Lituto za Siraki 43
43
Lizazi
1Kaniti luli lihalimu ki le linde
hahulu ha lu li talima,
mi mbyumbyulu ya lu komokisa
ha lu i bona.
2Lizazi ha li taha li bonahaza
ku pazula kwa lona,
ili nto ye komokisa hahulu ya musebezi
wa Muambakani ya Pahami!
3Musihali li omisa lifasi kamukana.
Ki mañi ya ka kona ku yemela ku cisa
kwa buhali bwa lona?
4Mutu h'a bata mufutumala
u swanezi ku tukisa litumbutumbu,
kono lizazi lona li cisa hahulu
fa malundu mane ku fita mulilo
halalu.
Li tisa buhali bwa lona bwa mulilo,
mi ku benya kwa lona ku fata meeto.
5Ki yo mutuna,
yena Muñ'a Bupilo ya li ezize,
mi li akufiswa ki taelo ya hae
mwa musipili wa lona.
Kweli
6Mi hape ni yona kweli
kamita ha i liyehi
ku toma likweli ni likalulo za nako.
7Ki kweli ye lu zibisa lisupo
za mikiti,
ili liseli le li isa kwa lififi
mwamulaho a busweu bwa yona.
8Likweli li fumana mabizo a zona
ku yona,
mi i hula ka mukwa o komokisa,
ni ku ba ni liseli le li zamaisa
makuta a lihalimu,
le li benya mwa mbyumbyulu.
Linaleli
9Kanya ya linaleli i eza bunde
bwa lihalimu,
ili likabisa ze nde hahulu
mwa lihalimu la Muñ'a Bupilo.
10Ka manzwi a Ya Kenile Hahulu
li yema sina balibeleli,
mi ha li katali mwa musebezi
wa zona.
Nambwamutalati
11A mu bone nambwamutalati
mi mu lumbe y'a mu ezize,
yo munde hahulu cwalo ni ku benya
kwa hae.
12U taalalile mwahalimu ka mibamba
ye obami
inge buta bo bu kopamisizwe
ka lizoho la Ya Pahami Hahulu.
Lika za lifasi ze komokisa
13Ka taelo ya hae u lumela litwa.
U akufisa lumonyi ka mw'a laelela.
14Kamukwaoswana lipulukelo za hae
za kwaluluha
mi malu a hasana inge linyunywani.
15Ka maata a hae a matuna
u kopanya malu
mi u a eza simbwewewe.
16Ka ponahalo ya hae malundu
a nyanganya.
Ka mulumo wa mushika wa hae
lifasi la pikuluha.
17Ka taelo ya hae moya wa mboela
wa fuka,
mi moya wa mutulo ha u fuka,
ku taha liñungwa le lituna.
18U fafaza litwa sina linyunywani
ze lula,
mi li wela fafasi sina nzie ye lula.
Meeto a fatwa ki bunde bwa busweu
bwa lona,
mi ngana i komokiswa ki muwelo
wa lona.
19Fa lifasi u sela silami se situna
hahulu,
se si swana sina lizwai,
se si li ha si anda cwana,
mane si taba-taba inge miutwa.
20Moya o bata u zwa kwa mutulo,
silami si kangela fahalimw'a mezi
mwa kasa ni kasa,
mi mezi a ikapesa sona
inge sisilelezo sa fa sifuba.
21Si apesa malundu kaufela
ni ku cisa lihalaupa sina mulilo,
mi si omisa limela kamukana.
22Kono mbundu i pilisa lika kaufela
kapili,
mi mwamulaho wa ku cisa
ku taha puka ye tisa tabo.
23Ka maata a hae u kuzisize mawate
mi u beile mwateñi lioli.
24Ba ba fuluha mwa liwate
ba bulela litaba za likozi za lona.
Litaba za teñi ha lu li utwa
lu komoka hahulu.
25Ni hona mo hape ku na ni lika
ze makaza ni misebezi ye komokisa,
ili lifolofolo za mifuta-futa,
ni libupiwa ze tuna hahulu
za mwa liwate.
26Lu itumele ku yena kakuli lika
kaufela li fela hande,
mi ka tuso ya linzwi la hae,
kaufel'a zona li swalana hande hamoho.
27Niha lu ka bulela hahulu,
ha lu na ku kona ku li talusa kaufela.
Ka ku kusufaza,
“Yena, ki yena ya maata kaufela.”
28Lu ta fumana kai maata a ku mu
lumbeka,
kanti yena ki yo mutuna
mi u fita lika z'a ezize kaufela.
29Muñ'a Bupilo wa sabisa
mi ki yo mutuna hahulu,
hape maata a hae a komokisa luli.
30Mu tumise Muñ'a Bupilo
mo mu konela kaufela,
kono yena u sa mi fita.
Niha mu ka felelwa ki maata,
mi mu mu lumbeka mu sa katali,
ha mu na ku fita kwa mafelelezo
ni kamuta.
31Ki mañi ya kile a mu bona
kuli a mu taluse?
Ki mañi ya kona ku mu tumisa
ka swanelo?
32Ku sa na ni lika ze ñata
ze lu patezwi ili ze tuna ku fita ze,
kakuli lu boni feela li sikakañi
ku za misebezi ya hae.
33Yena Muñ'a Bupilo kasibili
ki yena ya ezize linto kaufela,
ni ku fa butali ku ba ba mu lata.
Currently Selected:
Lituto za Siraki 43: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.