Salmos 49
49
Salmo 49
Masu va'a ja ndiyo ini o ja koneva'a kua'a o xu'un ma
1Ndaka ni ja ka iyo ni ni‑ka'nu ñuu ñayivi a,
jin koniniso'o ni ja ka'an sa ya.
2Ka kuu ni ñayii ka netniñu, ka kuu ni ñayii ñatuu ka netniñu,
ka kuu ni ñayii nda'vi, ka kuu ni ñayii xiku,
ndaka ni, jin koniniso'o ni ja ká'an sa ya.
3Vaa ndimaa tnu'u ndichi ka'an sa,
te ndimaa ja ndákani ichi tna'a o ma jani ini sa.
4Koniniso'o ñukuun sa tnu'u ndichi ka ka'an i ma,
te ndaka'an sa tna'a ja yii ja jáku'ni ini o ma,
nani tée sa arpa ma.
5Vaa maa ni iyo ji'in sa, vi Su'si,
te ¿nava'a koyu'u sa kivi kenda ja u'vi ma,
te jin ndakonduu ña'a ñayii ñatuu ka kunimani nuu sa ma
ja jin sa'a ña'a i ja u'vi ma?
6Vaa maa i chi ka kukanu ini i ndaka ja ka neva'a i ma,
te ka kuvixi i ja kua'a xeen ja ka neva'a i ma.
7Kovaa ni‑in i, masu kundee chuya'vi i,
te kaku in ñani i ma xi in tna'a i ma,
vaa ni a kaku maa i masu kundee i chuya'vi i.
8Te ni a in ñayii masu kundee chuya'vi i ja kaku in‑ka ñayii ma,
vaa ni a ndaka xu'un iyo ñuu ñayivi a
masu kanda ja chuya'vi o ja kaku in‑ka ñayii
9te koteku i ni‑kani ni‑jika te ma skenaa i maa i ma.
10Vaa onde ñayii inundichi ma chi jin kûu tna i,
te inuu kuiti jin skenaa i maa i ji'in ñayii inuso'o ka ndaa ma
te ñatuu ka jaku'ni kuiti ini i sukan kúni Su'si ma.
Te ndaka ja ka neva'a i ma in‑ka ñayii ndunda'a.
11Te ñayii ya'a chi ja ka ñu'u xeen ini i kúu ja ve'e i ma
chi ni‑kani ni‑jika jin koo va'a
te ndi‑in ndi‑in sa'ya tata i ma jin nduta'vi i ve'e ma,
te visi ka ka'an i ja kuenda maa i ka kuu ñu'ú i ma,
12kovaa masu ka ndasa'a i kuenda ja jayiñu'u ñayii ma
chi másu koo ni‑kani ni‑jika,
vaa sani te jin kûu i sukan ka ji'i kiti ma.
13Te ja sukan ka ñu'u ini i ma chi masu ichi va'a kuan koo i,
vaa ka kuneé ka ku‑uun‑ni i, te ndaka ja ka sa'a ka kuu i ma
chi ka jatna ini sa'ya tata i ma.
14Te sukan ka kuu ndikachi ma ja iyo ñayii skaka ña'a
nuu jin koo ti ja jin kûu ti ma,
sukan kuan koo i ja jin skenaa i maa i ma,
vaa maa ja u'vi ma tátnuni nuu i ma.
Te ndaka ñayii ka sa'a ja va'a ja ndaa ma chi xtnee ne'e ma‑ni,
te jin kundee i nuu ñayii ka sa'a ja u'vi ma.
Sani te ñayii yukan, te jin skenaa i
tnu'u ndee tnu'u ndatnu i ma ji'in ja vivii ka ndaa i ma,
te nuu jin koo i ni‑kani ni‑jika ma ko kuu andeya ma
kuechi ja u'vi ni ka yo sa'a i ma.
15Kovaa saña chi maa Su'si ma sa'a ja kaku sa nuu andeya ma,
vaa maa ya ndakueka ña'a.
16Máko ko ndi ini ni nú ve kuxiku in‑ka ñayii ma
te ve kukua'a‑ka jayiñu'u i ji'in ñayii ka iyo ve'e i ma.
17Vaa kivi jin kûu i ma, másu nawa jin koo ji'in i,
te ni a jayiñu'u i ma másu ki'in ji'in i.
18Vaa visi nani ka téku i ma, te ka jani ini i:
“Ja vava'a kúu yo'o,
vaa iyo jayiñu'u o ja kúndee o ní'i tna'a‑ka o ma”,
ka jani ini i,
19kovaa suni jin koo tna i nuu nee
ka iyo ndaka tna'a i ñayii jâ ni ka skenaa i maa i ma,
te ni masu jin kuni‑ka i nuu vivii xtnuu Su'si ma ñu'u ya ma.
20Ñayii iyo xeen jayiñu'u i ma te másu nde ndása'a i kuenda ma,
sukan kúu kiti ja sani te kûu ti ma, sukan‑ni kúu i.
Currently Selected:
Salmos 49: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
