Salmos 85
85
Salmo 85
Sukan kakan‑ta'vi o nuu Su'si ma ja na kunda'vi ini ña'a ya
1Iya Tátnuni, va'a xeen ini ni,
te vivii ni sa'a ni ja kuu ñuu ni a,
vaa ni ndene'e ni sa'ya tata Jacob ma
nuu ni ka yo ndo'o, ni ka yo neni i ma.
2Te ni sakanu ini ni ndaka ja u'vi ni ka yo sa'a, ni ka yo kuu i ma,
te ni xnaa ni ndaka kuechi ka ndiso i ma.
3Te ni ndukuee ini ni, te ni ndiko ini ni
ja ni ndakiti ini ni nuu i ma nkuu.
4Ndasava'a ña'a ni, sukan ni ka yo iyo sa
onde xi'na‑ka ma, vi Su'si iya sa'a ja jin kaku sa,
te ndunaa ni ndaka sukan ni ndakiti ini ni nuu sa
ja ka kuu sa ñuu ni ma.
5¿Xi sukan‑ni ko ndakiti ini ni nuu ndaka sa ni‑kani ni‑jika?
¿Te ndakiti tna ini ni nuu ndaka‑ka sa'ya tata sa ki koo‑ka ma?
6¿Te ma sa'a ni ja jin koteku sa te jin ko sii ini sa
ja ka kuu sa ñayii ñuu ni a?
7Su'si Iya Tátnuni, kaxtnu'u ni sukan nda'vi ini ni a,
te chindee ña'a ni ja jin kaku sa nuu ja u'vi ma.
8Koniniso'o sa naxe ka'an Su'si Iya Tátnuni ma,
te ja ká'an ya kúu ja jin koo va'a ñayii ka kuu i ñuu ya ma
ja ka kuu i ñayii ñatuu‑ka na ja u'vi ka sa'a i ma,
sukan‑va'a máko jin ndakokuiñi i
ja jin ndasa'a neé jin ndasa'a uun‑ka i.
9Ja ndaa ndija kúu ja nde o yu'u Su'si ma
chi iyo yatni ya ja sa'a ya ja kaku o nuu ja u'vi ma,
sukan‑va'a koo jayiñu'u ya ñuu nuu ka iyo o ya.
10Tnu'u nda'vi ini ma ji'in tnu'u ndaa ma, ni ka ndatna'a i.
Tnu'u va'a tnu'u ndaa ma ji'in tnu'u kuee ma,
ni ka ketna'a ini i.
11Tnu'u ndaa tnu'u ndija ma ni kenda ni‑ka'nu ñuu ñayivi a,
te Su'si iya sa'a ja va'a ja ndaa ma,
onde andivi ma nde'ya ña'a ya.
12Te Iya Tátnuni ma sa'a ja jin nduva'a ñu'ú o a,
te jin kuu nawa jin saka o ma.
13Te tnu'u va'a tnu'u ndaa ya ma koxtnuu nuu ya ma
kii i nuu ka iyo o ya, te jin kondikin o,
te sukan, te jin kuni o ichi jin kaka o ma.
Currently Selected:
Salmos 85: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
