Salmos 148
148
Salmo 148
Ndaka ja ni sa'a Su'si ma, na jin ndachiñu'u i ya
1Jayiñu'u kóo nuu Su'si Iya Tátnuni ma, iya iyo onde andivi ma.
Onde andivi ma na koo jayiñu'u ya.
2Ndaka ro ja ka kuu ro ángel ka iyo andivi a nuu iyo maa Su'si a
jin ndachiñu'u ya.
3Na jin ndachiñu'u tna yoo ma ji'in kandii ma Su'si ma.
Suni tna ndaka tiuxini ma, na jin ndachiñu'u tna i maa Su'si ma.
4Suni tna ndaka andivi ma, na jin ndachiñu'u tna i Su'si o ma.
Suni ndute tna ma ja iyo de onde siki andivi ma,
na ndachiñu'u tna de ya.
5Ndaka ja ni ka'an ya ja jin kuva'a ma te ni ka kuva'a ma,
te na jin ndachiñu'u tna i iya ni sa'a ña'a ma.
6Vaa maa ya ni sa'a ndaka, sukan‑va'a jin koo i ni‑kani ni‑jika.
Vaa sukan ni tatnuni ya ja sukan ko kuu,
te masu na in kuu ndakana ja ni ka'an ya ma.
7Jín ndachiñu'u ndaka kiti ka iyo nuu ñu'ú ya
Su'si Iya Tátnuni ma.
Ndaka kiti na'nu ka ñu'u ka'a ndute mar ma,
na jin ndachiñu'u ti Su'si ma.
Suni ndaka nuu kunu ka ñu'u ndute mar ma,
na jin ndachiñu'u i Su'si ma.
8Suni ja jándute ma ji'in ñiñi kúun ma,
na jin ndachiñu'u tna i ya.
Suni yu'va kúun ma ji'in viko ñu'ú ma,
na jin ndachiñu'u tna i ya,
te tachi yi'i xeen ma ja sa'a i sukan tátnuni ya ma,
na ndachiñu'u i Su'si ma.
9Te yuku sukun ma ji'in tinduu ma,
ji'in ndaka yutnu kui'i kúun ja vixi ma,
ji'in ndaka yutnu kaji ma,
na jin ndachiñu'u tna tnu Su'si ma.
10Ndaka kiti na'nu ma ji'in ndaka‑ka kiti kuechi ma,
ji'in ndaka koo ma ji'in ndaka kiti ka ndava ma,
na jin ndachiñu'u ti Su'si Iya Tátnuni ma.
11Ndaka tee ka tatnuni ñuu ñayivi a,
ji'in ndaka ñayii ka iyo ndaka ñuu ma,
ji'in ndaka sayii tee ka kuu rey ma,
ji'in ndaka tee ka ja'nde tniñu ñayii ma,
na jin ndachiñu'u de Su'si ma.
12Ndaka tna suchi yii suchi jaa ma,
ji'in ndaka tna suchi si'i suchi jaa ma,
ji'in ndaka tna ñayii nija'nu ma,
ji'in ndaka tna suchi kuechi ma,
na jin ndachiñu'u ndaka tu'u i Su'si ma.
13Ndaka tu'u o na jin ndachiñu'u Su'si o Iya Tátnuni ma,
vaa maa in‑ni ya kúu iya iyo andivi ma,
te jayiñu'u ya ma na koo nuu ñu'ú ya ji'in andivi ma.
14Vaa maa ya ni wa'a tnu'u ndee tnu'u ndatnu ya ma
nuu ñayii kúu ñuu ya ma.
Chukan kúu ja na jin ndachiñu'u ndaka
ñayii ñatuu na ja u'vi‑ka ka sa'a i ma maa in‑ni Su'si o ma.
Ndaka ñayii ñuu Israel ma,
ja ka kuu i ñuu maa ya ma,
te ka iyo yatni i ji'in ya ma,
na jin ndachiñu'u i ya.
¡Aleluya! ¡Jayiñu'u kóo nuu maa Iya Tátnuni ma!
Currently Selected:
Salmos 148: xtm
Highlight
Share
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
