Idi Ufa 45
45
Maqasaa karaambaiqa amundara idi.
1Amiqira irirafa qini iriranaki umbiqanoo marifaqa
karaambaiqa irianifeera maa idi ufana akara ruma amidaqa.
Qini qifauru fannoo papiqa saiki marina amiqira kirifiara foora maa idina akara ridanoo.
2Oo maasa maqasaa Karaambaiqa ani afaaqa aiqama faiqí faiqikiqari amiqirafa mariananoo.
Ani afauru deepimaseera foora amiqira ufa adiafaa ira ufa kai ani ookiqari ururaidanoo.
Minara naaruara naaruara Anutufa ani amiqi amiqimma amaqaidanoo.
3Oo uriqararafa ani afeeka faqa ani qareenarafa faqa
ani uriqararafa faqa marinara doo aneenna duru feefa deedaqinana rakiranaki fua.
4Anee aneenna uriqararana namu faqa doo rakiranaki finana uriqaraa.
Fimarinaqa ani anoona ufa qirana faqa andeeqarana faqa sia rafaaqa fuaqeera rakiranaki fua.
Ani rakirafa afeekaikinaqa manda oosana maree mariasa aniara firaaqoo rufieefaranoo.
5Ani duru feefa aaruqirafa namuqaauqa nimuqusaki kai naruannoo.
Miqiannanannai moomoosa ani aikuki aqufifana radamu nimaqeennaranoo.
6Anutufa anee naaru naaru uriqarana maridana
aneenna faiqí anaasee andeeqara oosanannoo rakisi nimaqaa.
7Ani andeeqaranara aidinoo mandainainara fidiaqaa inoo imarifa mariananoo.
Minara kai ani Anutufa ani utaaqamaseenoo
asasirana ani akiiqa amoondunna akaqa uriqararausa adia nimaqaina faqa uraaqa ramasee adia amaqeenoo.
8Ani qamunna makaqa mandeefana undidanoo ani
karaambaiqa amiqira maaqakina aiqama
ainainauqa eereefanta aanainnai auqira
ainainauqa kai maridanoo.
Minaki piripunna oosana oosanannai auqaafana anee asasimariananoo.
9Akaqa karaambaiqa niraamuqmaaka uriqarara aanaaseeuqa kai ani maaqaki maridaqa.
Ani karaambaiqa asauku uqannai ani anaaqa uriqarara
anaasee amiqira qamunna afisimarufa Oofiraa
maqusaindaraa koorannoo afaaqa auqusee ani asauku uqannai kikiqinoo maridanoo.
10Oo fuka amundara anaasee anee aneenna aaqoo ramatinimmafi qini ufa iria.
Aneenna maqannaa faqa aneenna ainainara faqa
qaunuseenana aneenna afaaqi maqa maaqaki kai maria.
11Miqimarinanoo ani afaaqi karaambaiqa ani amiqira oori afiriara firaaqoo aidiannoo.
Mifa ani karaambaiqa maridanoo anee minara kai qeerairidana mina ufa qaindusua.
12Tiree maqusaindaraasa moo amira ainaina
nisaukuki uqirausa aniree asasidaqa amifaranoo.
Faiqí aanaaseekiqari ainaina faqaasa aniree ani aqoondikifaranoo.
13Moo maqannaa karaambaiqa araamuna fannoo narí afaaqauqira maqaki maridanoo narí afaaqinnai firaridanoo.
Mi manaaqana qamunna koorannai auqirafa idaaqirafa kai maridanoo.
14Misa mina afiqamaree narí qamunna oosana oosana
akararirana namufaqa karaambaiqa munu amiafaqa qafeeqa.
Aqoonna maanaaqauqa mina dadaaqi marusa mina afiqee fia.
15Misa asasirana namufaqa nasu nasurirana namufaqa
aana muquniqa karaambaiqa amiqira maaqaki keeqaafaqa niqafeeqa.
16Maa anaaseena afaaqi karaambaiqa, ani faiqi namu
kambiqainausa ani amaaqa maqee findifi karaambaiqaikiqa fifaranoo.
Aneenna faiqi namu anee kaqi maridana aiqama
maqa maaqai uriqararausaika mannimaqasaina rakisi nimaqeefaranoo.
17Qinee ani auqu uqeerasaanaqa naaru naaru aiqama kambiqeefandinausa minara irifaranoo.
Miqiannanara faiqí anaasee naaru naaru ani amooqifaranoo.
Currently Selected:
Idi Ufa 45: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
