Hiwerika 5
5
1Yawé, kenaye'eri kemɨtatiuyuri,
ketemɨteyutewinɨa kenaye'eri.
2Takwie hipatɨ tiwapiini pɨratɨa,
meta takii, 'ateewa kiekatari wapiini katinayani.
3Tepɨkatehekapaapari, nutuite teputahayewaxɨ,
tamaamama wiuraxi mepuyuhayewaxɨ.
4Haa temɨhare, tekaninaneka xeikɨa,
kɨyexi, yaxeikɨa tekaninaneka.
5Memɨtatsi'uweiya takeputsatsie mekana'uweni,
tepu'u'uxe xeikɨa, temuka'uxipieni tepɨkayɨwawe.
6Tɨratu tekaniuwewieni 'Ekipitu meta 'Atsiriya wahamatɨa,
mɨpaɨ 'ikwaite temɨtekaxeiyakɨ.
7Tapaapama 'axameteyurietɨ mekaniukwini,
tame pɨta tekaniu'uximatɨarieni wahetsiemieme.
8Hikɨri waɨriyarika te'uximayatamete memɨhɨkɨtɨkai mɨkɨ mekatateni'aitɨaka,
xewitɨ kaniumaweni mɨtatsixɨnakɨ wahetsɨa.
9Makumawetsie makukweriwa'anetsie tekaniuyekɨkani,
tatukari tekanitatuaka ta'ikwai temukaxexeiyanikɨ.
10Tanawiyari pɨtatsikutaiya huxunu mɨxɨka hepaɨ,
haakakɨ tekanihɨiyatɨkani.
11Tsiyuni kiekatari 'ukarawetsixi meta Kura kiekariyaritsie 'ɨimarixi
waɨriyarika mekaniutimayɨiyani.
12Ta'ukiyarima memanuyehaitɨtɨakai mekaniukawɨtɨarieni yumamatsie mehɨatɨkaitɨ,
meta tixaɨtɨ mepɨkatewarayeitɨa 'ukirawetsixi.
13Taniwema temari 'aixɨa memɨ'anene tɨxɨmete mepɨwarayeitɨa,
tɨɨri kɨyexi mahete me'ɨtɨtɨ mepekaxɨrɨwekai.
14Hawaikɨri 'ukirawetsixi
kiekari kitenie mepɨkatiyaxike,
hawaikɨri temari wakwikari tepɨka'enie.
15Temawierika pɨkaxɨaweri ta'iyaritsie,
teye'amete watemawierika nutuixiya pɨta kanayani.
16Tamu'utsie kuruna tepɨka'anamanari.
Xɨa'ui tametsɨari: 'axatekateniuyurieni.
17Ta'iyarite pukwiximeri,
tahɨxite kanititɨximeni,
18Karikɨ Tsiyuni hɨriyaritsie kanakukiɨriyaka,
mana xeikɨa yeutari mekaniu'uwani.
19Yawé, peru 'ekɨ 'aheyemekɨ pekatini'aitametɨni,
'a'uweni yuheyemekɨ 'akaniuweni.
20¿Ketitayarikuta 'aheyemekɨ petaratɨtɨmaiya?
¿Ketitayarikuta mɨixa tukari petatiuku'eiri?
21Yawé, 'ekɨ ketaneupitɨa 'ahetsɨa temɨ'axɨanikɨ, hikɨ 'ana tame ta'aurie tepaxɨrieni.
Meripaitɨ ke'aixɨa temɨ'anekai mɨpaɨ ketatineupitɨa.
22Yurikɨ, 'ekɨ pepɨtatsi'uku'eiri
waɨkawa yemekɨ pepɨha'a tahamatɨa.
Currently Selected:
Hiwerika 5: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
