2 Kolt 10
10
Pɔlʋ ŋonu ɔla gbatlɩmʋnʋyaa neen
1‑Amʋ Pɔlʋ 'titi, ‑ɔ ‑ka 'lɛ anyɩ sidiin ‑kʋ, 'klʋʋn ɩya 'klʋʋn, 'nyɩ ‑ɔ la 'lɛ ɔcɩ ‑dʋdʋ 'kʋ, ‑ma ‑ɔ nʋ 'lɛ kplaankplaan, daa ɔ tlʋbhalɩ 'lɛ anyɩ cɩ da na, ‑amʋ ‑ɔ 'clalɩ 'lɛ anyɩ ɩmɩ ‑naa Klisi 'la pɔɔwɔtɛa ɩya ɔla ‑danaanɔa nɩkplaan. 2N sla anyɩ 'wlu le a nʋ saa 'fɩan ɩya n ‑ka anyɩ 'bhlɩ ci na, n 'la ka kplaankplaannʋlɩɛ ‑naa n ‑wa 'lɛ lebhe n 'ka 'ma ɩya n 'ka maa ‑ɔ cla 'lɛ lebhe ‑anyɩ 'titi ‑ala gbʋ ‑a nʋ 'lɛ ɩmɩ ‑naa ‑tɛtɛa na, gbatlɩmʋnʋ na, n 'la kɩɩ 'ma. 3‑A ‑glɩ ncɛlɩ 'bhlɩ, ‑ma ‑n 'ta ncɛlɩ 'bhisa 'kʋ, a vʋ 'ta 'lɛ. 4‑Ghɛɛ, ‑ala tavʋlɩɩa 'ta ncɛlɩ 'la nʋnʋ -naanɩ ‑glɩ, ‑ma ɩla 'tɛtɩa 'wlʋlʋ Laagɔ wlɩɩn le ɩ 'ka 'tɛtɩa ‑tɛtɛa ‑ɩ mʋnʋɔ 'lɛ gbatlɩ na gbɔlʋ. ‑A ‑ka yooyo -wɔɔgugwiea ‑tɛtɛa 5ɩya 'tɛtɩa ‑tɛtɛa ‑ɩ ‑sɩalɔ 'lɛ Laagɔ 'la cibhlililiea 'ci 'kʋ ‑tutuleesa na, 'dɛ ‑sa. -A 'nylugolu wɔɔgugwie ‑tɛtɛa 'kʋ le ‑a ka gba ɩya ɛ 'ka Klisi 'la zʋlɩɛ kalɩ. 6'Nyɩ ‑a ‑bhɔsʋa le daa ala zʋlɩɛa cɩ 'ka 'lɛ 'kʋglalɩ na, ‑a ‑ka maa ‑ɔ cɩ 'ta 'lɛ zʋlɩɛ kalɩ na, gbaylɩsa.
