Salmos 147
147
Salmo 147
Jín ndachiñu'u o Su'si ma ja sukan ni kunda'vi ini ya ñuu Jerusalén ma
1¡Jayiñu'u kóo nuu Su'si Iya Tátnuni ma!
¡Naka vii kúu ja kata o nuu Su'si o a,
vaa nuu maa ya iyo ja jin kata o te jin ndachiñu'u o ya!
2Iya Tátnuni ma, ndakani va'a ya ñuu Jerusalén ma,
te ndaxtutu ya ndaka ñayii ñuu maa ya ma
ja ni ka jitenuu i kuan koo i in‑ka ñuu ma.
3Te sa'a ya ja jin ndusii ini ñayii ka kuxii ka kunda'vi ini ma,
te xtandiyo ya nawa kúu ja sa'a ja ka ndo'o ka neni i ma.
4Te maa ya chi na'a ya na saa tiuxini ma ka iyo andivi ma,
te na'a ya nawa ka nani ndi‑in ndi‑in tiuxini ma.
5Su'si o ya chi iya ka'nu xeen kúu ya,
te iyo xeen tnu'u ndee tnu'u ndatnu ya,
te ndichi xen‑xeen ya.
6Su'si iya tátnuni nuu o a chi ûni sa'a ya ja koo jayiñu'u
ñayii ndákunitnuni ja masu nawa kuu sa'a i ja maa i ma,
nú masu ja onde maa ya chindee ña'a ma.
Kovaa ñayii sa'a ja u'vi ma chi sa'a ya ja ûni tna'a i ja kan‑nuu.
7Jin ndachiñu'u ni Su'si o Iya Tátnuni a.
Jin tee ni arpa ma, te jin kata ni nuu Su'si o a.
8Vaa maa ya kúu iya sa'a ja ndáchitu viko ma andivi ma
te kúun savi nuu ñu'ú ya,
te sa'a ya ja ka ja'nu ndaka yi'i kuii ma yuku ma.
9Te sukan wa'a ya ja ka jaa kiti ma,
ji'in ndaka lakaka kuechi ma,
wa'a ya ja ka jaa ti ora ka nda'yu ti ma.
10Másu ja sukan iyo tnu'u ndee tnu'u ndatnu caballu ma
xi ja sukan iyo tnu'u ndee tnu'u ndatnu ñayii ma
ja kua'an vee i ma,
kúu ja játna ini Su'si ma chi ña'a.
11Su'si o a chi ja játna ini ya kúu in ñayii yu'u,
nasa yukan, te sa'a i in ja u'vi ja ñatuu játna ini ya ma,
te ni‑yu'u ni‑ini i kúkanu ini i ya ja kútoo ña'a ya
te kúnda'vi ini ña'a ya.
12Jin ndachiñu'u ni Su'si o a, ja ka kuu ni ñayii ñuu Jerusalén ma.
Jin ndachiñu'u ni Su'si o a, ja ka kuu ni ñayii ñuu Sion ma.
13Vaa maa ya kúu iya ni ndakasi vava'a ye'e ñuu ni a,
sukan‑va'a jin koo va'a ni ji'in sa'ya ni ma ini ñuu ni ma
te ñatuu na in sa'a ndeva'a ña'a.
14Te maa ya sa'a ja jin koo mani i ni‑ka'nu ñuu ni a,
te sa'a ya ja jin ni'i jin tna'a ni, te máko kumani ja jin kaa ni ma.
15Te maa ya tétniñu tnu'u maa ya a ñuu ñayivi a,
te tnu'u maa ya a chi ñama xeen kuitenuu i.
16Te maa ya sa'a ja kúun yu'va ma,
sukan yaa yaa kaa ixi ndikachi ma,
te maa ya sa'a ja kúun kuenda tnu'u ja yaa nuu ñu'u ma.
17Te maa ya sa'a ja kúun ñiñi na'nu na'nu nuu ñu'ú a,
te sa'a ya ja kúvijin xen‑xeen, te ndute ma, ûni ndúu de suja.
18Kovaa nuna ka'an ya, sani te ndándute suja ma,
te nuna tutachi ya, te ndute‑nka‑ni ndákaka ni‑ka'nu.
19Ni kaxtnu'u ya nuu tee ni yo kuu Jacob ma
ji'in nuu ñayii ñuu Israel ma
tnu'u maa ya ma,
sukan ni tatnuni ya ja jin sa'a ñayii ma,
vaa ñukuun kútoo ya i ma.
20Kovaa masu sukan ni sa'a ya ji'in ndaka‑ka ñuu ma,
te ñuu yukan, másu ni ka jini i tnu'u ni tatnuni ya ma.
¡Aleluya! ¡Jayiñu'u kóo nuu ya!
Currently Selected:
Salmos 147: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
