Salmos 48
48
Salmo 48
Vivii kaa yuku nani Sion ma nuu iyo jayiñu'u Su'si ma
1Iya Tátnuni ma kúu iya kanuu xeen,
te maa in‑ni ya iyo ja ni‑yu'u ni‑ini o jin ndachiñu'u o ya,
vaa iyo ya ne'un ñayii ñuu ya ma,
ja ka iyo i nuu yuku ii ya ma.
2Te nuu iyo ya ma vivii kaa,
te ka iyo sii ini ñayii ka iyo ni‑ka'nu ñuu ñayivi ya
ja ka nde'ya i ñuu ya ma.
Te yuku nani Sion ma, ja iyo i ichi ninu ñuu Jerusalén ma,
yukan kúu ñuu nuu iyo maa Su'si ma ja kúu ya Rey ma.
3Te ve'e ka'nu neva'a Su'si ma kúu
nuu kuu kaku ñayii ma nuu ja u'vi ma.
4Ni ka ndututu ndaka tee ka netniñu ndi‑in ndi‑in ñuu ma
ja ka kuu de rey ma,
te ni ka ndatnu'u tna'a de sukan jin kanaa de
ji'in ñayii ñuu Jerusalén ma.
5Kovaa nuu ni ka jini de ja îyo kaa yika ve'e
ni ndakonduu ndesi ñuu Jerusalén ma,
te ni ka sa'vi‑nka ini de, te ni ka yu'u de,
te ni ka ndakunu de kuan nu koo de.
6Te ka ndakuiyo ka ndakaa de ja ni ka yu'u xeen de ma.
Sukan kúu ña'a u'vi ja kâku lulu ña ma, sukan ka kuu de.
7Te maa ni, vi Su'si, chi kuu sa'a ni ja jaki'i xeen tachi,
vaa sukan ni sa'a ni,
nuu ni ndakana ni barcu kuan koo ñuu Tarsis ma.
8Sukan ni ka jiniso'o sa ma, te ni ka jini sa,
ja ñuu Su'si o Iya Tátnuni ma
chi ndasunkani vava'a ya ni‑kani ni‑jika,
vaa ñuu maa ya kúu.
9Ora ka iyo sa ini veñu'u ni ma,
te ka ndaka'an ka ndakachi sa
sukan kúnda'vi ini ña'a ni ma, vi Su'si.
10Te ja sukan sa'a ja sukan kúu ni ma,
te ni‑ka'nu ñuu ñayivi a ka ndachiñu'u ña'a i, vi Su'si,
vaa nuu nda'a kua'a ni a chi ndimaa ja va'a ja ndaa ñu'u.
11Ndusii ini xeen yuku nani Sion ma,
te jin ndusii ini xeen sasi'i ñayii ñuu Judá ma,
ja jin kuni i ja sukan ja'nde ndaa ni tniñu ñayii ma, vi Su'si.
12Kuán koo ni, te jin ndakonduu ni ñuu Sion ma,
te jin ndaka'vi ni na saa ve'e sukun ka iyo ma.
13Te ûni jin konde'ya ñukuun kuiti ni ni‑ka'nu yika ve'e ñuu ma,
ji'in ve'e kanuu nuu yinee rey ma,
sukan‑va'a jin ndakani ni nuu sa'ya tata ni kenda koo‑ka ma.
14Vaa Su'si o ya chi ni‑kani ni‑jika iyo ya,
te maa ya kúu iya ko koto ña'a, visi jâ ni ka ji'i o ma.
Currently Selected:
Salmos 48: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
