Lituto za Siraki 42
42
1Ki ze lika z'o sa lukeli ku swabela,
mi u si ke wa eza sibi kabakala sabo
ya ze ba hupula batu.
2U si ke wa swabela ku kuteka
Mulao wa Ya Pahami Hahulu,
kapa ku lukulula ya maswe
h'a si ka fosa.
3U si ke wa swabela ku buluka
litifo kaufela za muzamai,
ku ikabela libyana za mufu
ni banabahenu.
4U si ke wa swabela
ku likanyeza hande lika fa sikala
ni bukiti bwa zona,
ni ku eza liñambeko ze tuna
ni ze nyinyani.
5Mi u si ke wa swabela ku fumana mupuzo
mwa musebezi wa litekiso.
U si ke wa swabela ku hulisa bana
ba hao ka likute
ni ku nataka mutanga ya maswe
ku fitela a zwa mali.
6Haiba musal'a hao h'a sepahali
kapa ku sebeza batu ba bañata,
u buluke hande lika ni ku li kiyela.
7Lika kaufela z'o beya mwa pulukelo,
u li bale, ni ku ziba bukiti bwa zona,
mi z'o amuhela ni z'o zwisa kaufela
u li ñole.
8U si ke wa swabela ku sikulula mutu
ya si na ngana kapa sikuba,
kamba munna-muhulu ya zamaya ni mahule.
Haiba u eza cwalo u ta iponahaza
kuli u itutile luli,
mi u ta lumelelwa ki batu kamukana.
Pabalelo ya mushemi ku mwana hae wa musizana
9 #
Litu 7.24-25; 26.10-12 Musizana h'a zibi mw'a tokwiseza
ndat'ahe buloko,
ni kuli lipilaelo z'a mu tahiseza
li mu tiseza sikobyoti,
inz'a li mwendi h'a na ku nyalwa
a sa li yo munca,
kamba haiba u nyezwi mwendi
h'a na ku latiwa.
10Pilaelo ye ñwi ki ya kuli
mwendi a ka swana a isilafaza a sa li
mwalyanjo
ni ku fumana mulwalo a sa li habo,
kamba haiba a na ni munna a ka swana
a mu nyaza,
ni kuli mwendi nih'a ka nyalwa
h'a na ku pepa.
11Naa mwan'a hao wa musizana
u mahañi?
U mu tokomele, a ka swana
a ku sehisa lila za hao,
a be ngambolo ya mwa hae,
ni ku ku swabisa hahulu kwa nyangela.
Za basali
12U si ke wa talima bunde bwa munna
ufi ni ufi,
mi u si ke wa kena mwa siango
sa basali ba bañwi.
13Mafele a fumaneha mwa liapalo,
mi lunya lu zwa kwa basali.
14Lunya lwa munna ki lo lunde ku fita
musa wa musali,
kakuli musali u tiseza bumaswe
ni maswabi a matuna.
Maata a Mulimu mwa misebezi ya hae
15Cwale ni ta ku hupulisa ka misebezi
ya Mulimu,
ni ku ku bulelela ze ni boni.
Misebezi ya Mulimu kaufela i ezahala
ka linzwi la hae,
mi libupiwa kamukana li utwa taelo
ya hae.
16Sina lizazi ha li benya, li talima
lika kaufela,
cwale ni ona musebezi wa Muñ'a Bupilo
u tezi kanya ya hae.
17Muñ'a Bupilo h'a si ka fa mangeloi
ku bulela za misebezi ya hae kamukana
ye komokisa,
ye lukisizwe ka ku tiya
ki Mulena ya Maata Kaufela
kuli lifasi li tiyele fateñi
mwa kanya ya hae.
18U ziba butungi ni pilu ya mutu
mi u boni mikwa ya zona,
kakuli Muñ'a Bupilo
u ziba zibo ye li teñi kamukana
mi u lemuhile litemuso za linako.
19U zibahaza ze felile ni ze sa taha
mi u bonahaza mitala ya lika ze
patilwe.
20Ha ku na muhupulo o ka ipata
ku yena,
kamba linzwi nihaili li li liñwi feela
le li ka patahala ku yena.
21U file litukiso fa misebezi ya maata
a butali bwa hae,
mi ki yena wa makalelo
ni wa mafelelezo kuya kuile.
Ha ku na se si ka ekezwa
kamba ku zwiswa ku yena,
mi h'a tokwi kelezo ya mutu.
22Misebezi ya hae kamukana
ki ya butokwa cwañi,
mi i fata meeto ike liseli
ha u i bona.
23Lika kamukana li pila ni ku ba teñi
kuya kuile,
mi kamukana zona za mu utwa
mwa mikwa kaufela.
24Lika kamukana li zamaya ka bubeli
li nze li singanya,
mi ha ku na s'a si ka kondisa hande.
25Ye ñwi ni ye ñwi i tiisa butuna
bwa ye ñwi.
Cwale ki mañi ya ta kona ku feleleza
ku bona kanya ya hae kaufela?
Currently Selected:
Lituto za Siraki 42: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.