1 Kolt 11

1A 'plɩ 'na dɩbalɩnya, le saa ‑amʋ 'titi n ‑glɩ 'lɛ Klisi 'la dɩbalɩnyɔ na.

‑Klwenyɔ ‑deliin 'ŋlɔ ɩya ŋodi ‑glɩ bhlo

2N falɩ anyɩ 'ŋwleen, ‑ofi lebhe a luoli 'na wɔlɩ ‑tɛtɛa 'fɩan nɩkplaan, 'nyɩ a falɩ 'na cacawɔlɩa saa n cɩɩ 'lɛ anyɩ na pɔlɛ cɩ. 3'Bhlɩmɔɔn, n ‑wa lebhe a cibhlili lebhe Klisi ‑glɩ 'lɛ ncaaŋodi 'la ‑kwleto, 'nyɩ ncaaŋodi ‑glɩ 'lɛ 'ŋlɔ 'la ‑kwleto, 'nyɩ Laagɔ ‑glɩ 'lɛ Klisi 'la ‑kwleto. 4Na, ncaaŋodi ‑ka 'wlu ‑gblio 'nyɩ ɔ ka bhibhie ‑aana ‑ɔ ‑ka Laagɔ ne 'kʋ nyɩtɛ na, ɔla ‑kwletoa ɔ sʋkpa 'lɛ. 5‑Ma, 'ŋlɔa ‑ɔ 'ta 'lɛ 'wlu ‑gblio 'nyɩ ‑ɔ bhibhie 'lɛ, ‑aana ‑ɔ nyɩtɛ 'lɛ Laagɔ ne 'kʋ na, ɔla ‑kwletoa ɔ sʋkpa 'lɛ. Sa ka ɩ ‑kʋ 'lɛ le saa ɔ ‑kplaa 'lɛ 'wlu na. 6Gbazɩ 'ŋlɔ ‑ka 'cla lebhe ɔ cɩ 'ta 'wlu ‑gblii na, 'naa ɔ gba ɩya ma ‑sa ɔla 'nyɩa. 'Nyɩ ka ɔ ‑ka 'lɩ lebhe ma ‑ka 'ŋlɔ 'la 'nyɩ ‑sa ‑aana ma kɔɔ 'wlu kpla na, ɩ ‑glɩ ɔla ‑zo na, 'dɛndlana 'naa ɔ ‑gblii 'wlu. 7Ɩ 'ta ‑fata lebhe ŋodi ‑gblii 'wlu. Ɔ palalɩ Laagɔ 'nyɩ ɔ ‑glɩ 'lɛ ɔla 'klʋagba. ‑Ma 'ŋlɔɔ ‑glɩ 'lɛ ŋodi 'la 'klʋagbaa. 8Sa, ‑n 'ta ŋodi ma 'ta 'lɛ 'ŋlɔ nɩkplaan ‑sa, ‑ma ŋlɔɔ ma ‑sa 'lɛ ŋodi nɩkplaan. 9'Nyɩ ‑n 'ta 'ŋlɔ 'la gbʋʋ ma 'ta 'lɛ ŋodi nʋ, ‑ma ŋlɔ ma nʋ 'lɛ ŋodi 'la gbʋ. 10'Lɩka wɔlɩa 'la gbʋa 'ŋlɔ cɩ 'ka 'lɛ ‑kwleliea ‑zɔan ɔ ‑kʋ 'lɛ na 'la cibhlilida 'wlu zʋ na, 'bhlaandleecɩa* 'la gbʋ.

