1 Zaan 5

Pɔɔtɛtɛ ɛmɛ ‑ɛ sɩa 'lɛ ‑laagɔzɔan

1Ncaatʋtʋʋntʋa, ‑ɔ ‑ka 'lɛ pɔɔtɛtɛ lebhe Zozii ‑glɩ 'lɛ Laagɔ 'la ‑Sasanyɔa* na, 'dɛ 'la nclɔɔa ‑glɩ Laagɔ 'la 'cʋ. 'Nyɩ ncaatʋtʋʋntʋa ‑ɔ ‑wa 'lɛ Laagɔ, ‑ɔ ‑glɩ 'lɛ Toa na, ɔ ‑wamʋ ɔla 'cuoa. 2Na, ɩmɩa nɩkplaan ‑a cibhlilili 'lɛ lebhe ‑a ‑wa Laagɔ 'la 'cuoa na, ɩmɩ ‑glɩ 'lɛ lebhe ‑a ‑wa Laagɔ 'nyɩ ‑a 'plɩlɩ ɔla ‑jlɩmaa 'kʋ. 3'Nyɩ 'lɩsaa ‑glɩa 'lɛ Laagɔ 'la ‑wawʋa ‑a ‑wɔɔ 'lɛ na bha? Laagɔ 'la ‑wawʋa ‑glɩ ɔla ‑jlɩmaa 'la zʋlɩɛ. 'Nyɩ ɔla ‑jlɩmaa 'ta 'kʋwɔlɔwɔlɔ ‑gbaakʋ ‑glɩ, 4sa ncaatʋtʋʋntʋa ‑ɔ ‑glɩ 'lɛ Laagɔ 'la 'cʋ na, ɔ ya ‑laagɔzɔan ‑sɩa, 'nyɩ lʋʋa ‑ʋ ‑sɩa 'lɛ ‑laagɔzɔan na, ʋmʋ ‑ʋ ‑glɩ 'lɛ ‑ala pɔɔtɛtɛa. 5'Nyɩ ncaasaa ‑ɔ ‑sɩa 'lɛ ‑laagɔzɔan bha? Ɔmɔa ‑ɔ ‑ka 'lɛ pɔɔtɛtɛ lebhe Zozii ‑glɩ 'lɛ Laagɔ 'la 'Cʋ na, ‑n 'ta ɔmɔ bha?

6Zozi Klisi ɔya 'nyu ɩya ‑dolu ci 'lɛ, ‑n 'ta ɔya 'nyu bhlobhloo 'ta 'lɛ ci, ‑ma ɔya 'nyu ɩya ‑dolu ci 'lɛ. 'Nyɩ 'Wugoa li ɩla ‑danʋfʋɛ, 'nyɩ 'Wugoa ‑glɩ ‑nʋawlɛ. 7‑Danʋfʋɛcɩa ‑glɩ ‑mɔta. 8'Wugoa, 'nyu ɩya ‑dolu, 'nyɩ ɩmɩ ‑naa ‑mɔtaa li ‑danʋfʋɛa bhlogbɩɩ. 9‑A la ncɛlɩ 'la ‑danʋfʋɛlilie ‑nʋawlɛ. ‑Ma Laagɔ 'la ‑danʋfʋɛliliea 'ghli 'nyɩ ɛ zi ncɛlɩ 'nɛa 'kʋ, sa ɩmɩ ‑naa ‑glɩ 'lɛ ‑danʋfʋɛa Laagɔ li 'lɛ 'nyɩ ɔ 'nyɩ 'lɛ ɔla 'Cʋa na. 10Na, ɔmɔa ‑ɔ ‑ka 'lɛ Laagɔ 'la 'Cʋa 'la pɔɔtɛtɛ na, ɔ limʋ ‑danʋfʋɛlilie ‑naa ‑sakasaka. ‑Ma ɔmɔa ‑ɔ 'ta 'lɛ Laagɔ 'la pɔɔtɛtɛ ‑ka na, ka ɔ ple 'lɛ Laagɔ yodizʋnyɔ, ‑masa ɔ la 'ta ‑danʋfʋɛa Laagɔ li 'lɛ 'nyɩ ɔ nyɩ 'lɛ ɔla 'Cʋa na, ‑nʋawlɛ na. 11'Nyɩ 'lɩka ‑danʋfʋɛa ɔ li 'lɛ na, ɛmɛ ‑ɛ ‑glɩ 'lɛ lebhe Laagɔ ya ‑anyɩ jabhʋa ‑ʋ ‑kʋ 'lɛ 'lʋkʋlʋ ɩya 'lʋkʋlʋkʋ na 'nyɩ, 'nyɩ jabhʋ ‑naa, ɔla 'Cʋa nɩkplaan ʋ ‑kʋ 'lɛ. 12Na, ɔmɔa ‑ɔ ‑ka 'lɛ 'Cʋa na, ɔ ya jabhʋa 'lɩ, ‑ma ɔmɔa ‑ɔ 'ta 'lɛ Laagɔ 'la 'Cʋa ‑ka na, ɔ 'ta 'ka jabhʋa 'lɩ.

