2 Kolt 7

1'Na ‑wawabholiecɩnyɩ, ‑ndanyɩ ‑naa ‑glɩ 'lɛ a 'nɩ na, ‑a ‑sa ‑acɩ 'nyɛkɛa ɩya 'wugoa 'la 'zɩa* ‑tɛtɛa cɩ ɩya a ‑glalɩ ala ‑kplɔlɩɛa 'la nʋnʋgbɩa 'kʋ, Laagɔ 'la 'gululɩɛ nɩkplaan.

Pɔlɛ 'kʋ mɛnɩ Pɔlʋ

2A 'nyɩ ‑anyɩ ala pɔlɩa nɩkplaan sakʋda. ‑A 'ta ka nclɔɔ bhlogbɩɩ 'la ‑ngasi tʋ, ‑a 'ta ka nclɔɔ bhlogbɩɩ wuya, 'nyɩ ‑a 'ta ka nclɔɔ bhlogbɩɩ ‑dufle li. 3'N nyɩtɛ 'ta ‑sa le ma 'ka anyɩ 'gesalɩ, sa n ya sɛɛ tooto 'kʋbhli lebhe: 'Kwɩ ‑aana jabhʋ nɩkplaan, a ‑kʋ ‑ala pɔlɩa nɩkplaan. 4‑Delɩkʋtɛlɔa n ‑ka 'lɛ ala gbazɔ na, ʋ 'ghli, n kpolili anyɩ nɩkplaan ‑gbɔɔn, 'nyɩ ‑ala 'kwlɩbhɩɛa 'fɩan sidiin, a zʋʋn pɔlɛɛn 'nyɩ pɔlɛkʋmɛnɔ ‑yelioon.

5‑Masa, ‑a ŋeni 'lɛ Masedʋanɩbhlɩa 'kʋ na, ‑a 'ta nyɔkwɛda 'lɩ, 'nyɩ 'kwlɩ ‑mizimizi ya 'lɛ ‑anyɩ bhɩalɩɛ bhɔ. ‑A vʋ 'tata kʋ 'nyɩ pɔɔvʋ ‑kʋ ‑anyɩ nɩkplaan. 6‑Ma Laagɔ ɔmɔa ‑ɔ zʋ 'lɛ maa ‑ɔ la 'lɛ macɩ ‑dʋdʋ 'kʋ na, pɔlɛɛn na, ɔ ya Titi 'la ciliea 'kʋplɩlɩ 'nyɩ ɔ ya ‑anyɩ pɔlɛɛn zʋ, 7‑n 'ta ɔla ciliea bhloo, ‑ma pɔlɛɛnzʋlɩɛa ɔ 'lɩlɩ 'lɛ ‑anyɩ wlɩɩn na. Ɔ ya ‑anyɩ 'na 'tʋa ‑ʋ bhla 'lɛ anyɩ na, ala 'mɩɔa ɩya ‑nwɔa a vi 'lɛ 'na gbʋ na, ɩla wɔlɩa 'dɩkʋsalɩ. Ɩ ya gba na, 'na pɔlɛkʋmɛnɔa ya ‑awlɛ 'ghlibholi.