11‑Sakɛ 'bhlɩmɔɔn, ‑Kwlenyɔ ‑deliin, 'ŋlɔ 'ta ‑kʋ na, ŋodi 'ta ‑kʋ 'nyɩ ŋodi 'ta ‑kʋ na, 'ŋlɔ 'ta ‑kʋ. 12‑Masa ŋodi nɩkplaan ma 'manɩ 'lɛ 'ŋlɔ, ‑ma ŋlɔɔ ‑ɔ valɩ 'lɛ ŋodi. Na, ‑tɛtɛa 'fɩan Laagɔ wlɩɩn ɩ 'wlʋlʋ 'lɛ. 13Anyɩ 'titi a kope ka ɩ ‑ka ‑kʋ lebhe ɩ ‑ŋwakʋ lebhe 'ŋlɔ 'la ‑gbliia 'wlu ɩya ɔ bhibhie Laagɔ na. 14'Pʋpʋkʋ ca 'ta ‑anyɩ lebhe ncaaŋodi ‑ka 'nyɩ ‑zie na, ɩ ‑glɩ ɔla sʋkpʋɛ bha? 15‑Ma ɩ ‑glɩ 'ŋlɔ 'la 'klʋagba, sa ka Laagɔ 'nyɩ 'lɛ 'ŋlɔ 'nyɩ le ɩ 'ka ɔla ‑aslala 'plɩ. 16'Nyɩ nclɔɔ ‑ka ‑wa lebhe ɔ 'ka wɔlɩ 'tɩtɔ na, ‑anyɩ, ɩ 'ta ala nʋnʋgbɩ ‑glɩ, 'nyɩ ɩ 'ta ‑awlɛ Laagɔ 'la ‑palɩa 'la nʋnʋgbɩ ‑glɩ.

‑Kwlenyɔ 'la nyɩa

17Wɔlɩ ‑naa n wlʋ 'lɛ anyɩ soluda na, 'lɩka ɩla ‑papoa. ‑Ma anɩ ‑naa 'kʋ, n falɩ 'ta anyɩ 'ŋwleen, ‑ofi lebhe ala 'wluwlalɩɛa, ɩ 'la ka 'lɛ anyɩ 'kʋklʋʋn falɩ na, ka ɩ nʋ 'lɛ anyɩ ‑abhɔlɛ. 18N ya 'nu lebhe gbazɩ a ‑ka 'wluwlalɩ na, ala ‑kandea ‑do nɩkplaan, 'nyɩ n gugu lebhe ɩ cɩ ‑nʋawlɛ 'plɩ. 19‑Ma ɩ ‑fata lebhe nɩkplaandolɩɛ kʋ anyɩ sidiin ɩya ma ka maa, ‑a cɩ 'lɛ ‑delikʋtɛbhalɩ na cibhlili. 20‑Masa, a ‑ka 'wluwlalɩ na, ‑n 'ta ‑Kwlenyɔ 'la nyɩa a li 'ta 'lɛ. 21Sa, daa a 'kanɩ 'lɛ li na, ka nclɔɔ nclɔɔ guguo 'lɛ ɔmɔ 'titi ɔla nyɩa, 'nyɩ daa ‑anɔ bhlo ŋɔmʋ bhlɔɔ 'lɛ na, ‑da ‑naanɔ bhlo nʋ bhlɔɔ 'lɛ. 22'Sli a 'ta 'lɛ ‑ka ɩya a 'kɩɩ 'lɛ nɩkplaan kʋ, a 'ka li ɩya a 'ka 'mla bha? ‑Aana Laagɔ 'la ‑Palʋa a bu 'ta 'lɛ bha? ‑Aana maa ‑ɔ 'ta 'lɛ lʋʋ ‑ka na, maa a ‑wa 'lɛ lebhe a 'ka sʋkpa bha? Wɔɔsaa n cɩ 'kanɩ ‑awlɛ 'lɛ anyɩ solu bha? N 'pa anyɩ ‑kpaacɛ bha? ‑Wɔɔ, wɔɔce ‑naa 'kʋ, n cɩ 'ta anyɩ ‑kpaacɛ 'pa.

