Keremiyaxi 10
10
Kakaɨyari meta kakaɨyarixi
(Ker 10:12-16 – Ker 51:15-19)
1'Ixaheritsixi teɨteriyari, xekeneu'eni Yawé niukieya. 2Mɨpaɨ kanaineni:
«Xeme xepɨkawa'ɨkeni hipatɨ nuiwarite kememɨteyurie,
meta xepɨkamamaka 'inɨari muyuawitsie miemekɨ,
tsepa hipatɨ nuiwarite memimakaxe.
3Teɨteri wayeiyari
tixaɨtɨ pɨkatihɨkɨ.
Kɨye mepawiteke 'ɨtsita,
kɨyekɨ mɨti'uximayatawe pititsatsewe.
4Hurukɨ meta pɨratakɨ witsi'aneme mepayeitɨwa,
kɨrapuxikɨ menikutseiriyani meta titsunamekɨ
mɨkawatayuanenikɨ.
5»Wakakaɨyarixima mepɨkaniuwawe,
'ewieri wikixi wamariutame hepaɨ mepɨtematsiɨkɨ
xutsi ma'etsietsie muwe hepaɨ.
Peuyewetse memɨkɨtɨkietɨweni
memɨka'ɨkɨniwawekɨ.
Xepɨkawamakarɨka,
'axamemɨxe'uyurieni mepɨkayɨwawe,
metatsiere 'aixɨa memɨxe'uyurieni».
6Yawé, xewitɨ pumawe 'ahepaɨ 'anetɨ.
Pepɨmariwe 'ekɨ,
'ekɨ yemekɨ pepɨmariwe meta pepɨtɨrɨkaɨye.
7¿Kemɨ'ane pɨka'itimakani, yunaime nuiwarite Tiwa'aitɨwame?
'Ekɨ mɨpaɨ pɨreuyewetse 'ahetsiemieme.
Yunaitɨ memɨtemaiwawe memu'uwa watsata,
meta yunaitɨ te'aitamete watsata,
xewitɨ pumawe 'ahepaɨ 'anetɨ.
8Yunaitɨ mepɨka'u'iyari 'axamemɨteyurienikɨ xeikɨa pɨwanake,
kɨyexi kakaɨyarixiyari 'ɨxatsitamete mepɨhɨkɨ wahetsiemieme.
9Taritsi paitɨ patɨwa pɨrata 'etsimutsutsui,
meta 'Upatsi huru patɨwa.
Memɨkakakaɨyarixi wa'ɨkiyari, mɨtataɨrawi meta mɨxeta memanakatɨtɨka,
teɨteri tewewiwamete meta tepɨa kwaniyamete
mɨkɨ yunaitɨ wawewiya mepɨhɨkɨ.
10Peru Yawé xeikɨa yuri Kakaɨyari kanihɨkɨtɨni,
Kakaɨyari mayeyuri, yuheyemekɨ Ti'aitame.
Kepauka muyeha'arɨwe, kwie kanewatayuaneni,
nuiwarite haxɨaya memunewieni mepɨkayɨwawe.
11«Mɨpaɨ pepɨtiwatahɨawe: “Mɨkɨ kakaɨyarixi muyuawi memɨka'utawewi meta kwie, mekanikumawerikuni 'ena kwiepa meta muyuawi hetɨa”».
12Kakaɨyari kwie kaniutawewieni yutɨrɨkariyakɨ,
kemɨtimaiwekɨ kwie 'aixɨa katiniuyeni,
muyuawi 'ayeume kanayeitɨani kemɨtimaiwekɨ.
13Kepauka mɨkɨ mɨtaniuni,
tɨranarikɨ haa muyuawitsie pakaneika,
hai kanewa'iniwani
kwie manuye'atɨka paitɨ.
Mimierɨkaritsata wiyeri kaneyenɨ'awani,
meta 'eka muye'ɨnetɨkatsie peiyepiwa.
14Teɨteri 'atsimemɨkatemate meta memɨte'ukatawe'erie mepɨhɨkɨ,
kakaɨyarixi wawewiwamete mepuyutetewiya yuwewiyakɨ.
Tita memɨtewewie pɨti'itarika,
meta mepɨka'ayeneniere.
15Tixaɨtɨ mepɨkateyunaki'erie, wawewiya pɨnanaiyɨkɨ xeikɨa,
kepauka tukari maye'ani memɨtekwinitɨarienitsie, mepɨka'unarieni.
16Kakaɨyari Kakuwu manayexei nuiwarieya mayanikɨ mɨkɨ wahepaɨ pɨka'ane,
matsi mɨkɨ naime mɨtiunetɨa kanihɨkɨtɨni,
Yawé Naimekɨmɨtɨrɨkaɨye katinitewaka,
meta nuiwarieya 'Ixaheri kanihɨkɨtɨni.
Kememɨteka'unarieni peutihura
17'Apiinite ketineukuteɨxi kwiepa,
'ekɨ 'akiekari manutinamie.
18Karikɨ mɨpaɨ kanaineni Yawé:
«Hikɨrixɨa 'ikɨ kwieyaritsie kiekatari 'ateewa neniwarexɨrimɨkɨ
texupamekɨ nemɨwarexɨrieni hepaɨ.
Hura meti'uitɨariekame nekaniwarayeitɨamɨkɨ,
meta yanekatiniwapitɨamɨkɨ mɨkɨ memɨtiwiyarienikɨ».
19Xɨa'ui ne, nepeutimurariexɨa.
Kenemɨtiukwinitɨarie pɨkayu'uayemarinɨa.
Peru pɨnekwiniya
peuyewetse neminewieka.
20Naitɨ nexamaru puka'unarie,
meta naitɨ pɨteteki nekaunarite.
Neniwema 'ukitsi yunaitɨ mepɨnetsi'uku'eiri,
mepɨka'u'uwari.
Xewitɨri pumawe nexamaru mɨtawewieni,
meta ne'ixuriki kiiyari mɨkawieni.
21Muxatsi wahɨwemete 'atsimekatemaitɨ mepakɨ,
Yawé mepɨka'utiwau,
'ayumieme kememɨteku'eriwakai yapɨkatiuyɨ,
wamuxatsi naitsarie mepeutaxɨriexɨa.
22Xekeneu'enana. Niuki kani'atɨarieni.
Tɨranari 'upamie tayeta kiekatari wahetsɨa payeneni,
Kura kiekariyari tepayani
yawixi memayu'eririya wakie, kii 'unimeyari kwinienetɨ muwe kanayeimɨkɨ.
Keremiyaxi nenewierieya
23Yawé, ne nepɨtimate tewi
yutukari pɨkakutsiyari,
pɨkapitɨarie yeikame
kemɨtinake mumieni.
24Yawé, keneneutaheitseritɨa perutsɨ heitseriemekɨ,
hawaikɨ 'ahaxɨakɨ, mɨpaɨ pekaneniuka'unaweni.
25Hipame nuiwarite wahetsie pɨta 'ahaxɨa keneukanɨ'a,
memɨkamatsimate wahetsie,
meta 'iya memɨkamatsihahɨawe wahetsie.
Karikɨ Kakuwu mekaniutakwani,
naime mekanaxɨni,
meta kiena makumawe mekanayeitɨani.
Currently Selected:
Keremiyaxi 10: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
