Salmos 75
75
Salmo 75
Su'si ma kúu iya ja'nde ndaa tniñu ñayii ma
1Su'si, ka ndakuan‑ta'vi xeen sa nuu ni,
vaa iyo yatni ni nuu ka iyo sa ya,
te ndaka ñayii ma ka ndaka'an
ndaka ja vii ja va'a sa'a ni ma.
2Te sa'a ka'an Su'si ma:
“Maa sa na'a na kivi,
te ndakan sa kuenda nuu ndi‑in ndi‑in ñayii ma,
te jin ndundaa nawa ni ka yo sa'a, ni ka yo kuu i ma.
3Te maa sa sa'a ja ñatuu ka kotuu
ja ka yituu ñuu ñayivi a ora tnáa xeen ma.
4Te ni jiña'a sa nuu ñayii inuso'o xeen ka ndaa ma:
Máko jin ko sa'a ni ja u'vi ma,
te máko jin ko kani ini ni ja maa ni ka kuu‑ka ma,
te máko jin ko kuvixi jin ko kusu'va ni.
5Te masu kuu‑ni‑nka ja ka neva'a ni
tnu'u ndee tnu'u ndatnu ja jin tatnuni ni ma
te jin ko kuvixi maa ni
te jin ko ka'an ni ja masu na in‑ka ko tatnuni nuu ni ma”,
kúu ya ká'an ya.
6Jín kona'a o ja ni‑in ñayii vee ichi nuu kána kandii ma,
xi ñayii vee ichi nuu kée kandii ma,
xi ñayii iyo nuu ñatuu kuiti nawa iyo ma,
ko kuu ñayii sa'a ja jin ndani'i o jayiñu'u ma, chi ña'a.
7Su'va jín kona'a o ja maa in‑ni Su'si ma kúu iya sa'a ndaa
naxe jin ndani'i jin ndatna'a ñayii ma.
Te maa ya sa'a ja ñayii ka sa'a ja u'vi ma,
jin ndatna'a i ja kan‑nuu te jin skenaa i maa i.
Te ñayii ka sa'a ja va'a ma,
sa'a ya ja jin ndani'i i jayiñu'u
te jin nduu i ñayii ka ndanuu nuu ya ma.
8Vaa Iya Tátnuni ma, jâ yinda'a tu'va ya ndaka ja u'vi
jin ndo'o jin neni ndaka ñayii ñatuu ka kandija
ja ká'an ya ma te ndimaa ja u'vi ka sa'a i ma.
Te kivi kenda ja xndo'o xneni ya ndaka ñayii
ka iyo ni‑ka'nu ñuu ñayivi a
ja ñatuu ka sa'a i sukan játna ini ya ma,
te jin ndo'o jin neni maa i ndaka sukan ni jani ini ya ma.
9Kovaa saña chi ni‑kani ni‑jika ndaka'an ndakachi sa
sukan sa'a sukan kúu Su'si ma,
te kata sa, te ndachiñu'u sa Su'si Jacob ma.
10Sa'a ká'an maa Su'si o a:
“Sa'a sa ja maa ñayii ka jani ini ja maa i ka kuu‑ka ma,
jin ndatna'a i ja kan‑nuu te jin skenaa i maa i,
kovaa sa'a sa ja koo‑ka tnu'u ndee tnu'u ndatnu
ñayii sa'a ja va'a ja ndaa ma,
te koo jayiñu'u i”,
kúu ya ká'an ya.
Currently Selected:
Salmos 75: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
