'Inɨatsie 24
24
1Hikɨ kepaukua Warami mɨpaɨ mɨretima Yawé minakekai 'Ixaheri 'aixɨa muyuriekakɨ, hikɨ pɨkawarukewaiyaxɨ, meripaitɨ hepaɨ, matsi tawarita makumawetsie kaneutaniere. 2Kepauka Warami meutanierixɨ 'ixaheritsixi kaniwaruxeiya kememɨteheunuiwari mɨpaɨ meteheukuteme, hikɨ Yawé 'iyarieya hetsiena kaninuani, 3hikɨ mɨpaɨ kaniutayɨni:
«Warami niukieya Wehuxi nu'aya,
tewi niukieya 'aixɨa mɨti'ane mɨtixeiya.
4Niukieya mɨ'enie Kakaɨyari kaniniukieyatɨni,
Naimekɨmɨtɨrɨkaɨye mɨtixeiya,
mukakukutsutsie hepaɨ mɨtikuxaxatɨariwa.
5»Kakuwu, 'axamarute witsipɨ'anene.
'Ixaheri, witsipɨtiyuxexeiya pemanukatsie.
6'Aki muyehapane hepaɨ pɨtiyuxexeiya manuyunanake,
tuturi hatetsita mɨ'iteɨritsie hepaɨ pɨtiyuxexeiya,
'aruhe 'iteɨriyari Yawé mika'iteɨtaxɨ hepaɨ,
kariuxa hatetsita mɨti'u hepaɨ pɨ'anene.
7Xariteya haa panakayeuriwe,
'imɨarieya puyutemawie haa waɨkawa mexeiyakɨ.
Ti'aitame pɨmariwe 'Akaki reuyeta,
mariwetɨ 'aitsikaya payuyeitɨwa.
8»Kakaɨyari 'Ekipitu kaniwarayewitɨni
tuuru tsimaruni mɨtitɨrɨkaɨye hepaɨ.
'Ixaheri nuiwarite memeye'unie kaniwatikwa'ani,
wa'umete kanititarani,
yu'ɨrɨkɨ kaniwatimɨmɨni.
9Maye 'uki hepaɨ kanakatutsitani,
maye 'ukaratsi hepaɨ 'akaniuhupuni:
¿kemɨ'ane ka'ukamatɨ piyehaxɨatɨawe?
'Aixɨa meke'itɨarieka 'aixɨa memɨmatsiyurie.
'Axameke'itɨarieka 'axamemɨmatsiyurie».
10Hikɨ Waraki kaniuyeha'ani Warami hepaɨtsita, yumamatetsie heuyɨtɨminatɨ mɨpaɨ katinitahɨawe:
—Nekametiniutanɨ'airieni 'axapemɨwayurienikɨ nemɨwaraye'unie, hikɨri hairieka matsi 'aixɨa petiwayurie pɨta. 11Tsepa hikɨ kenemie 'akie. Ne mɨpaɨ nepɨmarahɨawekai kename nematipitɨanikekai, peru mɨkɨ Yawé pɨkamatiutanaki'eriri.
12Warami mɨpaɨ katinitahɨawe:
—Ne mɨpaɨ nepɨtiwarahɨawekai netsi'iniwamete pemɨwarenɨ'a: 13“Tsepa Waraki yuparatsiyu hurukɨ meta pɨratakɨ hɨneme mɨnetiuxatɨa, ne 'aixɨa nepɨkatiuyuriwe meta 'axanepɨkatiuyuriwe, matsi Yawé nekakaɨyari xeikɨa 'aitsikaya kemaine mɨpaɨ nepɨ'aneni. Yawé xeikɨa kemɨneti'aitɨa mɨpaɨ nepɨtiyurieneni”. 14Hikɨ mexi neka'akunuawe nekie, nepɨmatitaxatɨani 'ikɨ kiekari 'ateɨterima kemɨwayurieni 'uxa'atɨni warie haye'ayu.
Warami naurieka kemɨtiutaxa
15Hikɨ Warami mɨpaɨ kaniutayɨni:
«Warami niukieya Wehuxi nu'aya,
tewi 'aixɨa mɨti'ane mɨtixeiya niukieya.
16Niukieya mɨ'enie Kakaɨyari kaniniukieyatɨni.
'Amutewi kemɨtiku'eriwa mɨmate,
Naimekɨmɨtɨrɨkaɨye mɨtixeiya,
mukakukutsutsie hepaɨ mɨtikuxaxatɨariwa:
17»Nekanixeiyani, peru hikɨ 'akuxi hawaikɨ,
nekanixeiyani, peru 'ahurawa hawaikɨ.
Kakuwu xuraweya kananatinemɨkɨ,
xewitɨ ti'aitame 'Ixaheri hetsie kananukukemɨkɨ.
Muhawi mu'uya kanitapɨnamɨkɨ
meta Tseti niwemama wamu'ute.
18'Erumi kana'iwariemɨkɨ,
Tsehixi meye'unie, tipiinieya katinayeimɨkɨ,
mexi 'Ixaheri yukuha'aritɨwani, mariwemekɨ mɨtiyurienikɨ.
19Kakuwu nuiwarieyatsie xewitɨ rayu'iwatɨ kanitinemɨkɨ,
'Ahixi kiekatari memuyuhayewaxɨ kaniwatayuniyamɨkɨ».
'Imatɨrieka Warami kemɨtiuxa
20Warami 'Amareki 'uxeiyaka mɨpaɨ kaniutayɨni:
«'Amareki mexɨakame nuiwari kanihɨkɨtɨni,
peru 'imatɨrieka naitɨ kanika'unariemɨkɨ».
21Hikɨ Warami kenitsixi waruxeiyaka mɨpaɨ kaniutayɨni:
«Tsepa kuraru 'aixɨa 'aneme pemateka
meta tsepa 'a'itua 'aitsie paitɨ makama,
22'ekɨri Kahini, taipa pekaneyani,
meta 'Atsiriya kamenanuhanimɨkɨ».
23Hikɨ Warami mɨpaɨ kaniutayɨni:
«Xɨa'ui, ¿kemɨ'anetsɨ kuta pɨtawikweni
kepauka Kakaɨyari mɨpaɨ mɨtiyurieni?
24Kanuwate 'amɨpapa kani'axɨakuni Tsipɨre manexɨani,
'Atsiriya meta 'Ewexi memɨtewakwinitɨanike,
mɨkɨ yaxeikɨa mekanika'unariekuni».
25Mɨpaɨ titaxatɨaka Warami kaneyani yukwiepa paitɨ, yaxeikɨata Waraki yuhuyeta kaneyani.
Currently Selected:
'Inɨatsie 24: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
