Salmos 86
86
Salmo 86
Sukan kakan‑ta'vi o nuu Su'si ma ja ndimaa na kunda'vi ini ña'a ya
1Su'si Iya Tátnuni, koniniso'o ñukuun ni ja ká'an sa nuu maa ni a,
vaa kúnda'vi kúkee sa, te ndó'o néni sa.
2Koto va'a ni ini anua sa ya, vaa sa'a sa sukan játna ini maa ni a.
Sa'a ni ja saña ja kúu sa tee jinukuechi nuu maa ni a,
te na kaku sa nuu ja u'vi ma,
vaa kúkanu ini ña'a sa, vi Su'si maa sa.
3Te kunda'vi ini ña'a ni, vi Iya Tátnuni,
vaa nii nduu jikan‑ta'vi sa nuu ni a.
4Saña ja kúu sa tee jinukuechi nuu ni a,
sa'a ni ja na koo sii ini ini anua sa ya,
vaa nuu maa ni ndónenuu sa
ja kúkanu ini ña'a sa, vi Su'si Iya Tátnuni.
5Vaa maa ni chi iya va'a ini kúu ni,
vaa sákanu ini ni na kuechi ñayii ma,
te ka'nu xeen ini ni,
te kúnda'vi ini xeen ni ndaka ñayii ka ndakune'e ña'a ma.
6Su'si Iya Tátnuni, koniniso'o ni ja jikan‑ta'vi sa ya,
te katanuu ni ndaka ja ká'an káchi sa nuu ni a.
7Te kivi ndó'o néni sa ma, te ndakune'e ña'a sa,
te maa ni chi ndakone'e ni ja kakan‑ta'vi sa ma.
8Saa vi, Su'si Iya Tátnuni, ka iyo ja ka kuu su'si ñayii ma,
kovaa ni‑in i másu kúu sukan kúu maa ni, vi Su'si,
te ni‑in i másu kúu sa'a ndaka sukan sa'a maa ni a.
9Te ndaka ñayii ndaka ñuu ka iyo ñuu ñayivi a
chi ki koo i nuu iyo maa ni a, vaa maa ni ni sa'a ndaka ñayii ma,
te vivii jin ndachiñu'u ña'a i maa ni, vi Su'si.
10Vaa maa ni kúu iya iyo tnu'u ndee tnu'u ndatnu,
te sa'a ni milagru, te maa in‑ni ni kúu Su'si ndija.
11Su'si maa sa, Iya Tátnuni, kaxtnu'u ni ichi maa ni a,
te ko kaka ndaa sa sukan kúni maa ni a.
Te sa'a ni ja jaku'ni ndaa ini sa te koyu'u ña'a sa.
12Te ni‑yu'u ni‑ini sa kata sa nuu maa in‑ni ni, vi Su'si maa sa,
te ndataa sa jayiñu'u nuu maa ni a, ni‑kani ni‑jika.
13Vaa maa ni, kúnda'vi ini xen‑xeen ña'a ni,
te ni sa'a ni ja ni kaku anua sa ya nuu andeya ma.
14Saa vi, Su'si, jini maa ni ja ñayii inundee ini ma
chi ni ka ndatnu'u tna'a i ja jin sa'a ndeva'a ña'a i,
te ka nduku ña'a i ja jin ka'ni ña'a i saña,
te másu ka ndasa'a i kuenda i ja iyo ni
ja kúu ni Su'si iya ndakan kuenda.
15Kovaa maa ni, vi Su'si Iya Tátnuni chi nda'vi xeen ini ni,
te kuee ini ni, vaa masu ndákiti yachi ini ni,
vaa kútoo xeen ña'a ni, te ndija te ndaa ni ja ká'an ni ma.
16Konde'ya ña'a ni, te kunda'vi ini ña'a ni
saña ja kúu sa tee jinukuechi nuu ni a,
te taa ni tnu'u ndee tnu'u ndatnu, te koto va'a ña'a ni
ja kúu sa sa'ya ña'a jinukuechi nuu ni a.
17Sa'a ni ja na jin kuni ñayii ñatuu ka kunimani nuu sa ma
ja kútoo ña'a ni,
sukan‑va'a jín ndakukan‑nuu maa i,
vaa maa ni kúu Iya Tátnuni,
te maa ni ni chindee ña'a,
te ni ndataa ni tnu'u kanu ini, vi Su'si.
Currently Selected:
Salmos 86: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
