Mika 2
2
Mupuzo wa ba ba putelela babotana
1Ki bumai bo bu cwañi kwa batu ba ba li niha ba lobezi, ba lela ze maswe! Habusa kakusasana, ba sa fumana feela sibaka, ba eza bumaswe bo ne ba se ba lelile. 2Ha ba bata masimu, b'a nga. Ba amuha batu mandu ni liluwo la bona.
3Mi cwale Muñ'a Bupilo u li, “Ni lelile ku mi tiseza kozi, mi ha mu na ku kona ku banduka ku yona. Ha mu sa na ku zamaya ka buikuhumuso cwalo ni kamuta, kakuli i ka ba nako ye maswe ku mina. 4Ka yona nako yeo, batu ba ka itusisa taba ya mina sina mutala wa manyando, ni ku opela pina ye utwisa butuku.
Lu felile kaufela, se lu li matota feela!
Mulena u lu amuhile naha ya luna.
U i file ba ba lu hapile.”
5Cwalehe, ha ku na wa ku mina ya ka amuhela naha hape muta i ka abelwa batu ba Muñ'a Bupilo sinca.
6Batu ba li ku na, “U si ke wa lu kutaza. U si ke wa lu kutaza ka zeo kaufela. Mulimu h'a na ku lu swabisa cwalo. 7Kikuli batu ba Isilaele ba kutilwe na? Kikuli Muñ'a Bupilo h'a sa na buiswalo na? Kana n'a ka eza linto ze cwalo na? Kana h'a bulelangi ka musa ka batu ba ba eza ze lukile na?”
8Muñ'a Bupilo h'a alaba, a li, “Kono mina mu ikeza lila za batu ba ka. Mu uzwa licansi fa mikokoto ya batu ba ba na ni kozo, ba ba zwa mwa ndwa mi ba hupula kuli ba pilile. 9Mu leleka basali ba batu ba ka mwa minzi ye ba lata, mi mu amuhile bana ba bona limbuyoti za ka kuya kuile. 10A mu zwe, mu zamaye. Se ha si sibaka sa ku pumulela. Kabakala sibi mu ka telwa ki kozi ye sabisa.
11“Mutu wa lihata ya zamaya a puma batu, a li, ‘Ni polofita kuli waine ni lino ze buhali li ka mi atela,’ ya cwalo yo ki yena mupolofita ye ba lata.
12“Kono mina, batu ba Isilaele, ni ka mi kopanya hamoho, mina kaufela mu siyezi. Ni ka mi tisa kamukana sina lingu ze mwa mulaka, kamba mutapi o mwa mafulelo. Naha ya mina i ka tala lilata la batu ba bañata.”
13Mulimu u ka ba kwalulela nzila ni ku ba zwiseza kwande. Ba ka punyeza kwa minyako ya makwakwa a muleneñi, ba ikele. Mulen'a bona, yena Muñ'a Bupilo, u ka ba etelela.
Lozi Interconfessional Bible, Catholic Edition © Bible Society of Zambia, 2009.