2 Kolt 11

Pɔlʋ ŋonu yooyo -lobhulobhunya neen

1'Ayɩ! Ɩ ‑kaa ‑kʋ lebhe a cɩa 'na pɔɔbhlagbɩa 'pɛpɛ 'kʋ ŋonu na. ‑Ghɛɛ, n ‑wa lebhe a ŋonui 'kʋ! 2N pla ala woze saa Laagɔ pla 'lɛ -ala woze na. N ya anyɩ 'cɩcɩɛnʋyɔ bhlogbɩɩ 'nyɩ le n 'ka anyɩ ŋlʋgbɩɔdea ‑ɔ ‑kplɔ 'lɛ na 'bhisa Klisi pala. 3‑Ma ŋanɔ bhlaan le saa tlɛa 'ma 'lɛ ‑kplakpla 'nyɩ ɛ 'nyiglili 'lɛ Ɛvʋ na, 'wluun 'la 'ka anyɩ nyumo ɩya a 'la ka ala ‑nʋawlɛdelikʋtɛlɔa Klisi gba 'lɛ 'nyɩ a 'lɩ 'lɩ 'lɛ na cɩ da tlʋbhalɩ. 4Sa, gbazɩ ncaatʋtʋʋntʋ ‑ka ci 'nyɩ ɔ ‑ka anyɩ ‑buun Zozii plici, ‑ɔ 'ta 'lɛ ɔmɔa ‑a plici 'lɛ anyɩ na ‑glɩ na, ‑aana gbazɩ a ‑ka 'wugoa ‑ʋya ʋmʋa a 'lɩ 'lɛ na 'ta 'lɛ bhlo ‑glɩ na 'ma na, 'nyɩ a ‑ka ‑buun Dɩnanɩa* ‑ɩ 'ta 'lɛ ɩmɩa ‑a ca 'lɛ anyɩ na ‑glɩ na neeŋonu na, ka a wɩɩ 'lɛ.

5'Bhlɩmɔɔn, n gugu lebhe lobhulobhunya* 'kadɩ ‑naa, bhlogbɩɩ 'taan 'kʋzi. 6N 'ta sɛɛ neenkplɔlʋ 'bhlɩ. ‑Ma ‑ɔ ‑glɩ 'lɛ wɔɔcibhliliɛ 'la gbazɔa na, n ‑ci wɔlɩ. Sa lɩɩa ‑tɛtɛa ɩya saa 'fɩan nɩkplaan, ‑a yɩɩ anyɩ pala. 7Daa n ‑kʋa 'lɛ anyɩ Laagɔ 'la Dɩnanɩa ‑sada 'kpɔkpɔ na, n -ka ncɩ ‑dʋdʋ 'kʋ ‑la le anyɩ a 'ka 'kʋto na, ɩ ‑glɩ nyinyi bha? 8N ya ‑buun Laagɔpalɩ wuya, sa n yɩɩ lɩɩ 'clalɩ le n 'ka sɛɛ anyɩ lobho. 9'Nyɩ daa n ‑kʋa 'lɛ anyɩ 'bhlɩ 'nyɩ 'kɔtɛtɩ mɛɛn 'lɛ cɩ na, n 'taa nclɔɔ bhlogbɩɩ lʋʋ wlɩɩn 'matɩlɩ. Bholiecɩa ‑ɔ 'wlʋlʋ 'lɛ Masedʋanɩbhlɩa 'kʋ na, maa ‑ɔ 'nyɩɩn 'lɛ ɩmɩa ‑tɛtɛa n ‑miea 'lɛ na. Lɩɩa 'fɩan nɩkplaan, n ya ncɩ 'kʋ kla le n 'la ka anyɩ kʋlʋ 'nyɩ n cɩ ka ka ‑awlɛ ncɩ 'kʋ kla. 10N talɩ Klisi 'la ‑nʋawlɛa ‑ɛ ‑kʋʋn 'lɛ nɩkplaan na 'kʋ 'nyɩ n 'cla lebhe Akayiibhlɩa 'kʋ, nclɔɔ bhlogbɩɩ cɩ 'taan 'ŋlɩ ‑naa cɩ ‑sa. 11'Nyɩ 'lɩsaa 'la gbʋ bha? Ka n 'ta 'lɛ anyɩ ‑wa bha? Laagɔ 'titi ‑ci sɛɛ lebhe n ‑wa anyɩ.

