Nahumi 2
2
Ku wa kwa Ninive
1Ninive, wa lwaniswa!
Lila ze ka mi shandaula li fitile.
Mu be mwa libaka za mina!
Mu libelele mikwakwa!
Itukise! Itukiseze ndwa!
2Mulena u bata ku kutisa kanya
ya Isilaele,
sina mo n'e inezi
pili a si ka i amuhiwa
ki lila za hae.
3Masole ba ba ku lwanisa ba lwezi
litebe ze fubelu,
mi ba apezi liapalo ze fubelu
ze swana.
Ba itukiselize ku lwana!
Likoloi za bona li benya
sina mulilo!
Lipizi za bona za lika!
4Ba matisa likoloi za bona
mwa mikwakwa sina ba ba pulumuka.
Ba liba kafa ni kafa mwa lipatelo
za muleneñi.
Likoloi li monyeha sina maboni,
ni ku benya inge lumonyi.
5Manduna ba bizwa.
Ba sitatala ha ba nze ba zwelapili.
Balwani ba matela kwa mamota
ni ku lukisa sisilelezo
sa ba ba lika ku tuba mamota.
6Minyako ya fakaufi ni nuka
ya ikwalula.
Mwa mutala ku tezi sabo ye maswe.
7Muleneñi wa Jerusalema u hapilwe!
Basali ba hae ba bokolola
ni ku sulula mioko.
Ba inata fa lifuba ka maswabi.
8Batu ba mata ku zwa Ninive
sina mezi a mwa libuba!
“Mu yeme! Mu yeme!”
ku huwa linzwi.
Kono ha ku na ya kuta.
9Mu huhule silivela!
Mu kungushule gauda!
Muleneñi u tezi bufumu!
10Ninive u sinyizwe,
u siilwe feela a li matota!
Lipilu li shengununwa ki sabo,
mañwele a ngangama, maata a felile,
lipata li sosobani ka maswabi.
11Cwalehe, muleneñi o n'o swana
inge maipato a litau u kai,
ili sibaka mo ne ku utelwa
bana ba litau,
mo tau ni bana ba yona
ne li ka pilela teñi?
12Tau i bulaile siselo sa yona,
mi i si pazaulezi bahabo yona
ni bana ba yona.
I talize lihaha la yona nama
ye bekilwe.
13“Ni sila sa mina!” ku bulela Mulena Mulimu. “Ni ka cisa makoloi a mina. Ndwa i ka timeza micaha ya mina, mi ni ka nga linto kaufela ze mu ngile ku ba bañwi. Lindumeleti za mina ha li na ku teelezwa mwa lifasi.”
Lozi Interconfessional Bible, Catholic Edition © Bible Society of Zambia, 2009.