Lituto za Siraki 36
36
Tapelo ya tukuluho ni ku kuta kwa Isilaele
1U lu hauhele, Muñ'a luna.
2Oho Mulena wa linto kaufela
u lu talime mi u sabise macaba
kamukana.
3U lwanise macaba a sili
mi u ba bonise maata a hao.
4Sina m'o iponiselize fapil'a bona
kuli u kenile ku luna,
ni cwale, ni fapil'a luna,
u iponise kuli u yo mutuna ku bona.
5Ba ku zibe sina mo lu ku zibezi luna
kuli ha ku na Mulimu u sili
haisi wena Muñ'a Bupilo.
6U bonise liponiso sinca,
ni ku eza limakazo ze nca.
U ipumanele kanya ka mazoho
ni maata a hao.
7Zusa buhali bwa hao,
mi u bonise bunyemi bwa hao.
U timeze ba ba pihisana ni wena,
mi u felise lila kamukana.
8U akufise lizazi leo,
mi u hupule luci lwani,
mi batu ba bulele ka za likezo
za hao ze tuna.
9Bunyemi bo bu sabisa bu mize
ba ba bandukile,
mi manyando a kenele ba ba kataza
batu ba hao.
10U tubake litoho za babusi
ba ba lunya, ba ba li,
“Ha ku na yo muñwi, haisi luna!”
11U kopanye masika a Jakobo kaufela
hamoho.
U ba kutiseza lianda za bona
sina mo ne ku inezi kwa simuluho.
12Mulena, u hauhele batu
ba ba bizizwe ka libizo la hao,
ili Isilaele y'o ezize sina mwana
wa mweli.
13U bonise mukekecima
kwa muleneñi wa hao o kenile,
ili Jerusalema, sibaka sa lipumulelo
la hao.
14U taze Sione ka lipina
za litumbo,
ni sibaka sa hao se si kenile
ka kanya ya hao.
15U sepahala ku b'o ezize
kwa simuluho,
mi u tahise ze ne polofitilwe
ka libizo la hao.
16U fe ba ba ku lata mupuzo wa bona,
mi bapolofita ba hao ba bonahale
kuli ba sepahala.
17Mulena, u amuhele litapelo
za batanga ba hao,
ka ku latelela limbuyoti za Aruni
kwa batu ba hao.
Eza cwalo
kuli batu ba lifasi kamukana
ba te ba zibe kuli ki wena
Mulena Mulimu ya li teñi kuya kuile.
18Mba i amuhela lico za mifuta-futa,
kono lico ze ñwi ki ze nde ku fita
ze ñwi.
19Sina kalakato mo ka zibela munati
wa nama,
cwale ni yena mutu ya butali
u lemuha kapili manzwi a buhata.
20Wa pilu ye si na buiswalo a tiseza
maswabi,
kono mutu ya na ni zibo wa ziba
mw'a ta mu ezeza.
Ku keta musali
21Musali u ta lumela munna ufi ni ufi,
kono bana ba bañwi ba basizana
ki ba bande ku fita ba bañwi.
22Bunde bwa musali bu tabisa munna,
mi ha ku na s'a lata hahulu munna
ku fita bunde.
23Haiba lipulelo za hae ki ze nde
za musa,
munn'a hae u litohonolo ku fita
banna ba bañwi.
24Munna ya nga musali
u na ni makalelo a litohonolo,
ili mutusi ya mu swanela,
ni musumo f'a yendamena.
25Haiba tutu i si na lukwakwa
i ta ikungelwa feela.
Munna h'a si na musali
u ba muyembani ya ikomokezi feela.
26Kana ku na ni ya ka sepa mutu
ya lwezi lilwaniso,
ya zamaya a kena mwa munzi ni munzi?
Ku cwalo ni ku mutu ya si na ndu,
ya lobala kai ni kai,
fo li mu likelela lizazi.
Currently Selected:
Lituto za Siraki 36: Lozi09
Highlight
Copy
Compare
Share
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.