'Inɨatsie 23
23
Matɨari Warami kemɨtikuxatakai
1Warami, Waraki mɨpaɨ katiniutahɨawe: «'Atahutame mawarite taiyame keneutiwewi meta 'atahutame tsikerutsixi meta 'atahutame muxatsi 'ukitsi». 2Waraki yakatiniuyurieni Warami kemɨrehɨawekai, yunaitɨ mekanitimawa xeime tsikeru meta xeime muxa 'ukitɨme mawari taiyame xexuimetsie.
3Hikɨ Warami, Waraki mɨpaɨ katiniutahɨawe: «'Ena keneuyuhayewa, 'amawari taiyariyari 'aurie, 'akuxi ne Yawé nepeta'iwawiya kemaineni. Yareutewitɨta nekametinitaxatɨamɨkɨ kemɨneretahɨawe». Hikɨ yemuri metsekametsie kaneutimiekaitɨni.
4Kakaɨyari kanenukunake, Warami mɨpaɨ katiniutahɨawe:
—'Atahutame mawari taiyame nekaniutiwewieni xexuimetsie xeime tsikeru xeime muxa 'uki nekaniutimawa.
5Hikɨ Yawé Warami katiniutaxatɨani, mɨpaɨ katinitahɨawe:
—Kenakunua Waraki hetsɨa kenemɨtayɨni mɨpaɨ ketinetahɨawi.
6Warami kanakunuani Waraki kaniutaxeiya 'a'uweme yumawari taiyariyari 'aurie muhawitsixi tewa'aitɨwamete wahamatɨa. 7Warami mɨpaɨ katinikuxatakaitɨni:
«'Arami paitɨ, tau manatineika hɨri hepatsie,
Waraki kaneneyewitɨni, ti'aitame Muhawi kiekame hetsɨa.
Mɨpaɨ kanetiniutahɨawe: “Kenamieka, Kakuwu 'axakeneuyuri nehetsiemieme.
Kenamieka, 'Ixaheri 'axakeneuyuri”.
8¿Titayari 'axanetiwayurieneni
kemɨ'ane Kakaɨyari 'axamɨkawayurie?
¿Keneyɨme 'axanepɨwayurieni
Yawé mɨpaɨ mɨkatiwara'eriya?
9'Ai 'amanutitewitsie paitɨ nepuwataxeiya,
hɨri 'ametitɨtɨtsie paitɨ nepɨwaxeiya:
teɨteri memanayexeiyarie mepɨhɨkɨ,
mepɨka'inɨatsie 'ena kwiepa miemete wahamatɨa.
10¿Kemɨ'ane pɨyɨwe Kakuwu nuiwarimama mɨwaruti'inɨata,
tumuanari hepaɨ memuyupaɨme,
yatɨni tsikere yayupaɨmeme mɨwaruti'inɨata 'Ixaheri nuiwarimama?
'Aixɨa mɨtiuka'iyari hepaɨ ne'anetɨ neke'umɨni.
Wahepaɨ netiyurienetɨ neke'ukumawere».
11Hikɨ Waraki, Warami mɨpaɨ katiniutahɨawe:
—¿Kepenetsi'uyuri? Nekamani'atɨani 'axapemɨwayurienikɨ memɨnetsi'aye'unie wahetsiemieme, matsi pɨta 'aixɨa petiwayurie.
12Hikɨ Warami mɨpaɨ katinita'eiya:
—¿Kamɨtsɨ nekatiyɨwe Yawé kemɨnerahɨawe mɨpaɨ nemutayɨni?
Hutarieka Warami kemɨtiutaxa
13Hikɨ Waraki mɨpaɨ katinitahɨawe:
—Neuxei, hikɨmɨ xaɨtsie pɨta. Manata xeitapari xeikɨa pekaniwarexeiyamɨkɨ, yunaime hawaikɨ, mana hɨrixɨa 'axapekaniwareyurimɨkɨ.
