Mateu 27

Jesu fapil'a Pilato

(Mar 15.1; Luk 23.1-2; Joa 18.28-32)

1Busihu bu sin'o sa feela, baprisita ba bahulu ni ba bahulu ba Majuda, ba lelisana ka mo ba ta bulaela Jesu. 2Ba mu tama ka mawenge, ba mu isa ku Mubusisi Pilato, mi ba mu beya mwa maata a hae.

Lifu la Judasi

(Lik 1.18-19)

3 # Lik 1.18-19 Judasi, yena mubeteki, h'a bona kuli Jesu n'a atulezwi lifu, a inyaza, mi a kutiseza mashumi a malalu ani a muwaya-waya wa silivela kwa baprisita ba bahulu ni ku ba bahulu ba sicaba. 4A li ku bona, “Ni fosize ha ni betekile mutu ya si na mulatu kuli a bulaiwe!”

Kono ba mu alaba, ba li, “Luna, lu na ni taba mañi ni zeo? Zeo ki za hao!”

5Judasi kiha s'a y'o latela mali kwa pulukelo ya mali ya Tempele. A ba siya, a zwa, mi a y'o ipulaya.

6Baprisita ba bahulu ba nopa mali, mi ba li, “Ka Mulao wa luna, mali ao h'a lukeli ku beiwa mwa pulukelo ya Tempele, kakuli ki mali a lifu la mutu.” 7Ha ba se ba lumelelani fa taba yeo, ba leka ka ona Simu ya Mubupi wa Lipiza, kuli i be mayumbelo a bazwahule. 8Kikabakaleo, simu yeo ha i bizwa Simu ya Mali ni kacenu.

9 # Zak 11.12-13 Cwalehe, se ne si bulezwi ki mupolofita Jeremia sa petahala, ha n'a ize, “Ba ngile mashumi a malalu a muwaya-waya wa silivela, teko ye ne ba tomile ba Isilaele kuli a lekwe ka ona. 10Ba itusisize ona ku leka simu ya mubupi wa lipiza, sina mw'a n'a ni laelezi Mulena.”

Pilato u buza Jesu

(Mar 15.2-5; Luk 23.3-5; Joa 18.33-38)

11Jesu a yema fapil'a mubusisi, mi mubusisi a mu buza, a li, “Kana ki wena Mulena wa Majuda?”

Jesu a mu alaba, a li, “Ee, sina m'o bulelela.” 12Kono mwamulaho, ha ku na s'a bulezi, baprisita ba bahulu ni ba bahulu ba sicaba niha ba mu tameleza litaba.

13Cwale Pilato a li ku yena, “Ha u utwi litaba ze ñata ze ba ku tameleza zona, nji?”

14Kono Jesu h'a si ka alaba nihaili linzwi li li liñwi feela, mi mubusisi a komoka hahulu.

Jesu u atulelwa lifu

(Mar 15.6-15; Luk 23.13-25; Joa 18.39—19.16)

15Fa mukiti ni mukiti wa Paseka, mubusisi n'a twaezi ku lukululanga yo muñwi wa mapantiti ye ne ba kupa batu. 16Ka yona nako yeo, ne ku na ni mupantiti ya n'a zibahala hahulu ka libizo la Barabasi. 17Cwale, nyangela ha i nze i kopani, Pilato a ba buza, a li, “Ki ufi ye mu lata kuli ni mi lukululele yena, Barabasi kamba Jesu ya bizwa Kreste?” 18Kakuli n'a ziba hande kuli ne ba tisize Jesu ku yena kabakala muna.

19Pilato ha n'a inzi fa sipula sa katulo, mwa Kuta, musal'a hae a mu lumela linzwi, a li, “U si ke wa kena mwa litaba za mutu yo ya si na mulatu, kakuli ni katazehile hahulu ka yena kwa buloko, busihu bo bu felile.”

20Baprisita ba bahulu ni ba bahulu ba sicaba ba susueza batu ku kupa Pilato kuli a lukulule Barabasi, mi haili Jesu, yena, a bulaiwe. 21Kono mubusisi a ba buza, a li, “Ki ufi, ku ba babeli bao, ye mu bata kuli ni mi lukululele yena?”

Ba mu alaba, ba li, “Barabasi!”

22Pilato a ba buza, a li, “Cwalehe, ni ka ezañi ka Jesu ya bizwa Kreste?”

Kaufel'a bona ba alaba, ba li, “Mu kokotele fa sifapahano!”

23Kono Pilato a buza, a li, “Kanti bumaswe bw'a ezize ki bufi?”

Kiha ba tiisa ku huwa, ba li, “Mu kokotele fa sifapahano!”

24 # Mul 21.6-9 Cwale Pilato n'a bona kuli ne ku si na tuso ku zwelapili kakuli ku ka swana kwa zuha mufili-fili, a nga mezi, a tapa kwa mazoho fapil'a nyangela, mi a li, “Na, ha ni na mulatu ka lifu la mutu yo! Ki taba ya mina!”

25Nyangela kaufela ba alaba, ba li, “Mulatu wa lifu la hae u be fahalimw'a luna ni bana ba luna!”

