Kols 3

A 'matɩ lɩɩa ‑ɩ ‑kʋ 'lɛ ‑laagɔɔn na

1Na, aya Klisi yanɩ 'lɛ 'kwɩɩnkʋbho na, a 'matɩnɩ lɩɩa ‑ɩ ‑kʋ 'lɛ ‑laagɔɔn, gbazɩa Klisi ‑kʋ 'lɛ Laagɔ 'lipasɔ 'kʋ sa na. 2‑Laagɔɔn 'la lɩɩa 'la wɔlɩ 'nyɩ a gugu, ‑ma ‑n 'ta ‑dʋdʋa 'kʋ ‑naanɩaa. 3‑Masa a ya 'ku, 'nyɩ ala jabhʋa ‑ya Klisi ‑zizieonɩ Laagɔ nɩkplaan na. 4Klisi ‑glɩ 'lɛ ‑ala jabhʋa. Na, daa ɔ cɩ 'ka 'lɛ ‑zɔnwlʋ na, anyɩ ‑ma ayɔɔsɔ cɩ 'ka ‑zɔnwlʋ ɩya a 'ka ɔla 'klʋagba nɩkplaan kʋmʋ.

‑Godogodojabhʋa ɩya jabhʋ ‑lelua

5Na, ɩmɩa ‑ɩ ‑kʋ 'lɛ anyɩ nɩkplaan, 'nyɩ ‑ɩ ‑glɩ 'lɛ ‑dʋdʋa 'kʋ 'la lɩɩ na, a 'wlʋ ɩla ‑kwleliea ‑zɔn. Ɩmɩ ‑ɩ ‑glɩ 'lɛ ‑badaaglu, dɩbʋ, ‑lɩɩ ‑mizimizi 'la 'tʋ, wɔɔgugwienyinye ɩya 'dala 'la ‑walʋa ‑ʋ ‑glɩ 'lɛ ‑zliigʋgwlɛ 'la 'ce bhlo na. 6'Lɩka ɩmɩa ‑ɩ lalɩ 'lɛ Laagɔ 'la dɔgbɛa maa ‑ɔ mʋnʋɔ 'lɛ gbatlɩ na 'kʋ na. 7'Nyɩ sɛɛ a namʋa 'lɛ ‑bɛkadaa, sɛɛ ala 'pʋpʋa 'kʋ ‑kʋa 'lɛ. 8‑Ma ‑pɔtɔnʋ, ‑ɔ -glɩ 'lɛ anyɩ na, a 'talɩnɩ ɩmɩ ‑naa ‑tɛtɛa 'cin. Dɔgbɛ, pɔlɛkʋsiesie, ‑abhɔlɛ, ncaavlalɩɛ ɩya wɔɔnyinyia ‑ɩ 'wlʋlʋ 'lɛ anyɩ neen na.

9A 'la zʋzʋlʋanɩ yodɩ, sa a yanɩ ‑godogodo nclɔɔa ‑ya ɔla nʋnʋgbɩa 'la lokwia nɩkplaan ‑sa, 10'nyɩ a yanɩ 'lɛ ncaaleloa 'nɛa nɩkplaan pla, -ɔ kaci 'lɛ clɩɩa 'fɩan le ɔ 'ka ɔla nʋnyɔa 'bhisa 'kʋ 'plɩ, ɩya ɔ 'kɔɔ 'nanɩ cibhlili na. 11Na, Glɛkɩnyɔ ɩya Zifʋnyɔ* 'tanɩ ‑kʋ, maa ‑ɔ ‑dɩɔ 'lɛ 'kʋ ɩya maa ‑ɔ 'ta 'lɛ 'kʋ ‑dɩɔ na 'tanɩ ‑kʋ. Lowlunyɔ, 'lukulukunyɔ, geyu ɩya ‑ncɩkalɩnyɔ 'tanɩ ‑kʋ, ‑ma Klisi bhlogbɩɩ ‑tɛɛ. Ɔmɔ ‑ɔ ‑glɩ 'lɛ ‑tɛtɛa 'fɩan 'nyɩ ɔ ‑kʋ 'lɛ ncɛlɩa 'fɩan nɩkplaan.

12Na, Laagɔ yanɩ 'lɛ anyɩ desla, ɔ ya 'lɛ anyɩ ‑kplɔ, 'nyɩ ɔ ‑wa 'lɛ anyɩ na, 'naa a ‑planɩ ŋaazɩɩnlɩlɩɛ, dananɔ, ‑ncɩdʋdʋkʋlalɩɛ, ‑pɔnpɔnnʋlɩlɛ ɩya pɔɔklalɩɛ 'la lokwia nɩkplaan. 13'Naa nclɔɔ nclɔɔ ŋonu ɩmɩa ɔ 'yʋ nʋɔ 'lɛ cɩ na 'kʋ, ɩya ka bhlo ‑ka ɔ 'yʋ 'la wɔlɩ nɩkplaan ‑ka na, a vavalɩ. ‑Kwlenyɔa ya 'lɛ anyɩ va na, anyɩ ‑ma, a vavalɩ, 14ɩya ‑tɛtɛa 'fɩan nɩkplaan, a kalɩ ‑walʋ. Ʋmʋ ‑ʋ ‑glɩ 'lɛ 'bhlua ‑ʋ gba 'lɛ 'nyɩ ‑tɛtɛa 'fɩan ‑kakalɩ 'lɛ na.

