Mateu 14

Wani Ti'ɨyame kemɨtiumierie

(Mat 14:1-12 – Mar 6:14-29)

1Merikɨtsɨ kuwexinaruri Herurexi kanihɨritɨariekaitɨni Karereya kwieyari. Hikɨ kaniu'ena Ketsutsi hepaɨtsita kemɨraniuwakai, 2mɨpaɨ katiniwarutahɨawe memiparewiekai: «Wani Ti'ɨyame kanihɨkɨtɨni, 'umɨka panukuke, 'ayumieme tɨrɨkariya kanexeiyani mariwemekɨ mɨtiyurienenikɨ».

3Mɨkɨ Herurexi yatiuta'aitaku meripaitɨ, kaniuwiyarieni Wani. Kanihɨani meta kanenutahɨani katsariyanata, mɨpaɨ mɨtinakekaikɨ Heruriya, yu'iwa 'ɨyaya Peripe. 4Meripaitɨ Wani kawiyariewetɨ 'akuxi, mɨpaɨ Herurexi katiniutahɨawe: «Pɨkayɨwe pemewitɨkɨni, 'inɨari niukiyari mɨpaɨ paine». 5Herurexi Wani pɨmiemɨkɨkai, peru teɨteri pɨwamakarɨkai, kename Kakaɨyari niukameya hɨkɨtɨkai memɨteku'eriwakaikɨ. 6Merikɨtsɨ Herurexi kepauka mutinuiwaxɨ 'ixɨarariyari wewiekaku, Heruriya niweya 'ukatɨtɨ katiniutineini wahɨxie, pinakixɨ Herurexi, 7'ayumieme yurikɨ kaniyɨhɨritɨani, kename tita mɨtitawawirienike timinikekai. 8'Iya maamaya yatitahɨaweku, mɨpaɨ katinitahɨawe: «Wani Ti'ɨyame mu'uya keneneu'ɨitɨa hikɨ xakɨtsie yekaime».

9Hikɨ ti'aitame waɨkawa kaniuyukahiwerieni, peru mɨyɨhɨritɨakaikɨ teɨteri hamatɨana memɨtekwakai wahɨxie, katiniuta'aita mɨkɨ mɨtiyetuiriyarienikɨ, 10hikɨ katiniutanɨ'ani Wani mu'uya manutixitekienikɨ katsariyanata. 11Mu'uya kani'atɨarieni xakɨtsie yekaitɨ, hikɨ 'ɨimari kaniyetuiriyarieni, mɨkɨta yumaama kaniyetuirieni.

12Hikɨ Wani teyɨ'ɨkitɨwametemama me'u'axɨaka meneikweni kaxarieya, mekanikateuku. 'Arike mekanekɨne Ketsutsi mekateniutaxatɨani.

Ketsutsi 'auxɨwime miriyari kemɨtiwarumi

(Mat 14:13-21 – Mar 6:32-44, Ruk 9:10-17, Wa 6:1-13)

13Merikɨtsɨ Ketsutsi mɨkɨ tiutamarieka, kaneyani kanuwatsie kayerɨka makumawetsie paitɨ yuxaɨta. Teɨteri mete'utamarieka, yɨ'ɨkama mekanekɨne mekanenukuweiya yukiekaritetsie meyekɨneka.

14Hikɨ kepauka Ketsutsi manatitɨa kanuwatsie, teɨteri kaniwaruxeiya yumɨireme, hikɨ kaniwarutinenimayata, 'aixɨa meteheu'eriekame kaniwarayeitɨani memɨtekukuyekai.

15Hikɨ tau 'akayunirɨmekaku teyɨ'ɨkitɨwamete 'auriena mekaniuyukuxeɨrieni, mɨpaɨ me'utiyuatɨ:

—'Ena kanakumaweni, kananukayaniri memɨtekwanikekai. Keniwarutateutɨari teɨteri, kiekaritetsie memɨtayeixɨanikɨ, 'ikwai memɨteheyutinanairienikɨ.

16Ketsutsi mɨpaɨ katiniwaruta'eiya:

—Pɨkaheuyewetse memɨyehukɨ. Xeme pɨta xeketeniwarumikwa.

17Mɨkɨ mɨpaɨ mekatenita'eiya:

—Ketɨri 'ena tixaɨtɨ tepɨkatehexeiya, paa 'auxɨwime meta tsapari yuhutame xeikɨa tepɨwarexeiya.

18Mɨpaɨ katiniwarutahɨawe Ketsutsi:

—'Ena nehetsɨa xeketenatua.

