Salmos 136
136
Salmo 136
Jín ndachiñu'u o Su'si ma, vaa ni‑kani ni‑jika kúnda'vi ini ña'a ya
1Jín ndachiñu'u o Su'si o iya tátnuni nuu o a,
vaa iya va'a ini kúu ya,
te ni‑kani ni‑jika nda'vi ini ya sa'ya ya ma.
2Jín ndachiñu'u o Su'si o iya téku ma
sana ja ka ka'an i ja su'si i ka kuu ma,
vaa Su'si ndija ma
chi ni‑kani ni‑jika nda'vi ini ya sa'ya ya ma.
3Jín ndachiñu'u o Su'si o iya tátnuni‑ka
sana tee ka tatnuni ma,
vaa ni‑kani ni‑jika nda'vi ini ya sa'ya ya ma.
4Jín ndachiñu'u o maa in‑ni iya kúu sa'a milagru ma,
vaa ni‑kani ni‑jika nda'vi ini ya sa'ya ya ma.
5Jín ndachiñu'u o maa iya ni jani va'a ini naxe ko kuu andivi ma
te ni sa'a ya ma,
vaa ni‑kani ni‑jika nda'vi ini ya sa'ya ya ma.
6Jín ndachiñu'u o maa iya ni ndasunkani ñu'ú a
nuu ñu'u kua'a ndute ma,
vaa ni‑kani ni‑jika nda'vi ini ya sa'ya ya ma.
7Vaa maa ya ni sa'a ja na'nu ka tnuu ñuu ñayivi a
nduu ma ji'in jakuaa ma,
vaa ni‑kani ni‑jika nda'vi ini ya sa'ya ya ma.
8Vaa maa ya ni sa'a kandii ma, ja tnuu i nduu ma ñuu ñayivi a,
vaa ni‑kani ni‑jika nda'vi ini ya sa'ya ya ma.
9Te suni maa ya ni sa'a yoo ma ji'in tiuxini ma,
ja jin kotnuu i jakuaa ma,
vaa ni‑kani ni‑jika nda'vi ini ya sa'ya ya ma.
10Jín ndachiñu'u o iya ni sa'a ja ni ka ji'i
ndaka sayii xinañu'u ñayii ñuu Egipto ma,
vaa ñatuu ni ka kandija i ya ma,
vaa ni‑kani ni‑jika nda'vi ini ya sa'ya ya ma.
11Te suni maa ya ni ndene'e sa'ya tata Israel ma
ja ka kuu i ñuu maa ya ma
ne'un ñayii ñuu Egipto ma,
vaa ni‑kani ni‑jika nda'vi ini ya sa'ya ya ma.
12Ji'in tnu'u ndee tnu'u ndatnu ya ma,
te ni skuili ya nda'a ya ma ja ni ndene'e ya ñuu ya ma,
vaa ni‑kani ni‑jika nda'vi ini ya sa'ya ya ma.
13Te suni maa ya ni sa'a ja ni te'nde sasava nuu ndute Mar Rojo ma
te ni ndanune ichi jin koo i ma,
vaa ni‑kani ni‑jika nda'vi ini ya sa'ya ya ma.
14Te ni sa'a ya ja ni nduu ñu'ú yichi nuu ni ka jika i
ja ni ka ya'a i ma,
vaa ni‑kani ni‑jika nda'vi ini ya sa'ya ya ma.
15Te maa ya ni sa'a ja ni ndatna'a nuu ndute ma,
te ni ka kêe koo Faraón ma ji'in ndaka soldado de ma
nuu Mar Rojo ma,
vaa ni‑kani ni‑jika nda'vi ini ya sa'ya ya ma.
16Jin ndachiñu'u ni maa iya ni yo jito va'a ñayii ñuu ya ma
ichi nuu masu nawa iyo kuiti ma,
vaa ni‑kani ni‑jika nda'vi ini ya sa'ya ya ma.
17Iya ni ja'ni ndaka rey ñuu na'nu ma,
sukan‑va'a jin kaku ñayii ñuu ya ma,
vaa ni‑kani ni‑jika nda'vi ini ya sa'ya ya ma.
18Iya ni ja'ni rey ka tatnuni‑ka ma,
sukan‑va'a jin kaku ñayii ñuu ya ma,
vaa ni‑kani ni‑jika nda'vi ini ya sa'ya ya ma.
19Jin ndachiñu'u ni iya ni ja'ni rey ñuu amorreo ma
ja nani de Sehón ma,
sukan‑va'a jin kaku ñayii ñuu ya ma,
vaa ni‑kani ni‑jika nda'vi ini ya sa'ya ya ma.
20Iya ni ja'ni rey tátnuni ñuu Basán ma,
ja nani de Og ma,
sukan‑va'a jin kaku ñayii ñuu ya ma,
vaa ni‑kani ni‑jika nda'vi ini ya sa'ya ya ma.
21Jin ndachiñu'u ni iya ni ndakua'a ñu'ú ndaka tee ya'a
nuu ñayii ñuu ya ma,
vaa ni‑kani ni‑jika nda'vi ini ya sa'ya ya ma.
22Iya ni ndaskuta'vi ñu'ú ñuu yukan nuu sa'ya tata Israel ma,
ñayii ka jinukuechi nuu maa ya ma,
vaa ni‑kani ni‑jika nda'vi ini ya sa'ya ya ma.
23Te suni maa ya kúu iya ni ndaka'án ña'a
nuu ka ndo'o ka neni o ma,
vaa ni‑kani ni‑jika nda'vi ini ya sa'ya ya ma.
24Te ni ndatava ña'a ya nuu nda'a suchi
ñatuu ka kunimani nuu o ma,
vaa ni‑kani ni‑jika nda'vi ini ya sa'ya ya ma.
25Te maa ya kúu iya táa ja ka jaa ndaka o ja ka teku o a,
te suni wa'a ya ja ka jaa ndaka kiti ka iyo ñuu ñayivi a,
vaa ni‑kani ni‑jika nda'vi ini ya sa'ya ya ma.
26Jín ndachiñu'u o Su'si o iya iyo onde andivi ma,
vaa ni‑kani ni‑jika nda'vi ini ya sa'ya ya ma.
Currently Selected:
Salmos 136: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