12'Nyɩ ɩmɩa n nʋ 'lɛ na, n cɩ 'ka kɩɩ nʋ ‑tɛɛ ɩya maa ‑ɔ 'matɩ 'lɛ lebhe ma 'ka ‑bliipa lebhe ‑aya maasɔ 'wlʋlʋ na, ma 'la kanɩ 'plɩlɩda ‑ylɛylɛ 'lɩ. 13'Dɛ 'la ncɛlɩ ‑naa ‑glɩ yooyo -lobhulobhunya, ‑kplakplanyaa ‑ɔ nʋ 'lɛ le saa ma ‑glɩ 'lɛ Klisi 'la lobhulobhunya 'titi na. 14Ɩmɩ ‑naa ‑sla 'ta nikpoo, sa Sataan* 'titi kacili ɔcɩ zezezeli 'la 'bhlaandlee* nɩkplaan. 15Na, ɔla lobhocuoa 'ka 'lɛ macɩ 'kʋnylugolulɩɛ 'la lobhocuo nɩkplaan kacili na, ɩ 'ta mala da 'tɛ. ‑Ma ka mala bhɩalɩdaa cɩ 'ka 'lɛ kʋ le mala nʋnʋgbɩa 'bhisa.

Pɔlʋ nyɩtɛ ɔla 'kwlɩbhɩɛa 'la cɩa wɔlɩ

16N cla ‑awlɛ lebhe, nclɔɔ bhlogbɩɩ 'la gugua lebhe pɔlɛ bhlaan 'lɛ, ‑aana a ‑ka ‑wa na, a 'maan le pɔɔbhlanyɔ ɩya n 'ka mino ‑amʋ ‑masɛ n 'ka ‑bliipamʋ 'pɛpɛ. 17Ɩmɩa n cɩ 'ka 'lɛ nyɩtɛ na, ‑n 'ta ‑Kwlenyɔa 'la 'ŋlɩa nɩkplaan n nyɩtɛlɩ 'tɩɩ 'lɛ, ‑ma pɔɔbhlanyɔ 'bhisa, sa n 'tɛlɩ ncɩ ‑deli 'kʋ lebhe n 'ka lɩɩa n ci 'lɛ ‑blii nɩkplaan 'palɩ na. 18Sa ‑bhutukpa 'palɩ 'lɛ maa 'titi mala nʋnʋgbɩa ‑blii nɩkplaan na, ‑amʋ ‑masɛ n cɩ 'ka ‑blii 'pamʋ. 19A ŋonu ‑sa ‑badaaglunya neen, anyɩa ‑ɔ ‑glɩ 'lɛ dɩgalɩnya na. 20A ŋonu lebhe ma zʋ anyɩ geyliin, ma li anyɩ ‑dufle, ma wuya anyɩ, ma lili anyɩ ‑tutule 'wlu, ma 'sɛpɛ anyɩ 'ciin. 21Ɩmɩa n nyɩtɛ 'lɛ na, ɩ ‑glɩ ‑ala ‑zo, saa 'titia ‑a ya 'lɛ babha na.

