Salmos 57
57
Salmo 57
Sukan kakan‑ta'vi o nuu Su'si ma ja na chindee ña'a ya ja na kaku o nuu ñayii ka sondikin ña'a ma
1Su'si maa sa, kunda'vi ini xeen ña'a ni saña,
vaa ni‑yu'u ni‑ini sa kúkanu ini ña'a sa,
vaa kúkanu ini ña'a sa ja maa ni kasi ña'a te kaku sa,
sukan ka kuu chili ma chii ndijin si'i ti ma
onde ndi'i kuiti tnundo'o tnuneni ma jin ya'a.
2Ni‑yu'u ni‑ini sa kakan‑ta'vi sa nuu Su'si
iya iyo onde sukun ma,
vaa suu ya kúu iya chíndee ña'a.
3Vaa onde andivi ma iyo ya,
te sa'a ya ja kaku sa nuu ñayii ka saxiko ña'a
te ka sondikin ña'a i ma.
Vaa maa Su'si ma chi kútoo ña'a ya,
te kúnda'vi ini xeen ña'a ya,
te jini ndaa jini ndija ya nawa sa'a sa.
4Vaa kuenda tnu'u ja ne'un ndika'a ma iyo sa,
vaa ni ka ndakonduu ña'a ñayii a.
Te kuenda tnu'u ja ñu'u i'ni ka kuu tnu'u ka ka'an i ma,
te kuenda tnu'u ja lanza xi flecha ka kuu nu'u i ma,
te yaa i ma kuenda tnu'u ja yuchi nduva nduva nuu i ma kúu.
5Kovaa maa ni, vi Su'si, ni‑ka'nu andivi a na koo jayiñu'u ni,
te ni‑ka'nu ñuu ñayivi a na jin ndachiñu'u ña'a i,
vi Su'si Iya Tátnuni.
6Te ni ka skuili i yo'o ichi kua'an sa ma,
ja ni ka jani ini i ja jin ke'en‑su'va ña'a i,
te ni kuxii xeen ini anua sa ya.
Te ni ka jate i yavi ichi kua'an sa ma
xi ma kêe sa nkuu, ka kuni i.
Kovaa maa i ni ka ndê koo ini yavi ni ka sa'a i ma.
7Saña chi iyo tu'va ini anua sa ya, vi Su'si.
Iyo tu'va sa ja kata sa te ndachiñu'u ña'a sa.
8Ora ndákoo sa xtnee ne'e ma te tee sa guitarra sa ma
ji'in arpa sa ma.
Te ni‑yu'u ni‑ini sa ndachiñu'u ña'a sa, vi Su'si.
9Visi onde ne'un ñayii ñuu ñayivi ya iyo sa ya,
kovaa saña chi kata sa nuu ni a,
te ndachiñu'u ña'a sa, vi Su'si Iya Tátnuni.
10Vaa tnu'u nda'vi ini ni a chi ka'nu xen‑xeen
sukan ka'nu andivi a,
te tnu'u ndaa tnu'u ndija ni a sukan tna ka'nu.
11Vaa maa ni, vi Su'si, ni‑ka'nu andivi a na koo jayiñu'u ni,
te ni‑ka'nu ñuu ñayivi a na jin ndachiñu'u ña'a i,
vi Su'si Iya Tátnuni.
Currently Selected:
Salmos 57: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
