Mika 3
3
Mika u nyaza baeteleli ba Isilaele
1Mu teeleze, mina babusi ba Isilaele! Mu lukela ku ba ba ba buluka mulao. 2Kono mu toya bunde mi mu tabele bumaswe. Mu buwa batu ba nze ba pila, mi mu momauna mikamba kwa masapo a bona. 3Mu ca batu ba ka. Mu ba zwabuluza matalo, mu ba lobaka masapo, ni ku ba kabela sina nama ye mwa piza. 4Nako ya ta yeo mu ka huweleza ku Muñ'a Bupilo kono h'a na ku mi alaba. H'a na ku teeleza kwa litapelo za mina, kakuli mu fosize hahulu.
5Batu ba pumiwa ki bapolofita ba ba sepisa kozo ku ba ba lifa se siñwi, kono ba bemba ba ba sa ba lifi kuli ba ka telwa ki ndwa. Kwa bapolofita ba ba cwalo ba, Muñ'a Bupilo u li, 6“Kabakala kuli mu kelusa batu ba ka, ha mu na ku ba ni lipono za bupolofita ni kamuta, mi ha mu na ku kona ku nuha se siñwi. Bapolofita, lizazi la mina se li felile. Lizazi la mi nangela.” 7Ba ba ka nuha za kwa pili ba ka swaba hahulu, linto ze ba polofita ha li na ku ezahala. Kamukan'a bona ba ka swaba hahulu kakuli Mulimu h'a ba fi likalabo ze ba bata.
8Kono haili na, moya wa Muñ'a Bupilo u ni file maata, butali, ni bundume bwa ku bulelela batu ba Isilaele bumaswe bwa bona. 9Mu teeleze ku na, mina babusi ba Isilaele, mina mu toile ku luka, mi mu fetula bunde ku bu eza bumaswe. 10Mu hulisa Jerusalema, muleneñi wa Mulimu, ka lipulao ni ka sobozi. 11Babusi ba muleneñi ba busa ka likweta. Baprisita ba talusa Mulao ka ku lifwa se siñwi. Bapolofita ba fa lipono za bona ka mali. Kamukan'a bona ba li Muñ'a Bupilo u na ni bona. Ba li, “Kikuli Muñ'a Bupilo h'a yo ku luna, naa? Ha ku na kozi ye ka lu tela.”
12 #
Jer 26.18
Mi cwale, kabakala mina, Sione u ka limwa sina simu, Jerusalema u ka ba lizulu la mamota, mi lilundu la Tempele li ka fetuha mushitu.
Lozi Interconfessional Bible, Catholic Edition © Bible Society of Zambia, 2009.