8‑Ghɛɛ, ka ɩ ‑ka ‑kʋ lebhe 'naa ‑afluwaa n zie 'lɛ anyɩ na ‑ka anyɩ cɩɩnkalɔɔn zʋ na, 'dɛ -naanɩa kalɩ 'taan cɩɩn. 'Nyɩ ka ɩ ‑ka ‑kʋ lebhe ɩ yaan cɩɩn kabha na, n ya 'lɩ le ‑afluwaa ‑naa ya anyɩ 'pɛpɛ cɩɩnkalɔɔn zʋ, ɩla gbʋ. 9‑Ma ‑pɔtɔnʋ n ‑kʋnɩ pɔlɛkʋmɛnɔɔn, ‑n 'ta ala 'cɩɩnkalɔa 'la gbʋʋ, ‑ma kwlacalalɩɛa 'cɩɩnkalɔ ‑naa lamʋ 'lɛ na, ɩla gbʋ. Sa ala cɩɩnkalɔa ‑glɩ Laagɔ 'la pɔɔsaa 'la nʋlɩɛ. Na, ‑ɔ ‑glɩ 'lɛ ‑anyɩ na, ‑a 'ta ka anyɩ ‑abhɔlɛ nʋ. 10Sa cɩɩnkalɔa ‑ʋ ‑glɩ 'lɛ Laagɔ 'la pɔɔsa na, ʋ nyɩ kwlacalalɩɛa ‑ɩ lamʋ 'lɛ gbʋʋnsalɩɛ na, 'nyɩ ʋ ‑glɩ cɩɩnkalɔ 'nanʋ. ‑Ma cɩɩnkalɔa ‑ʋ ‑glɩ 'lɛ ‑laagɔzɔan 'nʋa na, 'kwɩ ʋ lamʋ 'lɛ. 11A kopeka ɩmɩa cɩɩnkalɔa ‑ʋ ‑glɩ 'lɛ Laagɔ 'la pɔɔsa na ‑lalɩ 'lɛ anyɩ na. ‑Ghɛɛ, ncaasaa ‑ɔ 'ta 'lɛ ala 'kʋkpatɔlɩɛa ci bha! 'Lɩsaa a nʋ 'taa 'lɛ ɩya a 'ka acɩ gbʋ 'wlʋ sa bha! 'Nyɛkɛa ‑anɛsaa ‑ɛ 'ta 'lɛ anyɩ cɩ 'kɔtɔlʋ bha! Pɔɔvʋa ‑anʋsaa ‑ʋ 'bhla 'taa 'lɛ anyɩ bha! 'Na 'tʋa ‑anʋsaa ‑ʋ 'ta 'lɛ anyɩ 'bhla bha! ‑Nwɔviliea ‑anɩsaa a 'ta 'lɛ ‑ka bha! Gbaylɩa ‑anɩsaa ma 'taa 'lɛ anyɩ ‑sa bha! ‑Ma, ‑tɛtɛa 'fɩan nɩkplaan, a ya pala lebhe a 'ta gbʋ ‑naa 'la 'wlu ‑ci. 12‑Ma ‑a kolui ‑da 'wlu, n ‑ka anyɩ zie na, ‑n 'ta ɔmɔa ‑ɔ tʋ 'lɛ ɔ 'yʋ 'la ‑ngasi, ‑aana ɔmɔa ɔ 'yʋ tʋ 'lɛ ɔla ‑ngasi na 'la gbʋʋ. ‑Ma, n 'ka anyɩ 'cɩ 'kʋ ɩya Laagɔ ‑deliin, ala ‑nwɔvilɩɛa a ‑ka 'lɛ ‑ala gbʋ na pala.

13'Lɩka ɩmɩa ‑ɩ zʋ 'lɛ ‑anyɩ pɔlɛɛn na. Titi ya anyɩ 'bhlɩ pɔlɛɛnzʋlɩɛ 'kadie 'lɩlɩ 'nyɩ ɩ yɔɔ pɔlɛkʋmɛnɔ nʋ. Na, ɔla pɔlɛkʋmɛnɔa ya ‑anyɩ 'titi ‑ala pɔlɛɛnzʋlɩɛa 'nʋa 'kʋ ‑gbɛ 'nyɩ ‑ala pɔlɛkʋmɛnɔa ya 'lɛ 'ghlibholi. 14Sa, ka n ‑ka anyɩ ‑bliin 'palɩ ɔmɔ 'ci 'kʋ na, n 'tɩɩ ‑zo nɩkplaan 'lɩlɩ. ‑Ma saa ‑tɛɛ ‑a solu 'lɛ anyɩ ‑nʋawlɛ clɩɩa 'fɩan na, 'sɛtɛɛ bhlogbɩɩ ‑bliia ‑a 'palɩ 'lɛ anyɩ nɩkplaan Titi 'ci 'kʋ na pala 'lɛ lebhe ɩ ‑gɩlɩɔa 'ciin. 15Ɔ ‑ka saa a klaklalɩɔ 'lɛ zʋlɩɛɛn ɩya cɩtɩtɛlɩlɩɛɛn na luoli na, ka ‑tɛɛ ala ‑walʋa ‑ʋ ‑kʋɔ 'lɛ pɔlɛɛn na zʋlʋzʋlʋ 'lɛ 'kʋ. 16Na, pɔlɛ 'kʋ mɛnɩɩn ‑gbɔɔn le saa 'fɩan nɩkplaan, n cɩ mino n cɩ ala pɔɔtɛtɛ kalɩ.

Currently Selected:

2 Kolt 7: NTLD13

Highlight

Copy

Compare