19Hikɨ katiniwaruta'aitɨani teɨteri memɨkuyaxixɨanikɨ 'ɨxapa, paa 'auxɨwime 'anu'ɨka meta tsapari meyuhutame, taheima heutinieretɨ pamɨpariyutsi Kakaɨyari kaniupitɨani. Hikɨ paa 'utitaraka kaniwaru'ɨitɨani teyu'ɨkitɨwamete, mɨkɨta mekaniwaruta'ɨitɨani teɨteri. 20Yunaitɨ mekateniukwani mekaniutihuxani, hikɨ teyu'ɨkitɨwamete mekanikuxeɨrieni tarimeyari muyuhayewaxɨ, mekanitihɨniya tamamata heimana huta tsikɨiwitiyari. 21Memɨte'ukwai 'ukitsi 'auxɨwime miriyari yakɨtɨtɨ mekaniyupaɨmekaitɨni, meka'inɨaritɨ 'ukari meta tɨɨri.

Ketsutsi haa heima kemɨtiumiekai

(Mat 14:22-36 – Mar 6:45-56, Wa 6:15-21)

22Hikɨ Ketsutsi teyɨ'ɨkitɨwamete kaniwarutamexɨitɨani kanuwatsie memɨkayaxekɨ mɨkɨ meri memɨyehukɨ 'anutaɨye paitɨ, mexi mɨkɨ teɨteri wateutɨanekai. 23'Arike warutateutɨaka teɨteri, yemuritsie kaneutiyune yuxaɨta yutanenewienike. Hikɨ kaniukuyɨre mana 'ukaiku yuxaɨta, 24meta kanuwa haa hixɨapa paitɨri kaniuyemiekaitɨni, hamewari kanenutawayakaitɨni, hepana meuye'ekakaikɨ. 25Merikɨte 'etsiwatɨkaku kahekɨarirɨmekaku, wahepa kanamiekaitɨni Ketsutsi haa heima 'umietɨ. 26Kepauka teyɨ'ɨkitɨwamete memixei haa heima 'amieme, waɨkawa mekaniutimamani, marikakɨ mɨpaɨ mekateniuhiwa:

—Mɨki pɨyɨane.

27Peru kwitɨwa Ketsutsi mɨpaɨ katiniwarutahɨawe:

—Kayuwatɨ xeketeneuyaxi. Ne nepɨyɨane. Xepɨkamamaka.

28Hikɨ Pekuru mɨpaɨ katinita'eiya:

—Ti'aitame, xɨka 'ekɨ peyɨaneni, kenetineuta'aitɨa mana nemɨmiekɨ 'ahetsɨa, haa heima ne'umietɨ.

29Ketsutsi mɨpaɨ kaniutayɨni:

—Kenaye'a.

Pekuru kanuwatsie kananatiyani, hikɨ haa heima kaniumiekaitɨni Ketsutsi hepa. 30Peru, kepauka 'eka mɨ'eni kemɨtitɨrɨkaɨyekai, kaniutimani, 'ana kanitsutɨani kayunirɨmetɨ. Hikɨ mɨpaɨ katiniuhiwa:

—Ti'aitame, keneneutawikweitsitɨa.

31Hikɨ Ketsutsi yumamakɨ 'iwiyaka, mɨpaɨ katinitahɨawe:

—'E'e, kari 'ekɨ 'etsiwa xeikɨa yuri pepɨti'erie. ¿Titayari peti'a'iyaritɨakai?

32Kepauka kanuwatsie memɨkayaxixɨ 'eka kaneunuani. 33Mɨkɨ kanuwatsie memɨyetekai hɨxiena metitunuma'utɨ mɨpaɨ mekatenitahɨawe:

—Yurikɨ Kakaɨyari nu'aya 'ekɨ pekanihɨkɨtɨni.

34Hikɨ 'anutaɨye meheutanexɨaka, Kenetsareti kwieyaritsie mekaniye'axɨani. 35Mana kiekatari Ketsutsi mekanetimani, hikɨ niuki mekaneutanɨ'axɨani yu'aurie kiekatari yunaime wahetsɨa. Mekani'atɨiriwakaitɨni tekwikwikate yunaime, 36waɨkawa me'iwawirietɨ muwapitɨakakɨ tsikere 'ixurikieya tetsimeyaritsie memimayɨanikɨ, yunaitɨ kemɨ'ane memimayɨa 'aixɨa meteheu'erietɨ mepakɨkakai.

Currently Selected:

Mateu 14: hch

Highlight

Compare

Copy