Salmos 50
50
Salmo 50
Su'si ma kúu iya ndakan ndaa kuenda nuu ñayii ñuu ñayivi a
1Su'si Iya Tátnuni ma kúu Su'si ndija
sana ndeva'a‑ni ja ka xnani i su'si i ma.
Suu ya kúu iya ni ka'an ni‑ka'nu ñuu ñayivi a.
Onde ichi nuu kana kandii ma, onde ichi nuu kee kandii ma,
ni ndakana ya ñayii ma ja jin ndututu i.
2Onde ñuu Sion ma ñuu nuu vivii kaa ma
xtnuu Su'si ma ñu'u ya ma.
3Kii Su'si o ma, te masu na'ñi na'ñi‑ni kii ya
chi koxtnuu ñu'u i'ni ma kii, te ki'i xen‑xeen tachi ma,
te xnaa ñu'u i'ni ma ja iyo ni‑ka'nu ñuu ñayivi a,
te îyo xen‑xeen ko kuu.
4Te ndaxtutu ya ndaka ja ka iyo andivi ma,
ji'in ndaka ja ka iyo nuu ñu'ú ya,
sukan‑va'a jin kuni i naxe ndakan ya kuenda
nuu ñayii kúu ñuu ya ma.
5Te sa'a tatnuni Su'si ma nuu i ma:
“Jin ndaxtutu ndaka ñayii ni ka ketna'a ini ji'in ri ma
ja ñatuu ni ka yo sa'a‑ka i ja u'vi ma
te ni ka yo ja'mi i kiti nuu ri ma,
te ni ka skuiso i ja jin ko sa'a i sukan kúni ri ma”,
kúu ya jiña'a ya.
6Te andivi ma chi sa'a jin ndaka'an i:
“Su'si o a chi iya ndákan ndaa kuenda kúu ya
te ndandaa‑ni ja'nde ya tniñu ñayii ma”,
jin ndaka'an i.
7Kovaa ká'an ya:
“Ñuu maa sa, jin koniniso'o ni ja ká'an sa a.
Ndijin ja ka kuu ni ñuu Israel a, jin koniniso'o ni,
te ndáka'an ndákachi sa ja jin kuu maa ni.
Maa sa kúu Su'si ni, te jin kukanu ini ña'a ni.
8Te ni masu ndakiti ini sa nuu ni
kuechi ja ndimaa ka ja'mi ni kiti a nuu sa a,
kovaa masu ka ndasa'a ni kuenda.
9Vaa masu nde jiniñu'u sa xndiki jaa ka iyo ve'e ni a,
xi ndixi'yu ka neva'a ni a ja jin ndataa ni ti.
10Vaa kuenda maa sa ka kuu ndaka kiti
ka iyo ni‑ka'nu yuku ma.
11Te jini sa ndaka lasaa ka ndava onde yuku ma,
ji'in ndaka kiti ka iyo nuu ñu'ú a,
vaa kuenda maa sa ka kuu ndaka ti.
12Nute kokon sa chi masu nuu ni kakan sa,
chi vaa kuenda maa sa kúu ni‑ka'nu ñuu ñayivi a,
ji'in ndaka ja ka iyo a.
13¿Xi ka jani ini ni ja kuñu xndiki ma jaa sa,
xi ko'o sa niñi ndixi'yu ma ja ka ndataa ni ma?
Ña'a.
14Su'va ja jin ndataa ni nuu sa ma kúu
ja jin ndaka'an jin ndakachi ni sukan sa'a sukan kúu sa ma,
te jin ndachiñu'u ña'a ni ja kúu sa Su'si iya iyo onde sukun ma,
te jin sa'a ni sukan ni ka skuiso ni ja jin sa'a ni nuu sa ma.
15Te jin ndakune'e ña'a ni
kivi kénda tnundo'o tnuneni nuu ni ma
te ñatuu ka ni'i ini‑ka ni nawa jin sa'a ni ma,
te saña chi chindee ña'a sa ja vivii jin yanduu jin yandoso ni
nuu tnundo'o yukan ma,
sani te maa ni chi jin ndachiñu'u ña'a ni”,
kúu ya ká'an ya.
16Kovaa ñayii sa'a ja u'vi ma chi kuña'a Su'si ma:
“¿Nava'a ndáka'an ni ja jini ni tnu'u ni tatnuni sa ma,
te ndáka'an ni sukan ni skuiso sa ma,
kovaa maa ni chi ni masu sa'a ni sukan tátnuni sa ma?
17Vaa ndijin chi su'va ndákiti ini ni
nuu ñayii ndáka'an‑so'o nuu ni
sukan kúni sa ja ko kuu ni ma,
te ja sukan sa'a ni a chi saxiko ni tnu'u tátnuni sa a.
18Te nú jini ni ñayii sakui'na ma
chi jinu ni kua'an ni sakui'na ni ji'in i,
te suni kétna'a ini ni ji'in ñayii
ka kivi nduu ji'in in‑ka ñayii masu ni tnanda'a ji'in i ma.
19Vaa játna ini xeen ni ja ka'an ni tnu'u ndeva'a ma,
te yaa ni a, vivii jakin tna'a i tnu'u xnda'vi tna'a ma.
20Ndimaa jínkoo ñukuun ni, te ká'an ni tnu'u ñani ni ma,
te ndimaa ká'an u'vi ni ja kuu sa'ya si'i ni ma.
21Ndaka cha'a ni yo sa'a ni, te saña chi ni jasiyu'u sa.
Te jani ini ni ja saña, te kúu sa sukan kúu ni a.
Ña'a.
Vaa saña chi sa'a sa ja ndakuni ni ndaka ja u'vi
ni yo sa'a ni yo kuu ni ma.
22’Te vitna, te jin jaku'ni ini ni tnu'u ká'an sa ya,
ndaka ni nde ni ka ndunaa ña'a ja saña kúu Su'si ni ma,
nasa yukan, te sakuechi salikin ña'a sa,
te masu na in tasa'an ña'a ja jin kaku ni.
23Chukan kúu ja nú na in jita nuu sa ma te ndáchiñu'u ña'a i,
te suni ndákani ndáka'vi ini i
te jika ndaa i ichi ni kaxtnu'u sa ma
te ñatuu na ja u'vi sa'a‑ka i,
chi sa'a sa ja kaku i nuu ja u'vi ma.”
Sa'a ká'an Su'si ma.
Currently Selected:
Salmos 50: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
