Salmos 44
44
Salmo 44
Sukan ni chindee Su'si ma tna'a o ñayii jana'a ma
1Saa vi, Su'si, ni ka jiniso'o maa sa
ja ni ka yo ndakani yuva sa tee jana'a ma,
sukan ni sa'a, ni kuu ni, ja ni chindee ni de kivi yukan ma.
2Nda'a maa ni, ni kene'e ni ñayii ka iyo ñuu yukan,
te ni xndo'o, ni xneni ni i, te ni xnaa ni i.
Te ni ndachi'i ni ndaka tna'a sa ma,
te ni ka iyo va'a de ñuu yukan.
3Kovaa ni masu ja ka yinda'a ka yija'a de
kuan koo de ja jin kanaa de ma
ni sa'a ja ni kuu ni ka ndani'i de ñu'ú nuu ka iyo sa vitna a,
nú masu ja maa ni ni sa'a ji'in nda'a ni a.
Vaa ni jatna ini ni sukan ka sa'a de ma, te ni kutoo ni de,
chukan kúu ja ni wa'a ni ñu'ú nuu ka iyo sa ya.
4Maa ni, vi Su'si, kúu Rey sa,
te sa'a ni ja jin kaku sa'ya tata tee kúu Jacob ma.
5Vaa ja maa ni, te jin kundee sa nuu
ñayii ñatuu ka kunimani nuu sa ma, te jin sondikin sa i.
6Vaa masu kúkanu ini sa kuji sa ya,
ni a yuchi kúu espada yinda'a sa ya,
ja jin chindee ña'a i ja kaku sa nuu ñayii ma.
7Vaa maa ni ni yo jito va'a ña'a
ja ñatuu ni ka kundee ñayii ñatuu ka kunimani nuu sa ma,
te ni sa'a ni ja ni ka ndakukan‑nuu maa ñayii
ni ka yo saxiko ña'a ma.
8Te jin koo sii ini xen‑xeen sa, vi Su'si,
te jin ndachiñu'u ña'a sa ni‑kani ni‑jika.
9Kovaa vitna, te ni xndoo ña'a ni, te ka tna'a sa ja kan‑nuu,
te ñatuu nde kíi ni ja chíndee ña'a ni
ora ka kanaa sa ji'in ñayii ñatuu ka kunimani nuu sa ma.
10Te sa'a ni ja ka ndakunu sa nuu ñayii yukan ma,
te ka sakui'na i nawa ka neva'a sa ma,
vaa ñatuu ka kunimani i nuu sa.
11Te sa'a ña'a ni sukan ka kuu ndikachi ma,
ja ka kunda'a ña'a tee ka ja'ni ti ma,
te ni jatenuu ña'a ni ni‑ka'nu ñuu ñayivi a.
12Te ni xiko ni ndaka ñayii ñuu ni a,
te ñatuu nawa ni ni'i ni ja ni xiko ni i ma.
13Te sa'a ni ja ka jakundee ña'a ñayii ka iyo yatni ji'in sa ma,
te ka ka'an ndeva'a i ja jin kuu sa,
te ka jakundee ña'a ndaka i ja ka nde'ya ña'a i ma.
14Te ka ndaka'an ka ndakachi i sukan ka ndo'o ka neni sa ma,
te ka jakundee ña'a i, te ka skuiko xini i.
15Te saña chi ndaka kivi ndákukan‑nuu sa
ja ndáka'án sa ndaka sukan ndó'o tná'a sa ya.
16Vaa jiniso'o sa ja ka ka'an ndeva'a
ñayii ñatuu ka kunimani nuu sa ma ja kuu sa,
te ka ñu'u ini i ja jin ndachunaa i sukan ni ka kundee sa nuu i ma.
17Ndaka tnundo'o ya'a ni kenda koo nuu sa ya,
kovaa masu nde ka ndunaa ña'a sa,
te masu nde ka ndunaa sa sukan ni ka'an ni ja jin kuu sa ma
chi ka ñu'u ini sa.
18Te ñatuu ka ndakokuiñi ini sa,
te ni a jin skendoo sa ichi ni kaxtnu'u ni ja jin kaka sa ma.
19Kovaa maa ni, ni xndoo nda'vi ni xndoo kee ña'a ni
in nuu kini in nuu nee kuiti.
20Nute ni ka ndunaa ña'a sa ma, vi Su'si,
te jin ndachiñu'u sa tna'a ja masu Su'si ka kuu ma,
21kuiti kunitnuni maa ni nkuu,
vaa maa ni chi jini ni nawa jani ini ñayii ma.
22Kovaa kuechi ja ka jinukuechi sa nuu maa ni a,
te chukan kúu ja ka xndo'o ka xneni ña'a ñayii ma,
te sukan ka kuu ndikachi ka iyo tu'va
ja jin koo ti nuu tee ka'ni ti ma, sukan ka kuu sa.
23Su'si maa sa, ndakatanuu ña'a ni, te máko skendoo ña'a ni,
te máko kujika ni nuu ka iyo sa ya ni‑kani ni‑jika.
24¿Naku ñatuu ndáka'án ña'a ni,
te naku ni ndunaa ña'a ni te ka ndo'o ka neni sa ya,
ja sukan ka sa'a ndeva'a ña'a ñayii ma?
25Vaa kua'a xeen ja ka ndo'o ka neni sa,
te kuenda tnu'u ja onde nuu ñu'ú‑nka a ka ndatuu sa
te ñatuu ka kundee‑ka ini sa.
26Konuu ni, te ki chindee ña'a ni ja na jin kaku sa nuu ja u'vi a,
vaa maa ni chi kútoo ña'a ni, te kúnda'vi ini ña'a ni, vi Su'si.
Currently Selected:
Salmos 44: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
