Nahumi 3
3
1Muleneñi wa mahata, ni wa babulai,
u ka feliswa.
Bufumu bwa ona bu ka sinyiwa
ni ku lobelwa feela.
2Mu teeleze! Ku tunya kwa sime,
lilata la mawili,
ku lika kwa lipizi,
ni mulumo wa likoloi!
3Ba lipizi ba se ba lwana,
mikwale ni malumo z'a benya!
Litupu li kubukanyizwe.
Batu ba ba shwile ha ba na palo,
banna ba sitatala fahalimw'a litupu!
4Ninive, lihule, u fiwa mulatu.
Wa kateleha ka bunde bwa hae,
u tabisize macaba, mi u a kelusize.
5Muñ'a Bupilu u li,
“Ni ka ku tubula, u be mapunu,
mi ni ka tuhela licaba li ku bone,
li ku buhe mwa mapunu ni maswabi
a hao kamukana.
6Ni ka ku eza ka lishwau,
mi ni ka ku apesa ka masila
a nyenyisa.
Batu ba ka ku lubukela ka sabo.
7Mañi ni mañi ya ka ku bona
u ka kutela mwamulaho.
Ba ka li, ‘Ninive s'e li matota!
Ki mañi ya mu shwela makeke?’
Ha ku na ya ka bata
ku mu toba pilu.”
8Ninive, kana u yo munde ku fita muleneñi wa Tebe? Ni ona n'o na ni nuka ye ne u silelelize sina limota. Nile n'e li yona sisilelezo sa ona. 9Kakuli n'o busa naha kaufela ya Nile, maata a ona n'a si na mafelelezo. Libia n'e li mutusi wa ona. 10Kono nihakulicwalo batu ba Tebe ne ba hapilwe. Kwa neku ni neku la mukwakwa bana ba bona ne ba kabaulwa. Banna ba bona ba ba tumile ba ngiwa, ba tamilwe ka mawenge, mi ba abelwa mwahal'a bahapi ba bona.
11Ninive, ni wena u ka wa sina mutu ya kozwi! Ni wena cwalo u ka lika ku toba kwa lila za hao. 12Masabelo a hao a ka swana sina likota za feiga ze na ni miselo ye buzwize. Nyunga likota, mi miselo i ka wela mwa hanu ya hao luli! 13Masole ba hao ba swana sina basali, mi naha ya hao i inzi feela i si na basilelezi fapil'a lila za hao. Mulilo u ka sinya mikwalelo ya kwa minyako ya hao. 14Mu ke mezi ni ku itukiseza manyando a ku beiwa mwahali ki lila. U tiise makwakwa a mina. U ye, u y'o luba lizupa, u eze litina. Lukisa libupiso za sitina! 15Kono nihakulicwalo mu ka cisiwa ka mulilo, kamba ku bulaiwa mwa ndwa. Mu ka zwiswa kaufela sina limela ze cilwe ki nzie.
Mu atile sina nzie! 16Mu ekelize balekisi ba bañata ku fita linaleli ze mwa lihalimu! Kono ka nako ye, ba ile sina nzie ye otolola mafufa mi ya ikela. 17Manduna ba mina ba swana sina mpi ya nzie ye ipata mwa mamota ka zazi la silami. Kono lizazi ha li lila ya fufa, mi ha ku na ya ziba ko i ile!
18Mulena wa Asiria, babusisi ba hao ba bahulu ba shwile, mi banna ba hao ba ba kutekeha ba lobalelezi kuya kuile! Batu ba hao ba hasanezi mwa malundu, mi ha ku sa na ya ka ba tisa kwa hae hape! 19Ha ku na kalafo ye ka ezwa kwa likolofalo za hao, mi mañiba a hao h'a konwi ku alafiwa. Mañi ni mañi ya ka utwa makande a, u ka taba ni ku kandelela ka nyakalalo. Ha ku na ya n'a bandile kwa lunya lwa hao lo lu sa feli.
Lozi Interconfessional Bible, Catholic Edition © Bible Society of Zambia, 2009.