Keremiyaxi 9
9
1Nemu'u haixa xɨka hɨkɨtɨnike,
meta nehɨxite 'ukai haixayari,
tukarikɨ meta tɨkarikɨ nemutsuanenikɨ,
neniwe 'uka teɨterimama memukwi'iwaxɨkɨ.
2Makumawetsietɨ kii nemɨnexeiyani
huye tetsita.
Neteɨterima nepuwaruku'eiriwe,
'ateewa nepeyeiwe.
Yunaitɨ mɨkɨ hipame wa'ɨitama memɨwakumaɨwa mepɨhɨkɨ,
yunaitɨ mepɨnetsi'uku'eiri hipame mepɨwaranukuwei.
3«Waneni 'itarikakɨ pɨtikuxata xeikɨa 'ɨrɨ tupitsie waɨkawamekɨ mɨtiutamɨni hepaɨ,
'ikɨ kwieyaritsie 'itarika pɨrayu'iwa, tita yuri mɨraine pɨkatixaɨ,
'axa'anemetsie meyuka'uitɨwatɨ matsi kwinimieme mekateniyurieka ne mepɨkanetsimate
—Yawé mɨpaɨ kanaineni—.
4Xekeneyu'ɨwiyani tsepa mɨ'ahamiku,
yu'iwama yuri xepɨkatewa'eririeka,
tsepa mɨra'iwa mepɨteyu'itaiya,
metatsiere hamiku pɨtiuyukananaima.
5Yunaitɨ mepɨteyu'itaiyatɨwe,
yurikɨ mepɨkateyukuxaxatɨwa.
Yuneni mepɨte'uta'ɨkitɨa mɨti'itawanikɨ,
meta 'axamepɨteyurie kepaukake memɨti'uxe.
6»Keremiyaxi, 'ekɨ memɨte'itawa watsata pekaniuyeikani,
yu'itarikakɨ mepɨkayuwaɨriya memɨnetsihetimanikɨ»,
Yawé mɨpaɨ kanaineni.
7'Ayumieme, mɨpaɨ kanaineni Yawé Naimekɨmɨtɨrɨkaɨye:
«Ne 'aixɨa nekanixetiyurimɨkɨ, nekanixeta'inɨatamɨkɨ.
¿Ketawari netiyurieni neteɨterima wahetsiemieme?
8Waneni 'ɨrɨ hepaɨ pɨ'anene pɨmɨya,
wateni 'itarika xeikɨa pɨmate,
'aixɨa mepɨtekuxata yuhamikuma wahamatɨa,
peru yutaɨta mewawiniyatɨwetɨ».
9Yawé mɨpaɨ kanaineni:
«¿Kareuyewetse mɨkɨkɨ ne nemɨtixekwinitɨani?
¿Kareuyewetse teɨteri mɨpaɨ nemɨtiwarakapitɨanikɨ kememɨte'uyurikɨ?»
10Nekanititsuamɨkɨ meta ne'uta'aiwatɨ hɨritsie,
makuweritsie makumawetsie hiwerika kwikariyari nekaniutakwikamɨkɨ,
makumawe mɨhɨkɨkɨ:
yuxewitɨri mana pɨka'uyeika
tewaxi watsuari pɨka'enierieri.
Wikixitɨtɨ metatsiere yeutari,
yunaitɨ mepɨteheuyuta'unaxɨa.
11«Kiekari Kerutsareme kii 'unimeyari kwinienetɨ muwe nepayeitɨani,
yawixi memayu'eririya wakie nepayeitɨani.
Makumawe nepayeitɨani Kura kiekariteyari,
teɨteri mana mekatiteme nepayeitɨani».
12¿Kemɨ'ane kwinimieme pɨtimaiwe 'ikɨ metimaitɨyanikɨ? ¿Kemɨ'ane Yawé pitahɨawixɨ, 'ikɨ naime hepaɨtsita mɨtitaxatakɨ? ¿Titayari 'ikɨ kwieyari tiuka'unarie, yuxaɨta tikuma makumawe hepaɨ xewitɨ mana mɨka'uyeyeikanikɨ?
