2 Zaan 1
1
‑Ayopalɩɛ
1‑Amʋ ncaakpasaa, ‑amʋ ‑ɔ zie 'lɛ Laagɔ 'la deslaslaŋlɔa ɩya ɔla 'cuoa n ‑wa 'lɛ ‑nʋawlɛ nɩkplaan na. ‑N 'ta ‑amʋ bhlogbɩɩ ‑tɛɛ ɔ 'ta 'lɛ anyɩ ‑wa, ‑ma maa 'fɩan ‑ɔ ‑ci 'lɛ ‑nʋawlɛ na ‑masɛɛ, 2‑ofi lebhe ‑nʋawlɛ ‑kʋ ‑anyɩ nɩkplaan, 'nyɩ ɛ cɩ 'ka ‑anyɩ cɩ kʋ 'lʋkʋlʋkʋ ɩya 'lʋkʋlʋkʋ na. 3'Nyupalɩɛ, ŋaazɩɩnlɩlɩɛ, ɩya pupuea ‑ɩ 'wlʋlʋ 'lɛ To Laagɔ ɩya Zozi Klisi, Toa 'la 'Cʋa wlɩɩn na, cɩ 'ka ‑anyɩ cɩ kʋ ɩya ‑a ka ‑nʋawlɛ ɩya ‑walʋ nɩkplaan namʋnʋ.
A namʋnʋ ‑nʋawlɛ ɩya ‑walʋ nɩkplaan
4N ya 'lɩ lebhe ‑naa 'cuoa ‑anʋa namʋnʋ ‑nʋawlɛ nɩkplaan, ‑jlɩmaa Toa 'nyɩ 'lɛ ‑anyɩ na 'la 'sasʋʋn, 'nyɩ ɩ yaan pɔlɛkʋmɛnɔ 'kadie nʋ. 5Na, 'ŋlɔ, ɩmɩa n 'clalɩnɩɔ 'lɛ ‑pɔtɔnʋ na, ɩmɩ ‑ɩ ‑glɩ 'lɛ lebhe ‑a wabhawabhalɩ. 'N zie 'tɔɔ ‑jlɩmaa ‑lele, ‑ma amaa ‑a ‑ka 'lɛ bhɔdaa tooto na, ama n zieo 'lɛ. 6Na, ‑walʋa ‑glɩ 'lɛ lebhe ‑a 'plɩlɩ ɔla ‑jlɩmaa 'kʋ. 'Nyɩ ‑jlɩmaa a 'nu 'lɛ bhɔdaa tooto na, ama ‑glɩ 'lɛ lebhe a namʋnʋ ‑walʋ nɩkplaan.
A zʋlʋ ncaanyiglilinyaa pɔlɛ 'kʋ
7Ncaanyiglilinya ‑bhutukpa ya ‑laagɔzɔan 'kʋcɩlɩ. Ma 'ta pɔɔtɛtɛ ‑ka lebhe Zozi Klisi ya nclɔɔ 'plɩ 'nyɩ ɔ ya 'lɛ ci. Maa ‑naa -ɔ ‑glɩ 'lɛ ncaanyiglinyaa ɩya Klisi 'la ‑zɔbhɛlɩgbanyaa. 8A zʋlʋ acɩ pɔlɛ 'kʋ, ɩya ala lobholia 'la 'ka 'kpɔkpɔ 'plɩ, ‑ma a 'ka ɩla dluuplʋlɩɛa ‑tɛtɛa 'lɩ. 9Ncaatʋtʋʋntʋa ‑ɔ 'plɩlɩ 'ta 'lɛ Klisi 'la cacawɔlɩa 'kʋ, 'nyɩ ‑ɔ dɩɩ 'lɛ 'bɩɩn na, ɔ 'ta Laagɔ ‑ci. ‑Ma ɔmɔa ‑ɔ 'plɩlɩ 'lɛ cacawɔlɩa 'kʋ na, ɔya Toa ɩya 'Cʋa ‑glɩ bhlo. 10Gbazɩ nclɔɔ ‑ka anyɩ 'bhlɩ ci, 'nyɩ ɔ 'ta anyɩ wɔlɩ ‑naa ca na, a 'la famʋɔ 'sleen ɩya a 'la 'pɔɔ ‑ayo. 11Sa nclɔɔ ‑ɔ ‑kɔɔ ‑ayo 'pa na, ka ɔyɔɔsɔ 'wlalɩ 'lɛ ɔla wɔɔnyinyia 'kʋ.
Bhɩalɩwɔlɩ
12N ‑ka wɔɔbhutukpa ɩya n 'ka anyɩ solu, ‑ma n 'ta wabha lebhe n 'kɩɩ zie. Sa n 'tɛlɩ pɔlɛ 'kʋ le n 'ka anyɩ 'bhlɩ ci, ɩya n 'ka anyɩ neen solulu ɩya ‑ala pɔlɛkʋmɛnɔa 'ka 'kʋglalɩ.
13‑N mɛnɔ, Laagɔ 'la deslaslaŋlɔa, ɔla 'cuoa pɔɔ ‑ayo.
Currently Selected:
2 Zaan 1: NTLD13
Highlight
Copy
Compare
Share
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
