2 Kolt 8

A 'nyɩnɩ pɔlɛkʋmɛnɔ nɩkplaan

1Bholiecɩnyɩ, ‑a ‑wa lebhe a cibhlili 'nanɩa Laagɔ nʋ 'lɛ Masedʋanɩbhlɩa 'kʋ 'la ‑laagɔnɩkplaa na. 2'Kwlɩ 'kadɩ bhɩa maa 'bhlɩɩ, ma pɔlɛkʋmɛnɩa maa. 'Yalɛa bhlaa maa 'bhlɩ, ‑ma ma ya macɩ 'kʋwlʋ, 'nyɩ ma ya vavalɩɩ ‑bhutukpa ‑sa. 3Saa ma cɩa 'lɛ 'nyɩlɩɛ mino na, ma ya sɛɛ 'nyɩ, 'kʋkpatɔlɩɛ nɩkplaan, 'nyɩ n ‑lio ‑danʋfʋɛ lebhe ma ya 'nyɩ ma ya 'dɛ 'kʋzi. 4Ma ya ‑anyɩ 'clalɩ le 'santiin maa ‑ma, ma 'ka ‑kplɔkplɔnya 'la klalɩlɩɛa ‑ɩ 'ta 'lɛ ncɛlɩa 'fɩan ‑nyɩɔ na, nɩkplaan kʋmʋ. 5‑Bɛɛ ma ya macɩ ‑Kwlenyɔ 'nyɩ, saa ‑a 'ta 'lɛ ‑gblɩ na, 'nyɩ ɩla leen ma ya 'lɛ macɩ ‑anyɩ wlɩɩn zʋ, saa Laagɔ wabha 'lɛ na. 6Na, ‑a ya Titi 'clalɩ lebhe ‑lɩɩvalɩɛ ‑naa 'la lobholia ɔ bhɔlʋa 'lɛ anyɩ 'bhlɩ na, ɔ kui 'wlu. 7‑Masa, ‑tɛtɛa 'fɩan ‑kʋ 'lɛ ɩ ‑nyɩɔ 'lɛ anyɩ na, pɔɔtɛtɛ, wɔɔnyɩtʋ 'la ‑nɛnɛ, wɔɔcibhlilie, ‑nwɔviliea ‑tɛtɛa ɩya ‑walʋa -a ca 'lɛ ‑anyɩ na, anyɩ ‑masɛɛ a 'wlʋnɩ acɩ 'kʋ ɩya a 'nyɩmʋ ɩmɩ ‑naa nɩkplaan.

8‑N 'ta ka n kpɛ 'ta 'lɛ anyɩ 'kʋ. ‑Ma n ‑ka a 'yea 'la ‑nwɔviliea 'la wɔlɩ nyɩtɛ na, ka n ‑wa 'lɛ lebhe a pala lebhe ala ‑walʋa ‑glɩ ‑nʋawlɛ. 9Sa, a ‑ci ‑ala ‑Kwlenyɔ Zozi Klisi 'la dananɔa na. Nyɩbhɛlʋa ‑ɔ ‑glɩa 'lɛ na, ɔ ya ɔcɩ ŋaazɩnyɔ ple anyɩ ala gbʋ, ɩya ɔla ŋaazɩa 'ka anyɩ nyɩbhɛlɩ ple.

10Wɔlɩ n falɩ 'lɛ anyɩ pɔlɛ cɩ. Anyɩa ‑ɔ ‑glɩ 'lɛ ‑bɛka ncɛlɩa ‑ɔ bhɔ 'lɛ lobholi ‑naa, 'yɛpɩ 'dɛ 'la lioa nɩkplaan tooto na, 'nyɩ ‑n 'ta le a 'kɩɩ bhɔ bhlobhlo, ‑ma anyɩ 'titi ‑ɔ zʋɩ 'lɛ kpo 'kʋ. 11Na, a bhɩalɩnɩɩ 'kplookʋ. ‑Sa ala lobholi 'nanɩa 'la 'kʋglalɩlɩɛa -ɩ -cɩ ka 'lɛ pala lebhe a ya wabha lebhe a cɩɩ nʋ, ala saa a cɩ 'lɛ mino ɩla nʋlɩɛ nɩkplaan. 12Gbazɩ lʋʋa ‑n ‑wa 'lɛ lebhe ‑n ka nʋ, ʋ ka nanɩ na, ma 'manɩ lʋʋa ‑n nyɩ 'lɛ na, pɔlɛkʋmɛnɔɔn 'nyɩ lʋʋ ‑n 'ta 'lɛ ‑ka na, ma 'clalɩ 'tɔɔ mʋ. 13‑N 'ta le a 'ka acɩ ‑mieliin zʋ a 'ye 'la klalɩlɩɛ 'la gbʋ, ‑ma anyɩa 'fɩan 'ka kalɩlɩɛɛn 'wlʋlʋ. 14Ɩmɩa a ‑ka 'lɛ pɔtɔnʋ 'nyɩ ‑ɩ 'mɩanɩ 'lɛ 'kʋ na, ɩ cɩ 'ka gba ɩya ma 'ka ɩmɩa ma ‑mie 'lɛ na 'lɩ, ɩya clɩɩ bhlo, ɩmɩa ma cɩ 'ka 'lɛ kalɩ ɩya ‑ɩ ka 'kʋmɩanɩ na, 'ka gba ɩya a 'ka ɩmɩa a ‑mie 'lɛ na, 'lɩ. 'Lɩka ‑sa anyɩa 'fɩan cɩ 'ka 'lɛ kalɩlɩɛɛn 'wlʋlʋ. 15Saa ɩ ‑zieo 'lɛ lebhe: «Ɔmɔa ‑ɔ 'bhli 'lɛ ‑gbɔɔn 'kʋ na, ɔ 'ta 'lɩ, ɔ 'ka 'kʋmɩanɩ. ‑Ma ɔmɔa ‑ɔ 'bhlɩ 'lɛ 'pɛ kʋ na, ɔ 'taa lʋʋ bhlogbɩɩ ‑mie.»

