Ziz 21

Laagɔ ya ‑buun -laagɔɔn ɩya ‑dʋdʋ ‑lelu nʋ

1Na, n ya ‑buun -laagɔɔn ɩya ‑dʋdʋ ‑lelu 'lɩ, sa ‑bɛka -laagɔan ɩya ‑bɛka -dʋdʋa ya mlɔ 'nyɩ gea ‑ma 'taanɩ ‑kʋ na. 2'Nyɩ n ya ‑kplɔkplɔdua, ma la 'lɛ Zolizalɛmʋdu ‑lelua na 'lɩ, ʋ 'wlʋlʋa ‑laagɔɔn, Laagɔ cɩ, 'nyɩ ʋ ‑kʋa le 'cɩcɩɛnʋŋlɔa ‑ɔ ‑bhɔsʋa 'lɛ ɔ ‑ŋuto 'la gbʋ na. 3'Nyɩ n ya ‑blɩɩzɔn 'kadie bhlo 'nu, ʋ 'wlʋlʋa ‑kwlekpoa 'kʋ 'nyɩ ʋ claa lebhe: «'Lɩka Laagɔ ‑ya ncɛlɩ 'la sakʋdaa. Ɔya maasɔ cɩ kanɩ 'lɛ sakʋ. Ma cɩ 'ka ɔla 'lɔlʋ 'plɩ ɩya ɔ 'ka Laagɔa ‑ɔya maasɔ ‑kʋ 'lɛ sa na 'plɩ. 4Ɔ cɩ 'ka mala 'ciin 'la 'mɩɔa ‑tɛtɛa sɩsɩɛ. Ncɛlɩ cɩ 'tanɩ 'ku. Cɩɩnkalɔ, 'nʋgbʋkasɛ ɩya 'kwlɩbhɩɛ cɩ 'tanɩ kʋ, sa ‑bɛka -laagɔzɔan ya 'plɩ na.»

5Ɔmɔa ‑ɔ ‑kʋ 'lɛ ‑kwlekpoa 'kʋ sa na, ya 'cla lebhe: «'Lɩka, ka n nʋnɩ 'lɛ lɩɩa ‑tɛtɛa lɩɩleli cɩ.» 'Nyɩ ɔ ya ‑awlɛ 'lɛ 'cla lebhe: «Zie lebhe wɔɔnyɩtʋ ‑naa ‑glɩ ‑nʋawlɛ 'nyɩ ma cɩʋ ‑delikʋthɛbhalɩ.» 6'Nyɩ ɔ yaan 'cla lebhe: «Wɔlɩa ‑tɛtɛa ya 'kʋglalɩ. ‑Amʋ ‑glɩ 'lɛ ‑Alɩfaa ɩya ‑Omegaa, ɩ sa ‑zɔn lebhe bhɔda ɩya 'wlukoda. Ɔmɔa 'nyutʋ bhla 'lɛ na, n cɩ 'kɔɔ jabhʋa 'la 'nyukobhua nɩkplaan 'la 'nyua 'nyɩ 'kpɔkpɔ. 7Ɔmɔa ‑ɔ ‑cɩ ka 'lɛ ‑sɩa na, ‑ajaa ‑naa ɔ cɩ 'ka 'lɛ 'lɩ, n cɩ 'ka ɔla Laagɔ 'plɩ ɩya ɔ 'ka 'na 'cʋ 'plɩ. 8‑Ma, ‑ɔ ‑glɩ 'lɛ ŋanɔnyaa na, maa ‑ɔ 'ta 'lɛ pɔɔtɛtɛ ‑ka na, 'wɩwɩlinyaa, ncaabhlanyaa, ‑kplakplaplanyaa, gɔzɩnyaa, ‑zliigʋgwlanyaa ɩya yodizʋnyaa ‑tɛtɛa, ‑kosua ɩya pipi sloa 'la 'bhukua nɩkplaan ma cɩ 'ka 'lɛ maa 'pa: 'Lɩka ‑mɔsɔ kwɩa.»