13Yawé mɨpaɨ kanaineni: «Mɨkɨ ne'inɨari niukiyari mepuku'eiri nemɨwayetuiri, mepɨkanetsi'anu'eni meta mɨpaɨ mepɨkate'u'uwakai. 14Yu'iyari mɨkaheu'ena mepanukuwei, Wahari kakaɨyarixiyarite mepɨwaranukuwei, wa'ukiyarima kememɨtewaru'ɨkitɨa». 15'Ayumieme, mɨpaɨ kanaineni Yawé Naimekɨmɨtɨrɨkaɨye, 'Ixaheri Kakaɨyarieya: «'Ikɨ teɨteri 'ikwai hatsiwime neniwatimimɨkɨ meta haa 'uayemakame neniwatiharitɨamɨkɨ. 16Naitsarie nuiwarite watsata nepɨwataxɨriexɨani teɨteri memɨkawamate meta watutsima memɨkawaretima wahetsɨa, nepɨwaranukuweiya 'ixiparakɨ kepaukake yunaime nemɨwakwini».
17Mɨpaɨ kanaineni Yawé Naimekɨmɨtɨrɨkaɨye:
«Kayuwatɨ xekeneu'enana. 'Ukarawetsixi tsuakamete xekeniwarutahɨawi.
Kwinie memɨteheutatsuawawe meke'u'axɨani.
18Xeiya meke'u'axɨani,
tahetsiemieme meke'utitsuanani.
Tahɨxita 'ukai kanitihɨnimɨkɨ,
meta ta'ukai kananakaxɨrimɨkɨ,
19Tsiyuni paitɨ kana'eniɨriɨkɨni tsuari meta hiwerika:
“Tepuka'unarie,
teputewinɨarie yemekɨ.
Peuyewetse takwie temuku'eirienikɨ,
takiite naitɨ mutiuka'unariekɨ”».
20'Ukarawetsixi, xekeneu'eni Yawé niukieya,
xenakate ke'i'enieni niuki tetana mieme.
Yuniwema 'ukari xeketenewa'ɨkitɨaka kwikari hiwerikapa mieme,
meta hipatɨta mekeyuti'ɨkitɨani 'ikɨ hiwerika kwikariyarikɨ:
21«Mɨɨya 'ituparite 'etsimayeyeutsie nenieremeta kaneutahani,
taparatsiyuta kaneutahani,
tɨɨri kaniwarutayuniya kaye'utɨma memu'uwakai,
meta temari teɨteri memayukuxexeɨriwatsie memu'uwakai.
22Mɨkite mepeutihe hayekɨa
kwitarai hepaɨ mɨraka'etsitɨretsie,
mɨaxa hepaɨ 'ihɨayame 'utɨa mɨyehixime,
xewitɨ mɨka'iti'ɨwe»,
Yawé mɨpaɨ kanaineni.
23Yawé mɨpaɨ kanaineni:
«Pɨkayuta'ɨreni mɨtimaiwe mɨtimaiwekɨ,
meta mɨtɨrɨkaɨye yutɨrɨkariyakɨ,
meta mɨxiku mɨrexeiyakɨ.
24Xɨka xewitɨ yuta'ɨrimɨkɨ,
keyuta'ɨre mɨnetsimatekɨ
meta mɨpaɨ mɨretimakɨ kename ne Yawé nehɨkɨ,
nemɨti'uximaya kwiepa naki'eriyakɨ,
heitseriemekɨ meta 'aixɨa 'anemekɨ,
netsɨ mɨpaɨ kanetininakeni
—Yawé mɨpaɨ kanaineni—.
25Yawé mɨpaɨ kanaineni: «Tukari kanaye'amɨkɨ kepauka ne nemɨtiwakwinitɨani kemɨ'ane xeikɨa yuwaiyaritsie xitekiya 'inɨariyari memexeiya: 26'Ekipitu nekatinikwinitɨamɨkɨ meta Kura, 'Erumi, 'Amuni, Muhawi, meta yunaime makumawetsie memu'uwa yumu'utsie memuyukaxika. Yunaitɨ nuiwarite xitekiya 'inɨariyari mepɨkahexeiya, peru matsi 'ixaheritsixi xitekiya 'inɨariyari yu'iyaritsie mepɨkahexeiya».
Currently Selected:
Keremiyaxi 9: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