23‑Amʋ, 'lɩka wɔlɩa ‑Kwlenyɔa zʋʋn 'lɛ wlɩɩn, 'nyɩ n solu 'lɛ anyɩ na. ‑Kwlenyɔ Zozii, clɩɩa 'kʋa ma sɔɔ 'lɛ na, ɩla dobhea, ɔ ya 'flawo 'ma, 24ɔ ya Laagɔ bhɔlʋ, ɔ yʋʋ 'kliin 'dɩdɩlɩ 'nyɩ ɔ ya 'cla lebhe: ‑Anʋ ‑naa, ʋ ‑glɩ 'na 'nyɛkɛa, n ‑sa 'lɛ 'nyɩ n 'nyɩ 'lɛ anyɩ na. A liu ɩya a 'kaan luoli. 25Sɛɛ bhlogbɩɩ, daa ma bhɩalɩ 'lɛ lilie na, ɔ ya ‑kɔbhɛa 'ma 'nyɩ ɔ ya 'cla lebhe: ‑Kɔbhɛ ‑naa, ɛ ‑glɩ mɛnʋ ‑lelua ‑ʋ 'slalɩɔ 'lɛ 'na ‑dolua 'kʋ na 'la ‑kɔbhɛ. A ‑ka ‑azlɛɛ 'mlada ‑kʋ na, a 'mlɛɛ le a 'kaan luoli. 26Na, gbazɩ a li 'lɛ 'flawo ‑naa 'nyɩ a mla 'lɛ ‑kɔbhɛ ‑naa na, ‑Kwlenyɔ 'la 'kwɩa 'la 'dɩa a sa 'lɛ ‑sa ‑aan ɩya ɔ 'ka ci.

27Ɩla gbʋ na, ɔmɔa ‑ɔ ‑cɩ 'ka 'lɛ ‑Kwlenyɔ 'la 'flawoa li ɩya ‑ɔ ‑ka 'lɛ ɔla ‑kɔbhɛa 'mla, 'nyɩ ɔ ‑yɩɩsɩ 'ta ‑fata na, ‑Kwlenyɔ 'la 'flawoa ɩya ɔla ‑dolua 'la ‑tobhua ‑gbɛɔ 'wlu. 28Na, 'fɩɔn a 'ka 'lɛ 'flawo ‑naa li ɩya a 'ka 'lɛ ‑kɔbhɛ ‑naa 'mla na, 'naa nclɔɔ nclɔɔ 'titi mʋ ɔcɩɩn. 29Sa ɔmɔ ‑ɔ ‑ka li 'nyɩ ɔ ‑ka 'mla 'nyɩ ɔ 'ta cibhlili lebhe ‑Kwlenyɔa 'la 'nyɛkɛa ɔ li na, 'tɩtɩa ma cɩ 'kɔɔ 'lɛ ‑pla na, ɩmɩ ɔ lalɩ ɔcɩ 'kʋ. 30'Lɩka wɔlɩa 'la gbʋa guzenya ɩya 'bhlɛnya ‑zu 'lɛ anyɩ sidiin, 'nyɩ ‑anʋa ya 'lɛ 'ku na. 31Ɩ ‑ka ‑kʋ lebhe ‑anyɩ 'titi ‑a ‑kaa ‑acɩɩn mʋa na, maa cɩ 'taa ‑anyɩ 'tɩtɩ ‑pla. 32‑Ma ka ‑Kwlenyɔ pla 'lɛ ‑anyɩ 'tɩtɩ le ɔ 'ka ‑anyɩ 'bɩsa ɩya ‑aya ‑laagɔzɔan 'la ka gbaylɩsalɩɛa 'kʋwlalɩ.

33Na, n bholiecɩnyɩ, a ‑ka ‑azla 'wluwlalɩ le a 'ka li na, 'naa a ‑bɛbɛlɩ. 34'Nyɩ nclɔɔ ŋɔmʋ ‑ka 'bhla na, 'naa ɔ lili ɔ 'bhisleen, ɩya ala 'wluwlalɩɛ 'la ka anyɩa gbaylɩsalɩɛ ‑lalɩ. ‑Daa wɔlɩa a 'claan 'lɛ neen na, n ‑ka ci na, 'nyɩ n cɩɩ nyɩtɛ.

Currently Selected:

1 Kolt 11: NTLD13

Highlight

Copy

Compare