Lituto za Siraki 37
37
Balikani ba buhata
1Mulikani ufi ni ufi u ta li,
“Ni na, ni mulikan'a hao,”
kono balikani ba bañwi
ki balikani feela ka libizo.
2Kikuli ha si maswabi a utwisa
butuku hahulu,
ku fetuhelwa ki mwanahenu
kapa mulikan'a hao?
3Oho, wena munahano o maswe,
n'o ezelizweñi
kuli u taze lifasi ka bupumi?
4Mulikani yo muñwi u kona ku ikola
kwa litohonolo ze nde
za mulikan'a hae,
kono ka nako ya butata
wa mu fetuhela.
5Kono yo muñwi u nyanda
ni mulikan'a hae, a sa bilaeli,
mi ha ku taha ndwa wa mu lwanela.
6U si ke wa libala mulikani
ya ku lwanezi mwa ndwa,
mi u si ke wa mu libala
ha s'o fumile.
Baelezi
7Muelezi kamukana u ta fa kelezo
kono ba bañwi ba wayela kwa mikundi
ya bona.
8U tokomele mutu ya ku eleza.
Pili u zibe s'a bata,
kakuli kelezo ya hae i zamaelela
ni takazo ya hae.
Mwendi fokuñwi u ku lelile.
9U ka ku bulelela kuli,
“Wena u eza hande luli,”
kono ku tuha fo u y'o sinuha
kuli a bone se si ta ku tahela.
10U si ke wa kupa kelezo ku mutu
ya ku nahanela maswe.
U pate milelo ya hao
ku ba ba ku shwela muna.
11U si ke wa buza musali
ka za muhalizo wa hae,
kapa lipyeha ka za ndwa.
U si ke wa buza mulekisi
ka za liteko,
muleki ka za tekiso,
mutimani ka za buitumelo,
kamba ya na ni ñole ka za bunde.
U si ke wa buza mutu ya buzwa
ka za musebezi ufi ni ufi,
kapa mubeleki wa zazi li li liñwi
feela ka za ku feza musebezi,
kapa mutanga ya buzwa
ka za musebezi o mutuna.
U si ke wa sepa likelezo za ba ba
cwalo.
12Kono kamita u sepe ba ba saba
Mulimu,
ili b'o ziba kuli ki babuluki ba milao,
ba mioya ye lumelelana ni wa hao,
mi ili ba ba li, haiba u fosa,
ba ta ku shwela makeke.
13Kwa mafelelezo, u tundamene kelezo
ya pilu ya hao.
Ha ku na ya ta kona ku ba wa niti
ku i fita.
14Hañata mutu u lemuswa hande
ki pilu ya hae
ku fita balibeleli ba supile
ba ba li fahalimw'a tawala.
15Mi kwand'a lika ze kaufela mu kupe
Ya Pahami Hahulu ku mi etelele
mwa buniti.
Butali bwa niti ni bwa buhata
16Munhano ki ona makalelo a likezo,
mi u lukela ku ba teñi pili musebezi
kaufela u si ka ezahala.
17Mihupulo kaufela i zwa mwa pilu
mi i aluhanezi mwa mikwa ye mine,
18ili bunde, bumaswe, bupilo ni lifu,
mi kamita muzamaisi wa zona kaufela
ki lulimi.
19U hupule ka za mutu ya butali,
ya luta ba bañata,
kono a sa koni ku ikezeza bunde
ili yena.
20Mu nahane mutu ya kona hahulu
ku bulela, kono wa hanyezwa,
mane mafelelezo a hae ki tala feela.
21H'a sa fumani sishemo
ku Muñ'a Bupilo,
u amuhilwe butali kaufela.
22U hupule ka mutu ya ikupula
kuli u butali,
mi likezo za hae za iponahaza
ha u li talimisisa.
23Mutu ya butali luli u ta luta
banabahabo
mi manzwi a hae a ngana
a ta sepahala.
24Mutu yo ya butali u ta fiwa
limbuyoti,
mi ba ba mu bona ba ta li
u litohonolo.
25Bupilo bwa mutu ki bwa mazazi
a likani feela,
kono mazazi a Isilaele
h'a konwi ku balwa.
Ku sa fiteleza liswanelo
26Mutu ya butali u ta sepahala
mwahal'a batu ba habo,
mi libizo la hae ha li na ku fela.
27Mwan'a ka, ha u nze u pila
u keta z'o lumelelana ni zona
ku li ca,
mi u si ke wa lumelela
z'o bona kuli za holofaza.
28Ha si lika kaufela ze nde
kwa batu kamukana,
kapa kuli mutu ni mutu
u tabela lika kaufela.
29U si ke wa tomenena munati wa lico
kaufela.
U si ke wa lata hahulu lico.
30Ku ca hahulu kwa kulisa
mi buñwanyana bwa bipelisa.
31Ba bañata ba bulailwe ki ku ca
hahulu.
U tokomele taba ye,
mi u ta pila nako ye telele.
Currently Selected:
Lituto za Siraki 37: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.