Hiwerika 4
4
1Huru 'ari pɨka'utixawatɨre.
Huru 'aixɨamɨ'ane putayɨrixɨ puyutakwitama.
Tetexi mɨpatsietɨka kwinimieme mɨraye'atɨka tukita timieme kaye'utɨma katineutiteni.
2Tsiyuni kiekatari,
meripaitɨ mepɨtehaye'akai huru kemɨraye'axe,
hikɨri haxu xariteyari hepaɨ mepɨtexeiyarie,
'iwewame nenikamɨti'ane mitiwewi.
3Yeutari memayu'eririya yutsitsi mepɨyexata
yuniwema mepɨwatsitsitɨa,
peru 'ukari Kerutsaremetari mepɨka'u'iyari.
Yuniwema mepɨwata'e'eiriwa 'aruxi 'amemɨnene makumawetsie memu'uwa wahepaɨ.
4Tɨɨri yemekɨ waɨkawamekɨ mepeuhariku,
waneni 'ari puwawaki.
Paa tɨɨri mekaniku'iwawani,
peru neuxei nixewitɨ pɨkawamimɨkɨ.
5Kemɨ'ane meripaitɨ memɨte'utikwa'akai witsiti'anekame
hikɨ mekanikwiximeni haakakɨ kaye'utɨma.
Meripaitɨ witsimemɨte'ukemarikai mɨyɨtsikimaɨyekɨ
hikɨ xatsitsata mekanikurupetɨweni.
6Ke'axamemɨte'uyuri Tsurumatari
matsi kwinimieme 'axamepɨte'uyuri Kerutsareme kiekatari,
yapauka kaniuka'unarieni,
nixewitɨ pɨka'iparewi.
7Kwinimieme matsi mepɨtetuxakai mana te'aitamete 'ɨwi hepaɨ,
meta retsi hepaɨ,
wawaiyari yemekɨ pɨtataɨrawikai,
Tete mɨraye'axe mutimerɨka hepaɨ mepɨteyuxexeiyakai.
8Peru hikɨ kwinimieme mepɨteheutɨtɨni keyuri yɨxari,
nixewitɨ pɨkawamate kaye'utɨa.
Yuwaiyaritsie kwinimieme mekateniwawakini kɨye hepaɨ,
wa'umeyaritetsie kaniuwerixɨani.
9'Aixɨa mekani'itɨarieka kemɨ'ane memukwi'iwaxɨ 'ixiparakɨ,
keyuri haakakɨ memukwi.
Haaka wara'iwakaku mekanitakukuweni,
karikɨ mɨtiumawekɨ 'ikwaxite 'ɨtsita timieme.
10'Ukarawetsixi 'aixɨa memɨte'u'iyarikai, yumamá mekaniuhɨniri
yuniwematɨme mekaniwaruka'etsa.
Yuniwema wahekɨ mekatenikwakaitɨni,
kepauka Kerutsareme muka'unarietsie.
11Yawé yuhaxɨa kaniutatuani,
yuhaxɨa mɨtiyukukuine kananayetuani.
Tsiyuni taikɨ kaniutataiya
meta kanitaxɨtsitɨani tsutɨmeyari naime.
12Mɨpaɨ mepɨkateha'eriwakai naitsarie te'aitamete,
meta yunaitɨ teɨteri naitsarie kiekatari,
kename Kerutsareme memaye'unie
kiteniena meheutahaxɨanikekai.
13Peru mɨpaɨ katiniɨyɨni.
Kakaɨyari niukametemama 'axamete'uyurieku.
Mawari wewiwamete 'axamete'uyurieku.
Teɨteri 'axamekateyuriekame memɨwarukwikɨ
kiekaritsie kaye'utɨma.
14Yumamatetsie meheuxuxuretɨ,
kaye 'utɨma mekaniu'uwani memɨkaheuneniere wahepaɨ meyɨatɨ.
Xewitɨtɨma pɨkayuwaɨriya muwamayɨanikɨ
tsikeretɨma wa'ixurikitsie.
15Teɨteri mɨpaɨ mekateniwaruhiwiwani: «'Ena xepɨka'u'uwani, xemɨka'itiya.
Xekeneuhuni. Xekeneuhuni. Xepɨkatatsikumaɨwani tame».
Hipame nuiwarite watsata mɨpaɨ mekatenikɨhɨawarɨwani:
«Ku'uwamete mekanihɨkɨtɨni, memuyu'unaxɨaxime.
Mepɨkayɨwawe 'ena memu'uwani yuheyemekɨ».
16Yawé tɨtɨ katiniuyurieni muwareutaxɨriexɨa,
hikɨri pɨkayu'iyaritɨa wahetsiemieme.
Mawari wewiwamete mamariwawemete mepɨkaxatsiwa
meta 'ukirawetsixi mepɨkanenimayatsieri.
17'Imatɨrieka, tahɨxite pɨtitɨximeri
teta'ikwewatɨ yakɨxeikɨa xewitɨ tatsiparewienike te'erietɨ.
Tuxiyutsie paitɨ tetanenieretɨ tekanita'ikwewani
hipatɨ teɨteri memɨtatsitawikweitsitɨanikɨ.
18'Etsiwa temuku'uwatsie tepuhupierie,
kaye 'utɨma temɨye'uwani pɨkayɨweri.
Ta'imatɨrieka tukariyari kanehuraniri, 'ariri kanaye'ani,
tatukari naitɨ pɨ'inɨatsie.
19Memɨtatsi'aye'unie matsi kwinimieme mepayɨwawekai
keyuri kwixɨtsi muyuawitsie miemete,
hɨritsie mepɨtatsi'uweiyatɨkɨkakai,
makumawetsieta mekataniuhupieni.
20Meta kaniuwiyarieni ti'aitame Yawé menayexei,
mɨkɨ hetsie tetewiyatɨ temu'uwakai.
Mɨkɨ pɨhɨkɨtɨkai hetsiena mieme mɨpaɨ temutiyuanekai:
Mɨkɨ 'etɨriyayatɨa te'u'uwatɨ nuiwarite watsata tepu'uwani.
21Kene'atemawieka meta keneutanaweni, 'Erumi kiekariyari,
'Utsi kwieyaritsie, 'uka ti'aitame hepaɨ pemɨtika.
Peru 'arike 'ikɨ tekɨxita 'ekɨta pepanu'ieni,
hikɨ 'ana pepɨtitaweni meta pemawetɨ pepayani.
22Tsiyuni witsipemɨti'ɨimarikai, kanaye'atɨarieni kepemɨtikwinitɨarienikekai,
Kakaɨyari tawariri xeime kwieyaritsie pɨkamatsi'anɨnɨ'ani.
Peru 'ekɨ, mɨmariwe 'Erumi kiekariyari, kamani'uximatɨamɨkɨ ke'axapemɨtiuyurikɨ
meta naime ke'axapemɨtiuyuri katinitahekɨatamɨkɨ.
Currently Selected:
Hiwerika 4: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