Zolizalɛmʋdu ‑lelua

9Na, 'bhlaandleecɩa* ‑ngbɔɔsɔa, ‑ɔ ‑kaa 'lɛ ‑kɔbhʋa ‑ngbɔɔsɔa wlɩɩn 'nyɩ leenbhlɩalɩ ‑kwlɩbhɩɛa 'la 'cia ‑ngbɔɔsɔa yea 'lɛ 'kʋ na, mala sidiin 'la bhlo ya ci 'nyɩ ɔ yaan 'cla lebhe: «Ci ɩya n 'kɔɔ 'cɩcɩɛnʋŋlɔa, 'bhlabhlɩcoa 'la 'ŋlɔa pala.» 10Na, 'wugoa ya gba 'nyɩ 'bhlaandleea yaan 'kikikadie bhlo 'wlu famʋ 'nyɩ ɔ yaan Zolizalɛmʋ, ‑kplɔkplɔdua pala, ʋ 'wlʋlʋa ‑laagɔɔn, Laagɔ cɩ. 11Laagɔ 'la 'klʋagbaa lelia 'mʋʋ nɩkplaan. Ʋla leliea ‑kʋa le 'pɛlʋtɛtʋcokwiea ɛ lɩ 'lɛ sa le ‑glaasɩ na 'bhisa. 12'Kʋtotogbidi 'kadɩ ‑didio 'dua. Ʋ ‑kaa gbini 'kʋgba ‑mɔsɔ, 'bhlaandleecɩ 'kʋgba ‑mɔsɔ ‑bɛa gbinia 'nyɩ ɩ ‑zieoa 'ŋlɩ 'kʋ: Izlayɛlɩlɔlɩa* 'kʋgbaa ‑mɔsɔa 'la 'ŋlɩ. 13Gbini ‑mɔta ‑kʋa 'ylʋbhuoa 'la 'wlʋlʋdaa, gbini ‑mɔta ‑kʋa 'dua 'la 'wukɔlʋa, gbini ‑mɔta ‑kʋa gozɔan 'nyɩ gbini ‑mɔta ‑kʋa 'lɛ 'ylʋbhuoa 'la pʋlʋgbazɔa. 14‑Gbidia ‑ɩ ‑didioa 'lɛ 'dua na, 'slalɩɔa cɔkʋ 'kʋgba ‑mɔsɔ 'kʋ 'nyɩ 'bhlabhlɩcoa 'la lobhulobhunyaa* 'kʋgba ‑mɔsɔa 'la 'ŋlɩ ‑zieoa 'mɩɩ 'lɛ 'kʋ.