16Bhɔlʋɛ ŋeni Laagɔ saa ɔ ya 'lɛ ‑nwɔvilie ‑naa ‑a ‑ka 'lɛ ala gbʋ na, ɛmɛ ‑sakasaka Titi pɔlɛɛn zʋ na. 17Titi ya ɩmɩa ‑a 'clalɩɔ 'lɛ na ŋonu 'nyɩ 'faanfan ɔ ya 'lɛ 'kʋkpatɔ 'nyɩ ɔ ya 'lɛ anyɩ 'bhlɩ mʋ. 18‑A yɔɔ ‑a bholia ‑laagɔnɩkplaa 'fɩan nyɩtɛ 'lɛ ɔla wɔɔnanɩ, Dɩnanɩa* 'la ‑salɩɛa 'la gbʋ na 'kʋgbɛ. 19‑N 'ta ɩmɩ ‑naa bhlobhlo 'la gbʋʋ, ‑ma ka ‑laagɔnɩkplaa 'fɩan slɔɔ 'lɛ de le ɔ 'plɩ ‑ala 'namʋnyɔ -lɩɩvalɩɛa 'la lobholi ‑naa 'la ‑gugwie a bhli 'lɛ ‑Kwlenyɔa 'titi 'la 'klʋagbaa 'la gbʋ na ɩya ɩ 'ka ‑anyɩ 'titi ‑ala wɔɔnanɩa ‑a ‑wa 'lɛ lebhe ‑a ka nʋ na 'kʋglalɩ. 20‑A zʋlʋ pɔlɛ 'kʋ le ncɛlɩ 'la 'ka sɛ ‑anyɩ ‑glaan kalɩ, 'dala ‑bhutukpaa ‑a 'lɩ 'lɛ 'klʋ na 'la gbʋ. 21Ɩmɩa ‑ɩ nanɩ 'lɛ na, ɩmɩ ‑a 'matɩ 'lɛ lebhe ‑a 'ka nʋ, ‑n ta Laagɔ bhlo 'ci 'kʋ, ‑ma ncɛlɩ ‑masɛ 'ci 'kʋ. 22‑A bholia ɔya ncɛlɩa a ‑sa 'lɛ na, ma ‑a lobhu 'lɛ. ‑A claa ‑azlɔɔ nɩkplaan le ‑a ka ɔla ‑nwɔviliea 'lɩ 'nyɩ ‑pɔtɔnʋ 'titio ɔ pala ka kɩɩ ‑anyɩ, sa ɔ ‑ka ala pɔɔtɛtɛ na. 23Titi ‑glɩ 'na 'namʋnyɔ 'nyɩ n ‑yɔɔsɔ nʋ 'lɛ lobholia anyɩ 'bhlɩ. ‑A bholiecɩa, ‑laagɔnɩkplaa ‑sa 'lɛ maa, Klisi 'la 'klʋagbaa 'la gbʋ. 24Na, a pala maa, ‑laagɔnɩkplaa 'la 'klʋʋn lebhe a ‑wa maa ɩya ma 'ka cibhlili lebhe ‑n 'ta 'kpɔkpɔsa ‑a kpolili 'ta 'lɛ anyɩ nɩkplaan, maa 'ci 'kʋ.

Currently Selected:

2 Kolt 8: NTLD13

Highlight

Copy

Compare