Aaquqira Ufa 15
15
1Reedeenira ufa aminanoo aanooqirafa taikaani. Raiqara ufa fannoo aanooqirana uqeeree marifa maridanoo.
2Irirana faqaasa ufa qiafaqa akaqausa mina iriseeqa irirafa amiqira ainainee qidaqa. Irirana siaisa nookiqari furufarira ufa kai fididaqa.
3Yaaweefa aiqamai kambiqee mari ainainna qafaidanoo. Maasa andeeqara ainainee mandainainee auqaunanoo mifa maasasaa afu rusisee maridanoo.
4Nifaaqa amiqianifee ufafa marirana nimidanoo. Aanoo qimaria nifaurufa faiqí naunduraindaraana narimarifa maridanoo.
5Narí anoona akoona ufara fidiaqaa imaifa furufarirafa maridanoo. Naakaparufa irimarifa irirana faqaafa maridanoo.
6Andeeqara fasiqa anaasee maaqaki qumiasana oosana oosana maridanoo. Manda oosana maree mariasa munnimma marasaafanoo mifa misa mareeqee mandainainaki quqaidanoo.
7Irirana faqaasa irirana aqamara foora doo aiqamai aaqaidaqa. Sia furufari mariasa miqidaqa.
8Mandainaina maree mariasa aandau arusee tatufu amiafanoo Yaaweefa qafamaseenoo misa tatufiranara fidiaqaa midanoo. Aneeqee maria fasiqa anaaseesa innaaru qiranara Yaaweefa aididanoo.
9Yaaweefa manda oosana maree mariasa niqafamasee misa oosanara fidiaqaa midanoo. Andeeqara oosanara rimariasara Yaaweefa aididanoo.
10Anee aaqara ainaina auqeenana afeeka nariranaki finnaranoo. Anee aakapara ufara qidoo fee qinana kuqinnaranoo.
11Kuqirausa mariannai ririmma Yaaweena afusaa akooqoo maridanoo. Kaqi mariasa naqi fee masee fee Anutuna afusaa nári irirana kukeeqeefaree akooqoo qafaidanoo.
12Kaukaata qimari fasiqafa aakapara ufara akooqaanoo. Mifa sia irirana faqaasiannai oonuree iriranara iraannoo.
13Faiqí anaasee asasiafanoo noori inaa inaa idanoo. Nimuqusa ummaara raifanoo nifaaqa faqa rumbaidanoo.
14Irirana faqaasa irira ainainara kai randaidaqa. Furufarirausa sia miqidaqa. Nári furufariranara maasa qimana maridanoo fee qidaqa.
15Kudi fasiqa marirafa naaruara ummaaraki kai maridanoo. Asasi mariasa aiqama kari misa marirafa nasunnasura kai midaqa.
16Kudi fasiqa maridana Yaaweenara aaquqee marinana marinafa moomoo qumiasana narí ummaara namu faqa uraaqarana marinnaranoo.
17Ani aidi mariasa saimbaqa aadana adasa naidana anee amiqira aandaura nikooqee marisa saimbaqa neemarina uraaqararafa mariananoo.
18Qusufa qimasee aanoo qimari fasiqafa aanoo qirana uqeeraidanoo. Reendeenimari fasiqafa asooarana nimidanoo.
19Ainainirara nikoo nikaa imariasa misa aiqama niranaki ummaara paquridaqa. Anee kuqaa qira oosana auqeenana sia ummaara mareennaranoo.
20Irirana faqaa faiqiuqa nári nikausa nifaaqa asasirana kai nimidaqa. Furufarirausa nári ninausamarana fidiaqaammidaqa.
21Irirana siaisa nári furufariranara asasa midaqa. Irirana irimari fasiqafa andeeqara ainaina auqaidanoo.
22Anee moo ainaina auqararee qimasee aakapara ufa marasee auqainanoo anoona kambiqeenoo andeeqaannoo. Aakapara ufa mau sia finana sia mina anoona paqurinnaranoo.
23Moo fannoo ufa qinnanaki anoona ufa irisee qimarifa narí ufara asasidanoo.
24Irirana faqaasa ameemaira foora ooru fidaqa naaru marirannai ooru fidaqa. Misa kuqirannai ooqufirara nikooqaifaqa miqidaqa.
25Nári nifaaqa amooqi mariasa Yaaweefa misa maaqa rapeeiannoo. Adeedaana anaasee aiqama ainainasaa Yaaweefa rakisi nimaqaidanoo.
26Manda oosana maree mariasa oonu mafi iriranara Yaaweefa fidiaqaa midanoo. Anukara irirana faqaasara mifa asasidanoo.
27Aiqama ainaina nariara kai fatusi marifa narí faiqi anaasee ummaaraki quqaidanoo. Manda oosana maraaqee qimasee feefauru nimiafaqa qaoo qimariasa kisaaqasaa maa maqanasaa marifaranoo.
28Andeeqara oosana maree mariasa moona ufa iriseeqa andeeqara ufara oonu mafi iriseeqa narí qimamidaqa. Manda oosana maree mariasa moona ufa iriseeqa kai kaqi narí qimamidaqa ummaara uqeeridaqa.
29Andeeqee mariasa innaaru qirana Yaaweefa iridanoo. Manda oosana maree mariasara Yaaweefa akooqaifanoo nianasaa maridanoo misa innaaru qirana sia iridanoo.
30Moo fannoo ani qafamasee naanaidara qimasee amandaifanoo ani amuqusa amiqidanoo. Moosaaqari amiqira ufa aninana irinanoo ani amuqusa amiqi miannoo.
31Qaoo qira ufa irisee eedoo qimari fasiqafa irirana faqaafa maridanoo.
32Anee aakaparufa irirara akooqainafa aneenna kai aupurarana aneennaki mara quqee mariananoo. Anee faiqí aakapara ufa aminnanara eedoo qimasee qaindusinanoo ani irirafa uriqaraannoo.
33Yaaweenara qeerairirafa amiqira irirana ani amiannoo. Reendeenira oosana naaree maraseenana inaaqianna uriqarafaikinnaranoo.
Currently Selected:
Aaquqira Ufa 15: bjr
Highlight
Copy
Compare
Share
Want to have your highlights saved across all your devices? Sign up or sign in
© 2017 Wycliffe Bible Translators, Inc. All rights reserved.