7Saa wɔlɩa ‑kʋ 'lɛ na, a kopɩɩ sɛɛ. Gbazɩ nclɔɔ ‑ka sɛɛ ‑ci lebhe ɔ ‑glɩ Klisi 'nɔ na, 'naa ɔ cibhlili sɛɛ 'kplookʋ lebhe: Saa ɔ ‑glɩ 'lɛ Klisi nɔ na, sɛɛ ‑anyɩ ‑masɛ ‑a ‑glɩ 'lɛ Klisi 'nʋa. 8Nyɩ 'tɛtɩa ‑Kwlenyɔ 'nyɩ 'lɛ ‑anyɩ le ala pɔɔtɛtɛa ‑ka 'kʋzʋlʋ ‑ma ɛ 'la 'ka mlɔ na, ka ‑a ‑ka 'tɛtɩ ‑naa ‑bliin 'palɩ 'titio na, ɩ 'ta ‑anyɩ ‑zo ‑ka. 9'Na gbɩa 'la kʋa anyɩ 'ciin le saa n ‑wa 'lɛ lebhe n 'ka 'na ‑afluwia n zie 'lɛ anyɩ na 'kʋ 'plɩlɩ ɩya n 'ka anyɩ pɔlɛɛn ‑sa na. 10Sa ma cla lebhe 'na zieziefluwia nyɩtɛ 'kʋwɔlɔwɔlɔwɔlɩ ɩya wɔɔtɛtɩ. ‑Ma n ‑ka anyɩ sidiin ‑kʋ na, n cɔbha 'nyɩ 'na wɔɔnyɩtʋ 'ta lʋʋ ‑ylɛylɛ ‑glɩ. 11'Naa 'dɛ 'la nclɔɔa cibhlili sɛɛ lebhe: Saa ‑ala wɔɔnyɩtʋa ‑kʋ 'lɛ ‑ala ‑afluwia nɩkplaan, daa a tlʋ 'lɛ anyɩ cɩ da na, sɛɛ ‑tɛɛ bhlogbɩɩ ala nʋnʋgbɩa cɩ 'ka 'lɛ kʋ, daa ‑a ‑cɩ ka 'lɛ anyɩ sidiin kʋ na. 12Sa, ‑a ‑to 'ta acɩ 'kʋ le ‑aya ncɛlɩa ‑anʋaa ‑ɔ cili 'lɛ maa 'titi mala 'ŋlɩa nɩkplaan na, 'ka 'wlʋlʋ ‑aana ‑aya maasɔ 'ka ‑bɩɔbɩɔlʋ. Ma ma macɩ le ncɛlɩa ɩ nanɩ lebhe ma dɩbalɩ na. 'Wluun ya maa nyumo. 13‑Ma ‑anyɩ, ‑a cɩ 'ta ‑blii 'pa ɩya ‑a ka cɩplɩ. ‑Ma ɩmɩa Laagɔ zʋ 'lɛ kpo 'kʋ 'nyɩ ɩ ya 'lɛ gba 'nyɩ ‑a ya 'lɛ anyɩ 'bhlɩ ŋeni na, ɩmɩ ‑a cɩ ka 'lɛ 'kʋplɩlɩ. 14Sa, ‑anyɩ ‑a 'dɩ 'ta ‑ala ‑bɔlɔ 'bɩɩn, dɛ ‑a ya 'lɛ anyɩ 'bhlɩ ci. 'Nyɩ ‑zaagbʋsa ‑anyɩ ‑ɔya Klisi 'la Dɩnanɩa* ŋenini 'lɛ anyɩ 'bhlɩ ‑bɛɛ. 15‑Anyɩ, ‑a 'ma 'ta ‑a 'yʋ 'la lobholi ɩya ‑a ka ‑blii 'pa ‑a ka 'kʋ 'mɩanɩ, ‑ma ‑a 'tɛlɩ ‑deli 'kʋ lebhe ala pɔɔtɛtɛa cɩ 'ka 'kʋzʋlʋ ɩya ɩmɩa ‑a zʋ 'lɛ kpo kʋ na, ɩla 'kʋplɩlɩɛa nɩkplaan, 16-a 'ka ‑a 'bhlɩ 'la ‑bɔlɔa 'bɩɩn 'dɩ, Dɩnanɩa 'la ‑salobholia nɩkplaan. ‑N 'ta le a 'ka lobholia a 'ye ya 'lɛ tooto nʋ na ‑bliin 'palɩ.
17'Naa ɔmɔa ‑ɔ pa 'lɛ blii na, ɔ 'palɩ ‑kwlɛnyɔ ‑blii nɩkplaan. 18Na, ɔmɔa ɔmɔ 'titi sa 'lɛ ɔcɩ na, ‑ɔ 'ta 'ŋlɩ ‑ka, ‑ma ɔmɔa ‑Kwlenyɔa ‑sa 'lɛ na.
Currently Selected:
2 Kolt 10: NTLD13
Highlight
Copy
Compare
Share
Want to have your highlights saved across all your devices? Sign up or sign in
Dida New Testament © Bible Society of Côte d'Ivoire, 2013.
