Salmos 51
51
Salmo 51
Sukan kakan‑ta'vi o nuu Su'si ma ja na sakanu ini ña'a ya te ndasavii ndasandoo ña'a ya
1Ja kútoo ña'a maa ni, vi Su'si, te kunda'vi ini ña'a ni.
Sukan va'a xeen ini ni a, te xnaa ni ndaka kuechi sa a.
2Ndakate ni ndaka ja u'vi ni yo sa'a sa ma,
te ndasavii ña'a ni,
sukan‑va'a máko kondiso kuechi‑ka sa nuu ni a,
3chi ndakunitnuni sa ja so'o xeen ni kaa sa nuu ni,
te ndaka ja u'vi ni yo sa'a sa ma ñatuu kúu ndunaa sa.
4Nuu maa ni, ndiso kuechi sa.
Nuu maa in‑ni ni, ni yo sa'a sa ja u'vi ma,
ja ñatuu játna ini ni ma.
Chukan kúu ja ñayii ma, na jin ndakuni ña'a i maa ni, vi Su'si,
vaa ja ndaa kúu tnu'u ká'an ni a,
te ñatuu na in ndaka'an ja masu ja'nde ndaa ni tniñu ñayii ma.
5Ja u'vi kúu sa, nuu ni ñunee sa chii si'i sa ma,
te jâ ndiso kuechi sa nuu ni kâku sa ma.
6Ja ndaa kúu ja kútoo ni ñayii in‑ni ja jani ini i ma,
te onde ini anua sa ma ni kaxtnu'u ni tnu'u ndichi ma.
7Ndasavii ndasandoo ña'a ni sukan kúni maa ni, te nduvii sa.
Ndakate ña'a ni, te ndukuijin kuijin sa
sukan kaa yu'va kúun ora vijin xeen ma.
8Sa'a ni ja kuniso'o sa tnu'u sii ini,
te ndúsii ini onde yiki sa a, ja ni xndo'o ni xneni ni a.
9Máko konde'ya‑ka ni kuechi sa ma,
te xnaa ni ndaka ja u'vi ni yo sa'a sa ma.
10Su'si maa sa, ndasandoo ni ini anua sa a,
te ndachunee ni ini sa a in anua jaa ja sa'a ja va'a ja ndaa ma.
11Máko xtandiyo ña'a ni nuu iyo ni a,
te máko ndene'e ni Xtumani maa ni a ini anua sa a.
12Sa'a ni ja na ndusii ini sa,
sukan ni ndusii ini sa kivi ni ndani'i ña'a ni ma.
Te ndachunee ni ini sa a in anua ja sa'a
sukan játna ini maa ni a,
te chindee chituu ña'a i,
13sukan‑va'a kaxtnu'u sa ichi ni a nuu ñayii inuso'o ma,
te ñayii ka ndiso kuechi ma, jin ndakokuiñi i nuu ni.
14Su'si maa sa, sa'a ni ja kaku sa nuu ñayii ka ja'ni tna'a ma,
te kata sa, te kaxtnu'u sa ja Su'si va'a ini kúu ni.
15Iya Tátnuni, ndakune ni yu'u sa a,
te kata sa, te kaxtnu'u sa sukan va'a ini ni a.
16Vaa ñatuu kúni ni ja ndataa sa in kiti nuu ni,
te ñatuu játna ini ni ja ka'mi ndi'i sa ti nuu ni.
17Su'va ja kúni ni kúu in ñayii ndákunitnuni i
ja jiniñu'u ña'a i, vi Su'si.
Vaa maa ni, vi Su'si, masu saxiko ni
in anua nda'vi ni ndo'o ni neni ma.
18Sa'a va'a ni yuku nani Sion ma,
sukan va'a sukan vii ini maa ni a.
Te ndakani va'a ni yika ve'e
ni ndakonduu ndesi ñuu Jerusalén ma.
19Sani te jatna ini ni ja va'a jin ndataa i ma,
ji'in ndaka kiti jin ndaka'mi i nuu ni ma.
Sani te jin ka'mi i xndiki siki nuu altar ni ma, vi Su'si.
Currently Selected:
Salmos 51: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