15'Naa Klisi 'la pupuea 'kʋa ɔ la 'lɛ anyɩ le a 'ka bhlo 'plɩ na, 'lɩ ala pɔlɩa 'klʋ, ɩya a bhɔlʋ Laagɔ clɩɩa 'fɩan. 16'Naa Klisi 'la cɩa wɔlɩa ‑ya ɩla 'nanɩa ‑tɛtɛa kʋ anyɩ sidiin. A 'ma dɩgalɩa ‑tɛtɛa ɩya a cacalɩ wɔlɩ ɩya a 'nyɩnyɩnɩ dɩgalɩ. A bhlɩ 'lɩa ‑ɩ 'wlʋlʋ 'lɛ anyɩ pɔlɛ 'ciin na ɩya a 'nyɩ Laagɔ. A bhlɩ labhlɩfluwaa nɩkplaan 'la 'lɩ, gʋgwlalɩ, ɩya 'lɩa 'Wugoa zʋ 'lɛ anyɩ neen na, ɩya a bhɔlʋ Laagɔ. 17‑Tɛtɛa 'fɩan a cɩ 'ka 'lɛ nyɩtɛ ‑aana, a cɩ 'ka 'lɛ nʋ na, a nʋnʋɩ ‑Kwlenyɔ Zozii 'la 'ŋlɩa nɩkplaan, ɩya a 'plɩlɩɔ 'kʋ ɩya a bhɔlʋ ‑a To Laagɔ.

Wɔlɩ pɔlɛcɩfalɩlɩɛ

18'Ŋwlɛnyɩ, a zʋ a ‑ŋutiecɩ, saa ‑ɩ ‑ŋwa 'lɛ 'kʋ lebhe ‑Kwlenyɔ 'la gɩlɩŋwlɛ nʋ na. 19Ŋodienyɩ, a wabha a nʋŋwlɛcɩ ɩya a 'la zʋa mala wɔlɩ nɩkplaan.

20'Cuonyɩ, ‑tɛtɛa 'fɩan nɩkplaan, a zʋ ala valɩnyaa. 'Lɩka ɩmɩa ‑Kwlenyɔ 'matɩlɩ 'lɛ anyɩ wlɩɩn na. 21'Cuotocɩnyɩ, a 'la nʋa ala 'cuoa gblɔɔgblɔɔ, 'nyɛkɛ 'la ka sɛ maa 'kɔtɔ.

22Geyenyɩ, ‑tɛtɛa 'fɩan nɩkplaan, a zʋ a tocɩa ‑ɔ ‑ka 'lɛ anyɩ na. A lobho maa, ‑n 'ta lebhe mala 'ci 'ka anyɩ ‑kʋ 'fɩɔn, le saa a 'matɩa 'lɛ lebhe a 'ka ncɛlɩ 'tʋpla na, ‑ma a 'ma pɔɔnanɛ ɩya a lobho maa le ncɛlɩa ‑ɔ ‑ka 'lɛ ‑Kwlenyɔ 'la zʋlɩɛ na 'bhisa. 23Saa 'fɩan ala lobholia cɩ 'ka 'lɛ kʋkʋlʋ na, a nʋnʋɩ pɔɔnanɛ nɩkplaan, ‑n 'ta le ncɛlɩ 'la gbʋʋ, ‑ma ‑Kwlenyɔ 'la gbʋ. 24Sa a ‑ci lebhe ‑Kwlenyɔ ‑cɩ ka 'lɛ anyɩ dluplʋ na. ‑Ajaa ɔ bhɔsʋa 'lɛ ala gbʋ na, ama ‑a ‑cɩ ka 'lɛ ala dluuplʋlɩɛa 'plɩ. Na, Klisi ‑glɩ 'lɛ a to 'titi, ɔmɔ a lobho 'lɛ, 25'nyɩ ɔmɔa ‑ɔ cɩ 'ta 'lɛ 'kʋnylugolu na, ɔ cɩ 'ka ɩla dluuplʋlɩɛa 'lɩ, sa nɩkplaangbazlɩlɩlɩɛ 'ta ‑kʋ na.

Currently Selected:

Kols 3: NTLD13

Highlight

Copy

Compare