1 Kolt 13

‑Walʋ zi ‑tɛtɛa 'fɩan 'kʋ

1N cɩ 'bhlɩwɔlɩa ma 'nu 'ta 'lɛ ɩla ‑zɔn na nyɩtɛ, ncɛlɩ 'nɩ ɩya 'bhlaandleecɩ* 'nɩ, ‑ma ɩ ‑ka ‑kʋ lebhe n 'ta ‑walʋ ‑ka na, 'na gbɩa ‑kʋ le letiea ‑ɛ gba 'lɛ na, janjaan ‑a gba 'lɛ na 'bhisa. 2N cɩ ‑laagɔnekʋnyɩtɛtɛtɩ kalɩ, n cɩ zizieziziewɔlɩa ‑tɛtɛa ɩya wɔlɩa ‑tɛtɛa cibhlili. N cɩ pɔɔtɛtɛa ‑tɛtɛa kalɩ, ɛmɛa ‑ɛ sa 'lɛ 'kiki ‑da 'kʋ na, ‑ma ɩ ‑ka ‑kʋ lebhe n 'ta ‑walʋ ‑ka na, n 'ta lʋʋ ‑ylɛylɛ ‑glɩ. 3N cɩ 'na 'nanɩa ‑tɛtɛa ŋɔmʋbhlabhlanya poli, n cɩ 'na 'nyɛkɛa ‑kosu va, ‑ma ɩ ‑ka ‑kʋ lebhe n 'ta ‑walʋ ‑ka na, 'n cɩ 'tɩɩ lʋʋ ‑ylɛylɛ nɩkplaan 'lɩlɩ.

4‑Walʋ kla pɔlɛ, ‑walʋ klalɩ, 'ʋ ‑pla 'ta woze, 'ʋ ‑to 'ta ʋcɩ 'kʋ, 'ʋ li 'ta ‑tutule, 5'ʋ nʋ 'ta wɔɔnyinyi ‑ylɛylɛ, 'ʋ 'ta nyuno ‑ka, 'ʋ 'ma 'ta dɔbgɛ, 'ʋ zʋ 'ta wɔlɩ nɩkplaan, 6'ʋ nʋ 'ta ɩmɩa ‑ɩ 'ta 'lɛ 'kʋnylugolu na 'la ‑pɔpʋɛ, ‑ma ‑nʋawlɛ nɩkplaan ʋ 'lɩlɩ 'lɛ ʋla pɔlɛkʋmɛnɔ. 7Ʋ va wɔlɩa ‑tɛtɛa. Saa 'fɩan ɩ cɩ 'lɛ kʋkʋlʋ na, ʋ ‑ka pɔɔtɛtɛ, ʋ 'tɛlɩ ‑tɛtɛa 'fɩan pɔlɛ 'kʋ, ʋ ŋonu wɔlɩa ‑tɛtɛa 'kʋ.

8‑Walʋ 'ta bhɩada ‑ka. ‑Laagɔnekʋnyɩtɛlɩɛa cɩ 'kaan do. 'Bhlɩ 'bhlɩ 'kʋ 'la wɔlɩa 'la nyɩtɛlɩɛa cɩ 'ka bhɩa. Wɔɔcibhliliea cɩ 'kaan do. 9‑Masa ‑ala wɔɔcibhliliea ‑ka bhloluda, 'nyɩ ‑ala ‑laagɔnekʋnyɩtɛlɩɛa ‑ma ‑ka 'lɛ bhloluda na. 10‑Ma daa ɩmɩa ‑ɩ ‑glalɩɔ 'lɛ 'kʋ na, ɩ cɩ 'ka 'lɛ ci na, ɩmɩa ‑ɩ 'ta 'lɛ 'kʋ ‑glalɩɔ na, ɩ cɩ 'tanɩ kʋ. 11Daa n ‑glɩa 'lɛ 'cilee na, 'cilee 'bhisa 'kʋ n nyɩtɛa 'lɛ, 'cilee 'bhisa 'kʋ n gugua 'lɛ, 'cilee 'bhisa 'kʋ n bua 'lɛ. ‑Ma daa n 'plɩnɩ 'lɛ nclɔɔ na, n ya 'cinʋnʋgbɩa 'fɩan 'nylugolu. 12‑Pɔtɔnʋ, ka ‑ala gbɩa ‑kʋ 'lɛ le saa a kope 'lɛ ‑aklawoko nɩkplaan, 'nyɩ ‑a ‑jlɛ 'lɛ 'lɩtɩɔlɩtɩɔ na, ‑ma 'dɛ 'la daa, 'klʋʋn ɩya 'klʋʋn ɩ cɩ 'ka 'lɛ 'plɩlɩ. ‑Pɔtɔnʋ 'na wɔɔcibhliliea ‑ka bhloluda, ‑ma 'dɛ 'la daa, n cɩ 'ka ‑tɛtɛa 'fɩan cibhlili le saa Laagɔ ‑ciin 'lɛ na.

13Na, ‑anɩ ‑naa ‑mɔtaa, ɩmɩ ‑ɩ ‑tonɩ 'lɛ, pɔɔtɛtɛ, pɔlɛkʋtɛlɔ ɩya ‑walʋ. ‑Ma ‑walʋ ʋmʋ ‑ʋ zi 'lɛ ɩmɩa 'fɩan 'kʋ.

Currently Selected:

1 Kolt 13: NTLD13

Highlight

Copy

Compare