tnu'u ni skuiso sa ma,
te ni masu kasi yu'u sa tnu'u ni ka'an sa ma.
35Vaa Su'si iya ii kúu sa,
te in jichi‑ni ni skuiso sa nuu David ma,
te masu xnda'vi sa de.
36Vaa sa'ya tata de ma chi ni‑kani ni‑jika jin koo i nuu sa ya,
te jin ko tatnuni i nani iyo‑ka kandii ma.
37Te sukan iyo yoo ma ja masu na in skanda ña'a ma
te xtnuu i ñuu ñayivi a,
te sukan jin ko kuu sa'ya tata maa ni ni‑kani ni‑jika, vi David.”
Sa'a ni jiña'a ni nuu David ma, vi Su'si.
38Kovaa maa ni chi ni xtandiyo ni tee ni kaji maa ni ma,
te ni saxiko ni de, vaa ni ndakiti ini ni nuu de.
39Te ñatuu sa'a‑ka ni sukan ni skuiso ni nuu de ma,
ja kúu de tee jinukuechi nuu ni a,
vaa ni sa'a ni ja ni tna'a de ja kan‑nuu,
ja ni skana ni corona de ma onde nuu ñu'ú a.
40Te ni ndi'i yika ve'e ma ni ndakana ni,
te ni xnaa ni ndaka ja ndesi ini ñuu ma.
41Te ndaka ñayii ka ya'a ichi ma,
ka kene'e i nawa iyo ma, te ka ndake'en i,
te ñayii ka iyo yatni ma, ka jakundee ña'a i.
42Te ni sa'a ni ja ni ka ndusii ini
ñayii ñatuu ka kunimani nuu ñayii ñuu ni ma,
kuechi ja ni ka kundee i ma.
43Te ni sa'a ni ja ni ka nukoo nuu yuchi kúu espada
ka yinda'a ñayii ñuu ni ma ja ka kanaa i ma,
te ñatuu ni chindee ni i ja jin kundee i ma.
44Te ni sa'a ni ja ni ka naa jayiñu'u i ma,
te nuu ka nukoo tee ka tatnuni ma
ni skana ni onde nuu ñu'ú a.
45Te ni ndaka'nde‑ka ni kivi koo tnu'u ndee tnu'u ndatnu
tee ni kaji maa ni ma,
te nanimaa ja kan‑nuu tna'a de.
46¿Na saa‑ka kivi jin ndo'o jin neni sa?
¿Te na saa‑ka kivi chu'u ni ja ma jin kuni ña'a sa?
¿Te ûni ndákiti xeen ini ni nuu sa,
te sa'a ña'a ni sukan sa'a ñu'u i'ni ma?
47Su'si Iya Tátnuni, ndaka'án ni ja masu kua'a‑ni kivi
koo sa ñuu ñayivi a,
vaa ñayii ni sa'a ni ji'in nda'a maa ni a
chi masu kua'a‑ni kivi téku i.
48Vaa ñayii iyo ñuu ñayivi a chi kenda in kivi ja kûu i,
te ñatuu ni‑in ñayivi ja koo i ni‑kani ni‑jika ñuu ñayivi ya'a.
49Iya Tátnuni, ¿ndenu iyo tnu'u nda'vi ini ni ka'an ni
onde xi'na‑ka ma nuu tee kúu David ma
ja ja ndaa ja sukan ko kuu ma?
50Iya Tátnuni, ndaka'án ni sukan ka ndo'o ka neni
tee ka jinukuechi nuu ni a,
vaa kua'a ñuu ka iyo yatni ji'in sa ma,
te ka jakundee ña'a ñayii yukan,
te ndaka sukan ka sa'a ndeva'a ña'a ñayii ma ñu'u ini sa.
51Vaa ñayii ñatuu ka kunimani nuu ni ma, vi Su'si,
ni ka sa'a i ja ni ndatna'a tee ni kaji maa ni ma ja kan‑nuu,
te sukan, te ka jasi ndee i ichi kua'an de ma.
52Na koo jayiñu'u Iya Tátnuni ma ni‑kani ni‑jika,
te sukan kó kuu.
Currently Selected:
Salmos 89: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
