Salmos 58
58
Salmo 58
Maa Su'si ma ndakan ndaa kuenda nuu ñayii ka sa'a ja u'vi ma
1Ndijin ja ka kuu ni ñayii ka tatnuni ñuu ñayivi a,
¿ka sa'a ndaa ka sa'a ndija ni ja jin kuu ñayii ma?
¿Ka ja'nde ndandaa ni tniñu ñayii ma?
2Ñatuu chi su'va ka ndaa ka ndivi ini ni
na ja u'vi jin sa'a ni ñayii ma.
Nuu nda'a ni a chi ndimaa ja u'vi ka ñu'u,
te ndimaa ja u'vi ka sa'a ni ñayii ñuu ma.
3Ndaka ñayii ka sa'a ja u'vi ma
chi onde nuu ka ñunee‑ka i chii si'i i ma,
te jâ ni ka jakona'a ja ñayii jin ko sa'a ja u'vi jin ko kuu i.
Te visi ñatuu jin kâku‑ka i ma,
te jâ ve koo maa i ja ñayii tnu'u jin ko kuu i.
4Te ka kuu i sukan kúu koo kiti ndiso venenu ti ma,
te ka jasi ti so'o ti ja ma jin koniniso'o ti.
Te sukan kuiti ka sa'a i.
5Vaa sukan ka sa'a ti ja ma jin koniniso'o ti
ja tátnuni tee tasi kasiki ji'in ti ma,
visi jini xeen maa de, jani ini de ma.
6Te ja sukan ka sa'a so'o i ma, vi Su'si,
te ta'vi ndi'i ni nu'u i ma,
ja ka kuu i sukan ka kuu ndika'a lilikin ma.
7Te jín naa maa i kuenda kúu ndute ma,
ja jika de kua'an de ma, sani te ni yichi de ma.
Te ora ka satu'va i ja jin ka'ni ña'a i saña ma,
na jín kukuechi jín kulikin maa kuji i ma.
8Te jín ya'a maa i jín koo i sukan kúu koo xtuyavi ma,
ja kua'an ti, sani te naa ti ma,
xi sukan kúu in lulu ja jâ ni ji'i i ni kâku i ma,
te ni masu nde ni jini i kandii ma.
9Te sanaa sanaa‑ni, te jín kayu jín koko i, sukan káyu tnu iñu ma,
te sukan sa'a tachi yi'i ma ja ñú'u kua'an ñú'u vee i
yutnu táva i ma,
sukan na jin ndo'o tna ñayii ka sa'a so'o ma.
10Te ñayii sa'a ja va'a ja ndaa ma chi ndusii ini xeen i ja kuni i
ja sukan ni ka ndani'i, ni ka ndatna'a
maa ñayii ka sa'a ja u'vi ma.
Te ûni jin chunee i ja'a i ma nuu ni jati niñi ñayii inuso'o ma.
11Sani te jin ka'an i:
“Ja ndaa ndija kúu ja iyo Su'si iya sa'a ndaa sa'a ndija ma,
te ndákan ya kuenda nuu ndaka ñayii ñuu ñayivi ya.
Te ja ndaa kúu ja ndaka ñayii ka sa'a ja va'a ja ndaa ma
chi masu nawa jin skenaa kuiti i
chi iyo ja vii ja va'a ja jin kuta'vi i.”
Sa'a jin ka'an i.
Currently Selected:
Salmos 58: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