14Hikɨ mekanekɨne Tsupini hɨriyaritsie Pitsikaha mɨtitewatsie. Mana mawari taiyame 'atahutame kaniutiwewieni, xexuimetsie xeime tsikeru xeime muxa 'uki mekaniutimawa. 15Mana Warami Waraki mɨpaɨ katiniutahɨawe: «'Ena keneuyuhayewa 'amawari taiyariyari 'aurie, 'akuxi ne Kakaɨyari hamatɨa nepɨretaxata».
16Yawé Warami 'anukunakeka yuniuki kaniyetuirieni mɨpaɨ katinitahɨawe: «Waraki hetsɨa kenakunua, kenemɨtayɨni mɨpaɨ ketinetahɨawi».
17Warami kaneyani hakewa Waraki mekatei, kanitaxeiya 'a'uwekame yumawari taiyariyari 'aurie meta muhawitsixi 'ukirawetsixi wahamatɨa. Waraki mɨpaɨ katinita'iwawiya:
—¿Yawé kehetayɨ?
18Hikɨ Warami katiniutaxata:
«Kenanukukexi, Waraki, keneu'ena,
Tsipuxi nu'aya, keneneu'eni.
19Kakaɨyari mɨmɨwe pɨkahɨkɨ
mɨkati'itawa meta mɨka'ikupata.
Katinaye'atɨwani kemɨtayɨni
yakatinikamieni.
20Mɨpaɨ kanetinahɨaweni 'aixɨa nemɨwayurienenikɨ,
xɨka Kakaɨyari mɨpaɨ tinakeni,
ketsɨkuta tawarita netiyurieneni.
21»Kakaɨyari Kakuwu pɨkaxeiya 'axatiyurieneme
'Ixaheri pɨkatiuyukananaima.
Yawé wakakaɨyari wahamatɨa puyeika,
wahamatɨa ti'aitame puyuxata.
22Kakaɨyari 'Ekipitu kaniwarayewitɨni
tuuru kemɨtitɨrɨkaɨye hepaɨ.
23Kakuwu hetsɨa 'ikewari pumawe,
meta 'Ixaheri hetsɨa 'awie memɨte'uyemate mepɨkaxuawe.
Kakuwu meta 'Ixaheri wahepaɨtsita mɨpaɨ katinitaniukiemɨkɨ:
“Xeketeneuxeiya Kakaɨyari 'aixɨa kemɨtiuyuri”.
24'Ikɨ teɨteri, xeimieme mekanixatani maye 'uka hepaɨ,
mɨkɨ maye 'uki mɨtikuwaɨne hepaɨ.
Pɨkaka'uxipieni tita mɨtikuweiyane 'i'axemeke
mɨwakwini waxuriya ha'iemeke».
25Hikɨ Waraki, Warami mɨpaɨ katiniutahɨawe:
—Xɨka 'axapekawayurimɨkɨ, kamɨtsɨ tsikere 'aixɨa pepɨkawayurieka.
26Warami mɨpaɨ kaniutayɨni:
—¿Ne tamɨ mɨpaɨ nekamerahɨawekai, kename ne Yawé kemɨnetitahɨawekekai yanetiyurienikekai?
Hairieka Warami kemɨtiuxa
27Hikɨ Waraki, Warami mɨpaɨ katiniutahɨawe:
—Hikɨmɨ neuxei, xaɨtsie pɨta nepɨmatsi'anuwitɨni. Heiwatɨ mana Kakaɨyari 'inakeni 'axapemɨwayurienikɨ.
28Hikɨ Warami kanewitɨni Pehuxi hɨriyaritsie paitɨ, makumawetsie Ketsimuni mahekɨatsie. 29Mana Warami mɨpaɨ katinitahɨawe:
—'Ena keneneutiwewiri 'atahutame mawari taiyame meta keniwarukuha'aritɨa 'atahutame tsikerutsixi meta muxatsi 'ukitsi.
30Waraki yakatiniuyurieni Warami kemɨrehɨawekai, mana kaniwarutimawa 'atahutame tsikerutsixi meta muxatsi 'ukitsi.
Currently Selected:
'Inɨatsie 23: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
