Salmos 45
45
Salmo 45
Sukan ko kuu kivi tnanda'a rey ma
1Ini anua sa ya ûni iyo chitu tnu'u vii tnu'u va'a,
te jita sa nuu maa ni ja kúu ni Rey sa a.
Te ûni ñukuun jita vivii sa nuu ni,
sukan sa'a tee tée nuu tutu ma,
ja ñukuun kuiti tée de ma te vivii kéndoo ma.
2Vaa maa ni chi vivii kaa ni,
iyo ni ne'un ndaka sa'ya tata ñayii ma,
te tnu'u ká'an káchi ni a ndimaa tnu'u vii tnu'u va'a kúu,
te chukan kúu ja Su'si ma chi taa ya ja vii ja va'a
ja kuta'vi ni ni‑kani ni‑jika.
3Tnii ni yuchi kúu espada ni a,
ndijin ja masu na in kundee nuu ni a,
vaa maa ni tátnuni, te iyo jayiñu'u ni.
4Te ja sukan iyo jayiñu'u ni a, te koo ni ji'in tnu'u ndaa ma,
te kava kuee ini ni, te sa'a ni ja va'a ja ndaa ma.
Te kuni ni sukan sa'a nda'a kua'a ni a, te kundee ni.
5Vaa flecha yinda'a ni a chi ûni inuxeen ndeva'a i,
te jin kivi koo i ini anua ñayii ñatuu ka kunimani nuu ni ma,
te jin kûu i, te jin kotuu i chii ja'a ni a.
6Su'si, nuu núkoo ni ja tátnuni ni a chi ni‑kani ni‑jika iyo,
te bastón yinda'a ni a chi káxtnu'u i
ja sa'a ndaa sa'a ndija ni, vi Su'si.
7Ni kutoo ni ja va'a ja ndaa ma, te ni saxiko ni ja u'vi ma.
Chukan kúu ja ni ndakaji ña'a maa Su'si ma,
te ni chi'i ña'a ya aceite ja ni ndusii ini ni,
vaa maa ni kanuu‑ka sana ndaka‑ka i ma.
8Te ndaka ndute ka jaxiko asi ma jáxiko sa'ma ni a.
Te onde ve'e ka'nu ja ni kuva'a ji'in yiki nani marfil ma,
onde yukan ka iyo i, te ka tee i yaa
ja ka ndachiñu'u ña'a i maa ni, vi rey.
9Te ndimaa sasi'i rey ka kuu suchi ka jinukuechi nuu ni a,
te ichi xiñi kua'a ni a iyo ñasi'i ni ma,
ja ndii nama ña oro ja vee in‑ka ñuu nani Ofir ma.
10Sasi'i maa ri, koniniso'o ñukuun, te katanuu ja ká'an ri a.
Ndunaa ñuu ro ma ji'in ve'e yuva ro ma.
11Vaa kúu ini rey ma nuu ro, vaa vivii kaa ro.
Te kandija ja ká'an de ma, vaa jito'o ro kúu de,
te kunukuechi nuu de.
12Te suchi si'i suchi jaa ka iyo ñuu nani Tiro ma,
ki koo i, te jin kinda'a i ja jin skuta'vi ña'a i.
Te ndaka ñayii ka ni'i ka tna'a ma,
jin ka'an vii jin ka'an va'a i ja kuu ro,
ja ka kuni i ja chindee ro i.
13Ûni vivii kaa sasi'i rey ma nuu iyo i ma,
te sa'ma ne'nu i ma yi'i oro.
14Te sa'ma kone'nu i ki'in i nuu iyo rey ma vivii ni kiku,
te jin kondikin ña'a suchi si'i suchi jaa ka kuu tna'a maa i ma.
15Te sii ini xeen jin koo i, te jin kivi koo i ve'e ka'nu iyo rey ma.
16Te sa'ya maa ni ma, vi rey, jin ko kuu suchi
jin kunukoo nuu ni ka yo nukoo tna'a ni tee jana'a ma,
te jin ko kuu tna i rey.
Te sa'a ni ja jin ko kuu i tee jin tatnuni
ni‑ka'nu ñuu nuu jin koo i ma.
17Te sa'a sa ja ndaka sa'ya tata ñayii ma,
jin ndaka'án ña'a i ni‑kani ni‑jika.
Te ni‑kani ni‑jika jin ndaka'an jin ndakachi
ndaka ñayii ñuu ñayivi ya
ndaka ja vii ja va'a ni sa'a ni ma ni‑kani ni‑jika.
Currently Selected:
Salmos 45: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
