Salmos 60
60
Salmo 60
Sukan kukanu ini o nuu Su'si ma ja maa in‑ni ya chindee ña'a te kaku o nuu ñayii kúni ja sa‑u'vi ña'a i ma
1Su'si maa sa, ni ndakiti ini ni nuu sa, te ni skendoo ña'a ni,
te ni xndo'o, ni xneni ña'a ni nkuu.
Kovaa vitna, ne'e ni, te ndachindee ña'a ni.
2Ni sa'a ni ja ni tnaa nuu ñu'ú ya, te ni ndata.
Ndakasi ni nuu ni ka ndata ma, sukan‑va'a máko jin kekaa‑ka.
3Ni sa'a ni ja ñayii ñuu ni a,
ni ka jini i kua'a xeen tnundo'o tnuneni
kuenda tnu'u ja ni sa'a ni ja ni ka ji'i sa
ndute nde'ya uva masu va'a ma,
ja ni sa'a ja ka kuneé ka ku‑uun‑nka sa ya.
4Kovaa ñayii ka yu'u ja ndakan ni kuenda nuu i ma
chi ni‑in ja u'vi ka sa'a i.
Te ni wa'a ni in sa'ma, te ka ndone'e sukun i,
ja kuni ka'an ja iyo ni ji'in i.
5Skuili ni nda'a kua'a ni a, te sa'a ni ja jin kaku sa,
vaa kútoo ña'a ni, vi Su'si.
Te niniso'o ni ja ka ka'an sa ya.
6Onde nuu iyo ni a, vi Su'si, te sa'a ká'an ni:
“Saña chi ndusii ini xeen sa,
te ndaka'nde sa ñuu Siquem ma,
te chikua'a va'a sa ndu'va Sucot ma.
7Vaa kuenda maa sa kúu ñuu Galaad ma ji'in ñuu Manasés ma.
Te Efraín ma kúu ja ñu'u xini sa a ja ndesi i,
te Judá ma kúu bastón yinda'a sa ja tátnuni sa ya.
8Te Moab ma kúu nuu ñu'u ndute ndanda'a sa,
te siki Edom ma kúu nuu sónee sa ja yi'i ja'a sa ya,
te ûni káyu'u sa ja ni ndusii ini sa
ja ni kundee sa nuu ñayii ñuu Filistea ma”,
kúu ni ká'an ni.
9¿Na in ki'in jin xsia'a ña'a i ñuu nuu ndesi va'a ma?
¿Te na in jin xsia'a ña'a onde ñuu Edom ma?
10Te kuiti maa ni, vi Su'si, vaa masu na in‑ka.
Visi ni xndoo ña'a ni ma, te ñatuu ni yo kenda ni
ja chindee ña'a ni nuu ni ka yo kanaa sa
ji'in in‑ka ñuu ma,
11kovaa vitna, te ndachindee ña'a ni ja na jin kaku sa
nuu ñayii ñatuu ka kunimani nuu sa ma.
Vaa ja ka chindee ña'a ñayii ma
chi masu nde chíndee xeen ña'a i.
12Kovaa nú maa ni na chindee ña'a, vi Su'si,
chi kua'a xen‑xeen ja kuu jin sa'a sa,
vaa maa ni kueñu ndoso ñayii ñatuu ka kunimani nuu sa ma,
te jin kundee sa.
Currently Selected:
Salmos 60: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