Bhɩalɩwɔlɩ

13Ka n zie 'lɛ anyɩ ɩmɩ ‑naa ‑tɛtɛa, ɩya a 'ka cibhlili lebhe anyɩa 'fɩan ‑ɔ ‑ka 'lɛ Laagɔ 'la 'Cʋa 'la 'ŋlɩa 'la pɔɔtɛtɛ na, a ‑ka jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na. 14Na, ‑a ‑kɔɔ ‑deliin ‑kʋ na, ‑delikʋtɛlɔ ‑yelio ‑anyɩ, ‑ofi lebhe ‑a ‑kɔɔ lʋʋ 'clalɩ, 'nyɩ ɩ ‑ka ɔla pɔɔsa ‑glɩ na, ɔ po ‑anyɩ 'nyukwliin. 15'Nyɩ ‑a ‑ci 'lɛ sɛɛ lebhe ɔ po ‑anyɩ 'nyukwliin na, lʋʋa ‑tɛtɛa ‑a cɩ kɔɔ 'lɛ 'clalɩ na, ‑a ‑ci sɛɛ lebhe ‑a ‑kʋʋ.

16Na, gbazɩ nclɔɔ ‑ka ɔ bholi 'lɩ 'nyɩ ɔ ‑ka nyinyi nʋ na, nyinyia ‑ɩ fa 'ta 'lɛ 'kwɩɩn na, 'naa ɔ bhibhie ɩya ɔ 'nyɩɔ ɩya Laagɔ 'kɔɔ jabhʋa 'nyɩ, ɩ ‑ka ‑kʋ lebhe ‑zaagbʋsa nyinyia ɔ nʋ 'lɛ na, 'ɩ fa 'ta 'kwɩɩn na. Sa nyinyi bhlo ‑kʋ, ɩ fa 'kwɩɩn, ‑n 'ta nyinyi ‑naa 'la gbʋ n 'cla 'ta 'lɛ lebhe a bhibhie. 17Nʋnʋgbɩa 'fɩan, ‑ɩ 'ta 'lɛ 'kʋnylugolu na, ɩ ‑glɩ nyinyi. ‑Ma nyinyi ‑tɛtɛa fa 'ta 'kwɩɩn.

18‑A ‑ci sɛɛ lebhe ncaatʋtʋʋntʋa ‑ɔ ‑glɩ 'lɛ Laagɔ 'la 'cʋ na, ɔ nʋ 'tanɩ nyinyi, sa Laagɔ 'la 'Cʋa lɩɔ 'klʋ, 'nyɩ ‑Abhɔlɛnyɔa li 'tɔɔ daan. 19‑A ‑ci sɛɛ lebhe Laagɔ nɩnɩ 'lɛ ‑anyɩ, ‑ma ‑laagɔzɔnbhuoa ‑kʋ ‑Abhɔlɛnyɔa 'la ‑kwleliea ‑zɔn. 20‑A ‑ci sɛɛ lebhe Laagɔ 'la 'Cʋa ya ci, 'nyɩ ɔ ya 'lɛ ‑anyɩ dɩgalɩ 'nyɩ, le ‑a ka ɔmɔa ‑ɔ ‑glɩ 'lɛ 'Titia na cibhlili. 'Nyɩ ‑aya ɔmɔa ‑ɔ ‑glɩ 'lɛ 'Titia na ‑glɩ bhlo, ɔla 'Cʋa, ‑ɔ ‑glɩ 'lɛ Zozi Klisi na nɩkplaan. Ɔmɔ ‑ɔ ‑glɩ 'lɛ 'Titia, ɔmɔ ‑ɔ ‑glɩ 'lɛ Laagɔ ɩya jabhʋa ‑ʋ ‑kʋ 'lɛ 'lʋkʋlʋkʋ ɩya 'lʋkʋlʋkʋ na. 21'Na 'cicʋnyɩ, a 'la gʋgwla ‑zlii.

Currently Selected:

1 Zaan 5: NTLD13

Highlight

Copy

Compare