'Utseyaxi 2
2
1»Kepauka memɨ'axɨani xe'iwama 'ukitsi mɨpaɨ xeketeniwaruterɨwa: Hami, taniukikɨ manuyɨne “Mepɨneteɨterimari”. Meta 'ukari Xuhama, taniukikɨ manuyɨne “Nepitinenimayatari”.
'Ixaheritsixi kememɨtekwinitɨariekai meta kememɨte'utinenimayatsie
2»Peru hikɨ yumaama hetsie xeketeneuhɨpani,
mɨkɨri hikɨ pɨkane'ɨya neta nepɨkakɨnaya.
Yuhɨxie mayuyewirie witsimɨtixeiyariekakɨ ke'ayuye'itieni 'axamɨtiuka'iyarikɨ,
meta yutawie kemɨratikuka ketiuhayewa.
3Ya mɨpaɨ pɨkatiuyuri, ne naime nekatininawairiemɨkɨ,
ke'anetɨ mutinuiwaxɨ mɨpaɨ 'anekame nekanihayewamɨkɨ.
Makuwakitsie nekanihɨamɨkɨ.
Kwiepa tixaɨtɨ mɨkaraxuawe nenihayewamɨkɨ, yeharimɨnetɨ kanimɨmɨkɨ.
4Niwemama nepɨkawatinenimayata,
'axamɨtiyuriene hetsie memɨmiemetekɨ.
5Wamaama tuminikɨ muyuwitɨnɨa kanihɨkɨtɨni,
Mɨwarutiniwexɨ ka'uyukatewiyatɨ.
Mɨpaɨ kaniutayɨni: “Netuxexerima wahamatɨa nepukuyeikani,
memɨnetemikwa memɨnetsiharitɨa,
muxa huxarieya, rinu 'ixurikiyari, nehatseiti meta tita nemɨranuye'e”.
6'Ayumieme ne huyetana nepɨranutanani xuyakɨ,
muwa xeikɨa nepiyenaka huye mɨkataxeiyakɨ.
7Waɨkawa tiuka'eniwatɨ yutuxexerima pɨwakuwauneni,
kawataxeiyame mɨpaɨ pɨtayɨni:
“Nekɨna matɨari nemitiwitɨ hetsɨa nepɨnuanikeyu,
matsi meripaitɨ 'aixɨa nepɨtixeiyariekai keyuri hikɨ”.
8Mɨkɨ mɨpaɨ pɨkaretimaiwe kename ne nehɨkɨ nemɨtimikwa,
kaxie winuyari mɨhekwa meta hatseiti nemɨtiyetuirie.
Ne waɨkawa nepɨtimɨiririe pɨrata meta huru,
¿ketiuyuri kɨmana? Memɨkayuri kakaɨyarixi pɨwarutiwewi.#2:8 Pɨyɨwe mɨtayɨni Wahari kakaɨyarixiyari puwarutiwewi.
9»'Ayumieme kepauka tukarieya maye'ani
ne tɨriku nepinawairieni kaxie winuyari mɨhekwa.
Muxa kaheuhuxakame nepɨhayewa meta rinu 'ixurikiyari kahexeiyame
nemɨtiyetuiriekai mawekaku kɨmana meuyukunakakɨ.
10Nepitewiyatsitɨani mɨirikɨa
tuxexerimama me'ixeiyakaku,
nixewitɨ pɨkayɨweni hetsiena mutanuani.
11Naitɨ mana pɨtiuye'atɨyani 'ixɨarari temawierikayari kemɨtiwewiekai.
Meta kemɨtikuyeikakai metseri xikɨraɨyekaku,
meta kepauka muka'uxipiwekai meta 'ixɨarari kemɨtiutiwewiwakai xeiwiyari 'aye'axekaku.
12Kaxie haraweriyari kemɨrexeiyakai meta piní,
kename mɨkɨ tuxexerimama mete'iyetuiriekai.
Maku'ɨtsiya nepayeitɨani,
yeuta memɨte'u'uwa mekanitikwaikuni xeikɨa.
13Nepɨtikwinitɨani mɨkɨ tukaritsie
hipame kakaɨyarixi mɨtiwarutimawiriwakaikɨ,
kepauka witsitiyukukemaritɨwatɨ nakɨtsatekɨ meta kukakɨ
ne kanetsiha'eriwatɨ, yutuxexerima wa'utɨma xeikɨa peyeikakai
—Yawé mɨpaɨ kanaineni—.
14»'Ayumieme hikɨ nekatini'irɨwiyamɨkɨ:
makumawetsie nekanenuwitɨmɨkɨ
mana witsi'anekamekɨ nekaneitahɨawimɨkɨ.
15'Ana nekaniyetɨiriemɨkɨ kaxie haraweriyari,
mayeweritsie waɨkawa Kemɨtiuka'eniwakai
'aixɨa 'aneme nepayeitɨani memanukɨka Mɨnetsitakwewiekɨ.
Mana pɨnetsita'eiya temaikɨyari hepaɨ,
kepauka 'Ekipitu mayetɨatsie hepaɨ.
16»Yawé mɨpaɨ kanaineni: Kepauka maye'ani tukari
mɨpaɨ pepɨkanetiuterɨwani: “neti'aitɨwame”,
matsi pɨta: “nepɨmatsinaki'erie nekɨna”.
17Ne nepɨmeratɨmaiyatsitɨani tawarita pemɨkawakuxatanikɨ memɨkayuri kakaɨyarixi,
hatsuakuri pemɨkawatahɨawe.
18Mɨkɨ tukaritsie tɨratu nepɨwewieni
Yeutari wahamatɨa,
muyuawitsie memɨte'uwɨtɨkɨka wahamatɨa
kwiepa memɨteku'ɨretɨwe wahamatɨa.
Kiekari mukumanetsie tupi nepɨwanawairieni, 'ixipara, kuyaxi meta
para 'aixɨa 'anemekɨ xemu'uwanikɨ yunaitɨ.
19Ne ne'ɨya nematsi'ayeitɨani yuheyemekɨ,
nematsi'awitɨkɨni heitseriemekɨ 'aixɨa 'iyari,
teyunaki'erietɨ teteheuyuyehɨwirietɨ.
20Pepɨnetsihetimani heitseriemekɨ kenemɨtiuka'iyari hatsuaku nepɨkamatsiku'eirieni,
hikɨ 'ana Yawé pekanetimaimɨkɨ.
21»Yawé mɨpaɨ kanaineni: Mɨkɨ tukaritsie ne yanepɨtikamieni,
ne muyuawitsie paitɨ nepɨxeku'eiyani,
meta muyuawi kwie pɨ'enieka,
22Kwieta 'imɨari pɨxuaweriyani,
kaxie winuyari mɨhekwa huriwa hatseitiyari meta,
mɨkɨkɨ mekaniwata'eiyakuni Ketsireri.#2:22 Ketsireri taniukikɨ paine Kakaɨyari puka'etsa.
23Ne nehetsiemieme kwiepa nepɨwaka'eni.
“Nepɨka'itinenimayatari” mɨkɨ wahetsiemieme nepɨwatinenimayata.
“Mepɨkaneteɨterimari” nepɨtiwaterɨwa, “Mepɨneteɨterimari”,
mɨkɨta mɨpaɨ mepɨtiyuani, “Pɨtakakaɨyari”».
Currently Selected:
'Utseyaxi 2: hch
Highlight
Copy
Compare
Share
Want to have your highlights saved across all your devices? Sign up or sign in
© 2020, Wycliffe Bible Translators, Inc.
