Salmos 135
135
Salmo 135
Maa in‑ni Su'si ndija ma kúu sa'a ndaka
1Jín ndachiñu'u o Su'si o Iya Tátnuni ma.
Ndaka o ja ka jinukuechi o nuu Su'si o Iya Tátnuni ma,
ñukuun ñukuun jin ndachiñu'u o ya.
2Ndaka o ja ka iyo o ini ve'e Iya Tátnuni ma
ji'in nuke'e ve'e Su'si iya tátnuni nuu o a,
vivii jín ndachiñu'u o ya.
3Jín kata o nuu Iya Tátnuni ma, vaa iya va'a xeen ini kúu ya.
Jín kata o yaa ja ká'an jayiñu'u ja kuu Su'si ma,
vaa iya nda'vi ini kúu ya.
4Vaa Su'si o Iya Tátnuni ma chi ni kaji ya sa'ya tata Jacob ma
ja na jin ko kuu i sa'ya maa ya ma,
te Israel ma ko kuu ñuu maa ya ma.
5Vaa jini sa ja Su'si o ma chi iya ka'nu xeen kúu ya,
te suu ya tátnuni nuu ndaka o,
te maa in‑ni ya kúu iya tátnuni
sana ndaka ja ka ka'an ñayii ma ja su'si i ka kuu ma.
6Vaa ndaka ja kúni Iya Tátnuni ma chi sa'a ya,
kúu onde andivi ma, xi nuu ñu'ú ya,
xi nuu mar ma, xi onde nuu kunu xeen ma.
7Vaa kúu sa'a ya ja nána viko ni‑ka'nu nuu ñu'ú ya
te ndáa andivi ma.
Sani te sa'a ya ja jándute ma, sukan‑va'a kuun savi ma.
Sani te sa'a ya ja yi'i xen‑xeen tachi ma.
8Vaa maa ya kúu iya ni sa'a ja ni ka ji'i
ndaka sayii xinañu'u ndaka ñayii ñuu Egipto ma.
Te suni ni sa'a ya ja ndaka kiti yii ni ka kâku xinañu'u ma,
ni ka ji'i ti kivi yukan.
9Te suni maa ya ni sa'a ndaka milagru
nuu ndaka ñayii ñuu Egipto ma,
sukan‑va'a ndo'o neni Faraón ma,
ji'in ndaka ñayii ka jinukuechi nuu de ma.
10Te suni maa ya kúu iya ni sa'a ja kua'a ñuu ni ka naa
te ni ka ji'i rey ka tatnuni xen‑xeen ma.
11Vaa sukan ni sa'a ya ji'in tee ni yo nani Sehón ma
ja ni yo kuu de rey ñuu amorreo ma,
te suni sukan ni sa'a ya ji'in tee ni yo nani Og ma
ja ni yo kuu de rey ñuu Basán ma,
ji'in ndaka tee ni ka yo kuu rey ñuu Canaán ma.
12Te onde sukan ni sa'a ya ma ja ni xnaa ya ñayii yukan ma,
te ni ndakua'a ya ñu'ú yukan
ja ni ka nduta'vi ñayii ñuu Israel ma.
13Saa vi, Iya Tátnuni, ni‑kani ni‑jika iyo ni,
te jin ndaka'án ña'a sa ji'in sa'ya tata sa ma
ji'in sa'ya tata i ma, vi Su'si Iya Tátnuni.
14Vaa Iya Tátnuni ma chi ndakan ya kuenda
nuu ñayii kúu ñuu ya ma,
te kunda'vi ini ya ñayii ka jinukuechi nuu ya ma.
15Kovaa ndaka ja ka ka'an ñayii ni‑ka'nu ñuu ñayivi a
ja su'si ka kuu ma chi plata xi oro‑ni ka kuu,
tna'a ja ni ka sa'a ñayii ma ji'in nda'a i ma‑ni ka kuu.
16Vaa ka iyo yu'u i, kovaa masu nde kúu jin ka'an i,
te ka iyo nduchinuu i, kovaa masu nde kúu jin konde'ya i.
17Suni ka iyo so'o i, kovaa masu nde ka jiniso'o i ja ka ka'an o ma,
te ni masu kúu jin xtatachi i ji'in yu'u i ma.
18Te ñayii ka jani ini ja su'si i ka kuu ma te ni ka sa'a i ma,
sukan ka kuu ja ni ka sa'a i ma, sukan ka kuu tna maa ñayii ma.
Te suni sukan ka kuu tna ndaka ñayii masu ka ndasa'a kuenda
te ka kukanu ini i ja su'si i ka kuu ma.
19Ndaka ni ja ka kuu ni ñayii ñuu Israel ma,
jin ka'an vii jin ka'an va'a ni ja kuu Su'si o Iya Tátnuni ma.
Ndaka ni ja ka kuu ni sa'ya tata Aarón ma,
jin ka'an ni ja vii ja va'a ja kuu Su'si o Iya Tátnuni ma.
20Ndaka ni ja ka kuu ni sa'ya tata Leví ma,
jin ka'an vii jin ka'an va'a ni ja kuu Su'si o Iya Tátnuni ma.
Ndaka ni ja ka yu'u ni ja ká'an Su'si o Iya Tátnuni ma
te ñatuu ka sa'a‑ka ni ja u'vi ma,
jin ka'an vii jin ka'an va'a ni ja kuu ya.
21Te onde ñayii ka iyo yuku nani Sion ma,
na jin ka'an i ja vii ja va'a ja kuu Su'si o Iya Tátnuni ma,
iya iyo ini ñuu Jerusalén ma.
¡Aleluya!
Currently Selected:
Salmos 135: xtm
Highlight
Share
Compare
Copy
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.
