Idi Ufa 85
85
Narí maqannaasa rakisinnimaqaani fee innaaru.
1Oo Yaawee, ani maqa maaqara ani amuda qanau.
Anee Isaraee maqannaasa kafaa reemindeemirimma nisanau.
2Anee aneenna maqannaasa mandoosana akiiqara minninnisanau.
Misa aaqarana akiiqara aiqama rukannisanau.
3Anee ooqai aanoo qiqiunnana faqa aneenna qarana qarana idara foora qeeqeeuna faqa maqee minnisaananoo.
4Oo maasa asumu marirana qimi marianna Anutufa, anee kaifaa maasa sooqbaandumeeqee quqaqiseenana aneenna oori runirana maasasaa marina taikaa.
5Anee naaru naaru maasara aanoo qinnaree.
Ani aanoo qirafa sia fee dauni taikaannoo fee.
6Anee maasa kafaa afeekaikamma qimaqasainaqa maasa ani maqannaasa ani amooqianaura.
7Oo Yaawee, aneenna maasara naaru naaru aidirana uqaqifiqaseenana aneenna dadaaqirana qiminaqa asumu marirana maraa.
8Qinee Yaaweena Anutuna ufa iridaqa.
Mifa maasa narí aiku asaukuara sia inneeqa ooqeennaa furufarira aatata kafaa fifaqa qinee qeeqa asooarana inni nimianauree qidanoo.
9Yaaweefa nariara naaquqaifaqa qeerairi mariasa kuqaa asumu mararara deedaqinoo maridanoo.
Miqinoo marifanoo mina dadaaqira marirafa maasa maqa maaqaki aiqama atinai mariannoo.
10Miqimmafinanoo Anutufa maasara aidirafa faqa maqasaa qaraa fasiiqa mapukusee marira oosana faqa moodaanaki kifaranoo.
Yaaweena andeeqara oosana faqa maqasaaqaraasa asooarafa faqa narí difaa difaa narí difaa difaa ifaranoo.
11Maqasaaqaraasa Anutuna ufasaa nifu mundusee firafa innaarunai ubeekaifanoo innaarunaindari Anutuna andeeqarafa qumuree misa dadaaqiannoo.
12Miqimmafinanoo Yaaweefa maasa amiqi amiqimmanimaqaannoo.
Maasa maqa maaqaki nara ainaina rairaa inoo reemindeemiriannoo.
13Andeeqara oosana fannoo faiqí moora foora Yaaweena afunni fidanoo mifa fuaninna aana afisidanoo.
Currently Selected:
Idi Ufa 85: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