15Na, ɔmɔa ‑ɔ solua ‑amʋa 'lɛ na, ɔ ‑kaa ‑bɩɔlʋʋ wlɩɩn, ʋ ‑glɩa ‑asɩkɛkɔlʋ le ɔ 'ka 'dua, ʋla gbinia ɩya ʋla ‑gbidia ‑bɩɔ. 16'Dua kaa ‑koti ‑nmɔɔna, ɩ 'wlʋlʋa 'bhʋalɔɔn ɩya 'ghliloon. Ɔ ya kɔlʋa 'ma 'nyɩ ɔ ya 'dua ‑bɩɔ. Ʋla 'bhʋalɔa nʋa 'bhli ‑tabhliwli 'kʋgba ‑mɔsɔ ɩya ‑gwlɩɩ ‑ngbi 'la dɩpici ‑mɔsɔ. Ʋla 'bhʋalɔa, ʋla 'ghliloa ɩya ʋla 'kʋtoloa 'wlʋlʋa. 17Ɔ ya ‑awlɛ 'dua 'la ‑gbidia 'la 'kʋtoloa ‑bɩɔ 'nyɩ ɩ nʋa 'mɛtlɩ ‑gwlɩɩ ‑mɔta ɩya 'kʋgba ‑mɔsɔ. ‑Bɩɔlʋʋa 'bhlaandleea 'maa 'lɛ na, ʋmʋ ncɛlɩ maa ‑azla 'lɛ 'nyɩ ma ‑bɩɔ 'lɛ lɩɩ. 18Cokwiea ma 'maa 'lɛ 'nyɩ ma ya 'lɛ 'dua 'la ‑gbidia 'sla na, ɛmɛ ma la 'lɛ 'zasɩpʋ 'nyɩ 'dua 'titi ‑glɩa 'lɛ ‑asikɛnyɛkɛ 'nyɩ ʋ lea 'lɛ le ‑aklawoko 'bhisa. 19Ma ya 'pɛlʋtɛtʋcɔkʋ ‑mizi -mizi 'ma 'nyɩ ma ya 'lɛ cɔkʋa 'dua 'la ‑gbidia 'slalɩɔa 'lɛ 'kʋ na 'nyu budo. ‑Bɛka ‑cɔkʋgbalʋa ‑kaa 'pɛlʋtɛtʋcokwie ma la 'lɛ zasɩpʋ na cɩ, ‑mɔsɔ ‑naanʋa ‑kaa ɛmɛa ma la 'lɛ ‑safili na cɩ, ɛ ‑kʋ ‑galɩgalɩ, ‑mɔta ‑naanʋa ‑kaa ɛmɛa ma la 'lɛ -kalɩsedʋanɩ na cɩ, ‑nmɔɔna ‑naanʋa ‑kaa ɛmɛa ma la 'lɛ ‑emelodʋ na cɩ, 20‑ngbi ‑naanʋa ‑kaa ɛmɛa ma la 'lɛ ‑salɩdʋanɩ na cɩ, ‑ngbʋflʋ ‑naanʋa ‑kaa ɛmɛa ma la 'lɛ -kɔlʋnalini na cɩ, ‑ngbɔɔsɔ ‑naanʋa ‑kaa ɛmɛa ma la 'lɛ -klizoliti na cɩ, ‑ngbaata ‑naanʋa ‑kaa ɛmɛa ma la 'lɛ ‑belili na cɩ, ‑nvɔɔna ‑naanʋa ‑kaa ɛmɛa ma la 'lɛ ‑topazɩ na cɩ, 'kʋgba ‑naanʋa ‑kaa ɛmɛa ma la 'lɛ -klizoplasɩ na cɩ, 'kʋgba bhlo ‑naanʋa ‑kaa ɛmɛa ma la 'lɛ ‑yasɩntɩ na cɩ, 'nyɩ 'kʋgba ‑mɔsɔ ‑naanʋa ‑kaa 'lɛ ɛmɛa ma la 'lɛ ‑ametisiti na cɩ. 21Gbinia 'kʋgba ‑mɔsɔa ‑glɩa ‑blaazɩɩa ma la 'lɛ ‑lie na ɩla 'kʋgba ‑mɔsɔ. ‑Lie bhlo nʋ gbine bhlo. 'Nyɩ dua 'la 'clikpoa ‑glɩa 'lɛ ‑asɩkɛ ‑nyɛkɛ 'nyɩ ‑ɛ lea 'ylʋbhuoa 'bhisa. 22‑Ma Laagɔ 'la gʋgwlapalʋ, n 'tʋʋ 'yɛpɩ 'dua nɩkplaan 'lɩ, sa ‑Kwlenyɔa, Laagɔ 'tɛtɩa 'fɩan to ɩya 'bhlabhlɩcoa ‑glɩ 'lɛ ʋla Laagɔ gʋgwlapalʋ. 23'Dua 'matɩ 'ta 'ylʋbhuoa ‑aana cabhuoa 'fɩɔn ɩya ʋ 'kaa salɩ, sa Laagɔ 'la 'klʋagbaa lelia 'mʋʋ 'kʋ 'nyɩ 'bhlabhlɩcoa ‑glɩ 'lɛ ʋla ‑kanie. 24'Bhlɩ 'bhlɩ 'kʋ 'la ncɛlɩ cɩ 'ka ʋla zezezelia nɩkplaan namʋnʋ ɩya ‑dʋdʋa 'kʋ 'la nyɩbhɛlɩa 'ka 'yɛpɩ mala 'bhɛlɩa ‑la. 25Ʋla gbinia cɩ 'tanɩ ‑kpaslɩlɩɔ, sa 'tutu cɩ 'tanɩʋ 'kʋ pla na. 26Ma cɩ 'kʋʋ ‑laagɔzɔnbhuoa 'la ncɛlɩ 'la 'klʋagbaa ɩya mala gbakabhalɩɩa nɩkplaan ‑la. 27Lʋʋa ‑ʋ 'ta 'lɛ ‑kplɔ, ɩya ncɛlɩa ‑ɔ nʋ 'lɛ gbanyinyi 'nyɩ ‑ɔ zʋ 'lɛ yodi na, cɩ 'tʋʋ nɩkplaan ble, ‑ma maa ‑ɔ cɩ ka 'lɛ 'yɛpɩ ble na, ma ‑glɩ maa ‑tɛɛa ‑ɔla 'ŋlɩ ‑zieo 'lɛ 'bhlabhlɩcoa 'la jabhʋfluwaa nɩkplaan na.

Currently Selected:

Ziz 21: NTLD13

Highlight

Copy

Compare