'Utseyaxi 1
1
1'Ikɨ Yawé kaniniukieyatɨni 'Utseyaxi Weherí nu'aya kemɨtiyetuiri, 'Utsiyaxi, Kutani, 'Akatsi meta 'Etsekiyaxi kepauka memɨte'aitakai Kura kwieyaritsie, meta Keruwuhani Kuhatsi nu'aya ti'aitakaku 'Ixaheri kwieyaritsie.
'Utseyaxi 'ɨyaya meta niwemama
2Kepauka Yawé 'Utseyaxi hamatɨa matɨari mɨtiutaxa, mɨpaɨ katinitahɨawe: «Kenemie xeime 'ukaratsi tuminikɨ muyuwitɨnɨa kenetiwitɨki, hetsiena tɨɨri keniwarayexeiya, mɨkɨ kwieyaritsie mɨpaɨ memɨyɨakɨ yunaitɨ. Yawé me'uku'eirieka hipame kakaɨyarixi pɨta mekaniwarayexeiyakaitɨni».
3Hikɨ 'Utseyaxi kaneyani, Kumexi titewakame kaniutiwitɨni Riwɨrahini niweya, mɨkɨ kaniutihukata nunutsi mekanayexeiya.
4Hikɨ Yawé mɨpaɨ katinitahɨawe: «Ketsireri ketineuterɨwa, kwitɨwari Kehú nekatinakapitɨamɨkɨ nuiwarimama nekatiniwakwinitɨamɨkɨ, mana Ketsireri mɨrakutewatsie mɨkɨ teɨteri yɨwaɨkawa mɨwarekwikɨ. Mɨpaɨ nekatiniwaka'unamɨkɨ 'Ixaheri kwieyaritsie te'aitamete. 5Mɨkɨ tukaritsie 'ixaheritsixi watupi nepɨtimuraxɨani mayeweritsie Ketsireri mɨrayetewatsie».
6Kumexi tawarita kaniutihukata 'ukatɨme kaniutiniweni. Hikɨ Yawé 'Utseyaxi mɨpaɨ katiniutahɨawe: «Mɨpaɨ ketineuterɨwa Ruxuhama, taniukikɨ manuyɨne “Nepɨka'itinenimayatari”, nepɨkareiyehɨwiriekari 'Ixaheri mɨra'aitatsie, matsi nepɨka'itinenimayatari. 7Matsi pɨta wahetsiemieme nekaniwatinenimayatamɨkɨ Kura nuiwarimama meta nekaniwatawikweitsitɨamɨkɨ, peru 'ɨrɨkɨ, 'ixiparakɨ, kuyaxakɨ meta kawayutsixi wahetsie me'anatetɨkaitɨ pɨkatiyɨni, matsi pɨta Yawé xekakaɨyari tɨrɨkariyayakɨ pɨtiyɨni».
8Kepauka Kumexi niweya katsitsewetɨ matɨa «Nepɨka'itinenimayatari» mɨtitewa, tawarita kaniutihukata 'ukitɨme kaniutiniweni. 9Hikɨ Yawé 'Utseyaxi mɨpaɨ katiniutahɨawe: «Mɨpaɨ ketineuterɨwa Ruhami, taniukikɨ panuyɨne “Mepɨkaneteɨterimari”, xemeri xepɨkaneteɨterima neta nepɨkaxekakaɨyari.
10»Peru 'uxa'atɨni warie 'ixaheritsixi teɨteriyari, yumɨiretɨ mepakɨne xiekari haramaratetsita mɨtika mɨkayu'inɨatsinɨa hepaɨ. Kepauka tukari maye'ani xeme hakewa mɨpaɨ xemɨteheterɨwarie: “Mepɨkaneteɨterimari”, mana mɨpaɨ xepɨteterɨwarieni: “Kakaɨyari mayeyuri niwemama”. 11Kura teɨterimama meta 'Ixaheri teɨterimama wahamatɨa mekaniyutaxewirikuni, xeime xeikɨa ti'aitame mehexeiyatɨ mepakɨne yukiekaritsie, 'ana Ketsireri mariwetɨ kanayeimɨkɨ.
Currently Selected:
'Utseyaxi 1: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