Ɩmɩa ‑anʋa pa 'lɛ ‑blii 'nyɩ ma nyɩtɛ 'lɛ na, pɔɔbhlanyɔ 'bhisa 'kʋ n nyɩtɛ 'lɛ, ‑amʋ ‑masɛ n pa ‑blii 'nyɩ n nyɩtɩɩ. 22Ma ‑glɩ Ebleenya bha? ‑Amʋ ‑masɛ. Izlayɛlɩnya* bha? ‑Amʋ ‑masɛɛ. Ablaamʋ 'la valɩnɩkplaa 'la ncɛlɩ bha? ‑Amʋ ‑masɛɛ. 23Ma ‑glɩ Klisi 'la lobhocuo bha? N 'ka pɔɔbhlawɔlɩ nyɩtɛ, n ‑glɩɔ 'nyɩ n zi maa 'kʋ! Sɛsʋ nɩkplaan, n zi ‑awlɛ maa ‑gbɔɔn 'kʋ, ‑palʋʋnpalɩɛ nɩkplaan, n zi ‑awlɛ maa 'kʋ, bhutilɩɛ nɩkplaan, n 'plɩ maa cɩ 'koonko, 'kwɩ neen, n zi maa 'kʋ dɩ ‑gbɔɔn. 24Zifʋnyaa* 'la ‑glʋʋ ɩya 'kʋgba ‑nvɔɔna 'la 'sɛpɛlɩɛ, ma yaan mɩ dɩ ‑ngbi cɩ nʋnʋ. 25Dɩ ‑mɔta, ma yaan ‑ngblieen bhutili, dɩ bhlo ma yaan cɔkʋ vʋ, Dɩ ‑mɔta gɔlʋ yaan gblo. N ya zezezeli ɩya bhlibhliylʋ ‑totobhuo 'nyukoongluu li.

26Klɛɛklɛɛ 'la ‑dʋdʋgugwiebhlilɩɛ,

'kwɩ neen 'nyidɔlɩa 'kʋtaan,

'kwɩ neen ncaabhlanya sidiin,

'kwɩ neen, amʋ 'titi n bholiecɩa sidiin,

'kwɩ neen, ncɛlɩa ‑ɔ 'ta 'lɛ Laagɔ ‑ci na sidiin,

'kwɩ neen, dikadɩ nɩkplaan,

'kwɩ neen 'pʋpʋa nɩkplaan,

'kwɩ neen ge 'kʋtaan,

'kwɩ neen yooyo ‑bholiecɩa sidiin.

27Sɛsʋ ɩya 'kwlɩbhɩɛ ɩya ‑daanda, ‑zelibhlalɩɛ. Ŋɔmʋ ɩya 'nyutʋ, ɩya ‑daanda, ‑zelizlolɩɛ, wɔtlɩ ɩya ‑abaankʋlɩɛ. 28'N zɛlɩmʋ 'ta ‑da -naanɩa ‑tɛtɛa, sa pɔɔvʋa ‑ʋ bhlaan 'lɛ clɩɩa 'fɩan na, ʋmʋ ‑ʋ ‑glɩ 'lɛ pɔlɛa n ple 'lɛ, ‑laagɔnɩkplaa 'fɩan 'la gbʋ na. 29Ncaasaa 'nyɛkɛ kaa 'lɛ cɔbha, 'nyɩ ‑amʋ ‑ma 'nyɛkɛ cɔbha 'taan 'lɛ bha? Ncaasaa ‑ɔ ‑ka 'lɛ bhli 'nyɩ ɩ kabha 'taan 'lɛ cɩɩn bha?

30Ɩ ‑ka ‑kʋ lebhe ma 'ka ‑blii 'pa na, ‑amʋ n cɩ 'na ‑bliipalɩɛa 'na 'nyɛkɛcɔbhalɩa nɩkplaan zɛlɩmʋ. 31Laagɔ, ‑ɔ ‑glɩ 'lɛ ‑Kwlenyɔ Zozii To na 'nyɩ ma wo 'lɛ ‑evli 'lʋkʋlʋkʋ ɩya 'lʋkʋlʋkʋ na, ɔ ‑ci sɛɛ lebhe n zʋ 'ta yodi. 32Daa n ‑kʋa 'lɛ Damasɩdua 'kʋ na, nyɩbhɛlʋ Aletasɩ 'la goonvlaa yaa gba 'nyɩ ma ya 'dua ‑bɛ le ma 'ka ‑amʋa 'kʋ bhli. 33‑Ma ma yaan ‑tokuo nɩkplaan zʋ, ma yaan kofoon pleli, ma yaan 'dua 'la glɔa kwlili 'nyɩ n yɔɔ 'lɛ wlɩɩn 'wlʋ.

Currently Selected:

2 Kolt 11: NTLD13

Highlight

Copy

Compare