Idi Ufa 46
46
Anutufa maasa faqa maridanoo.
1Anutufa maasa kukeeqara maqusa faqa maasa afeeka faqa maridanoo.
Maasa aiqama kari ummaaraki aqufunanoo dadaaqi marifa maridanoo.
2Maasa minara irisee sia rufiaanaura.
Maqa firaaqoo kasinaqa sia maasa minara rufiaanaura.
Aaqana namu mareeqee ooruku nammari qambaanai
uqasaina aqufinaqa maasa sia minara maparaa ianaura.
3Aiqama nammari aufinoo firaaqoo narisaa narisaa
arinoo qaqaara qaqaarinanoo firaaqoo ufaqinaqa sia rufiaanaura.
Aaqana namu kasinaqa nammari fannoo aaqana ammitu ammitu inaqa sia rufiaanaura.
4Anutuna maqusa aaqa mari nammarifa qumidanoo
raina rainidanoo Anutuna maqusaki mariasa mi nammarifa asasirana nimidanoo.
Mi maqusafa naaquqarafa marifanoo uriqarara Anutufa mi maqusanaki maridanoo.
5Anutufa mi maqusanaki marinara sia kasinoo sia aqufuannoo.
Namuqaa aniraifanoo mi kananaanna kai Anutufa dadaaqiannoo.
6Aamina maqannaa tautummasee aanoo qimasee
faaqa fuisee qiafaqa akaqa maqannaasa kurididaqa.
Misa miqi mariafanoo Anutufa narí ufa firaaqoo
uqeeraifanoo aiqama maqa tasirisirinoo nammarikidanoo.
7Karaambaiqa aiqama afeeka faqaafa maasa faqa maridanoo.
Yaakooboona Anutufa maasa afeeka kukeeqara maqusa maridanoo.
8Oo aiqamausa aniree Yaaweefa auqamasai ainaina qafaa.
Maa maqa maaqana aiqama naaquqara ainaina auqaina qafaaqa.
9 Mifa maa maqa maaqanasaa aiqama atiqara mari rakirana taikannimaqaidanoo.
Mifa duru feefa itairaatairidanoo.
Rakira saqari faqa idaki aqusaifanoo qama taikaidanoo.
10Oo innee kasoomafinaqa qinee Anutusa marunnanara oonumafi iriaqa.
Qinee moomoo maqannaasa qambaanai uriqaraqa marianaura.
Qinee aiqama maa maqa maaqanaki uriqaramafuanaura.
11Karaambaiqa aiqama afeeka faqaafa maasa faqa maridanoo.
Yakooboona Anutufa maasa afeeka kukeeqara maqusa maridanoo.
Currently Selected:
Idi Ufa 46: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