26Cwale Pilato a ba lukululela Barabasi. A laela kuli Jesu a natiwe ka pafa, mi a ba fa yena kuli ba y'o mu kokotela fa sifapahano.

Masole ba sheununa Jesu

(Mar 15.16-20; Joa 19.2-3)

27Masole ba Pilato kiha ba isa Jesu mwa lapa la mubusisi, mi sitopa sa masole kaufela sa mu beya mwahali. 28Ba mu tubulisa liapalo za hae, mi ba mu apesa siapalo se sifubelu sa bulena. 29Kiha ba tata kali ya miutwa ku i eza inge kuwani ya bulena, ba mu apesa yona kwa toho, mi ba mu swalisa kakota mwa lizoho la bulyo. Kiha ba kubama fapil'a hae, mi ba kala ku mu sheununa, ba li, “Yo-shoo, u yoye Mulena wa Majuda!” 30Ba mu kwelaka mati, mi ba nga kakota, ba mu nata fa toho. 31Ba sin'o mu sheununa cwalo, ba mu tubulisa siapalo sa bulena seo, ba mu apesa liapalo za hae, mi ba mu zwiseza kwande ku y'o mu kokotela fa sifapahano.

Jesu u kokotelwa fa sifapahano

(Mar 15.21-32; Luk 23.26-43; Joa 19.17-27)

32Ha ba zwela fande, ba fumana mutu wa mwa munzi wa Sirene, ya n'a bizwa Simoni. Ba mu hapeleza ku lwala sifapahano sa Jesu. 33Ba fita fa sibaka se si bizwa Golgota, kikuli Sibaka sa Katendele. 34Honafo, ba fa Jesu waine ye baba, ye cipile, kuli a nwe, kono ha s'a i utwile, a hana ku i nwa.

35 # Lipi 22.18 Ba mu kokotela fa sifapahano, mi ba ikabela liapalo za hae ka ku laula. 36Ha ba felize zeo, ba ina fafasi ku mu libelela. 37Ba beya zibiso ya mulatu wa hae fahalimw'a toho ya hae, ye li, “Yo, ki Jesu, Mulena wa Majuda.” 38Cwale ba kokotela batu ba lisinyi ba babeli fa lifapahano hamoho ni Jesu, yo muñwi ku la bulyo, yo muñwi ku la nzohoto.

39 # Lipi 22.7; 109.25; Litu 12.17, 18; 13.7 Ba ba ne ba fita, ne ba nyunga litoho, mi ba mu nyefula. 40#Mat 26.61; Joa 2.19 Ba li, “Au, wena u n'o li u kona ku tuba Tempele ni ku i yaha sinca mwa mazazi a malalu feela! U ipilise he, haiba u Mwan'a Mulimu! U tuluke fa sifapahano foo!”

41Kamukwaoswana baprisita ba bahulu, Baluti ba Mulao ni ba bahulu ba sicaba ne ba mu sheununa. 42Ba li, ‘Bati, u pilisize ba bañwi, kono yena, h'a koni ku ipilisa! Kana ha si yena Mulena wa Isilaele, yo? A tuluke fa sifapahano hona fa, mi lu ta lumela ku yena! 43#Lipi 22.8; But 2.18-20 U sepile Mulimu, mi u ize, ‘Ki na Mwan'a Mulimu.’ A lu boneñi, kamba Mulimu u lata ku mu pilisa cwale!”

44Mane ni bona masholi, ba ba ne ba kokotezwi ni yena, ne ba mu shwaula kamukwaoswana.

Lifu la Jesu

(Mar 15.33-41; Luk 23.44-49; Joa 19.28-30)

45Lizazi ha li li fahal'a toho, lififi la apesa naha kaufela ka lihola ze talu. 46#Lipi 22.1 Jesu kih'a huwa ka linzwi le lituna, a li, “Eloi, Eloi lama sabaktani?” kikuli “Mulimu wa ka, Mulimu wa ka, u ni tuheleziñi?”

47Batu ba bañwi ba ba ne ba yemi fakaufi ba mu utwa, mi ba li, “Ki yo, u biza Elia!” 48#Lipi 69.21 Kapili yo muñwi wa bona a mata, a nga siponji, a si cupwa mwa waine ye baba, a si beya kwa lutaka, mi a lika ku mu nwisa yona.

49Kono ba bañwi ba li, “Tuhela pili, lu bone kamba Elia u ta taha ku t'o mu pilisa!”

50Jesu a huwa hape ka linzwi le lituna, mi a shwa.

51 # Mut 26.31-33 Ka yona nako yeo, lisila la mwa Tempele la pazuha fahali, ku kalela kwahalimu ku isa kwatasi. Lifasi la zinkinyeha, mi macwe a pazuha. 52Mabita a kwaluluha, mi litupu za ba bañwi balumeli ba ba ne ba shwile za zuha kwa bafu. 53Ba zwa mwa mabita, mi Jesu ha s'a zuhile kwa bafu, ba kena mwa Munzi o Kenile, mo ba bonwi ki batu ba bañata.

54Muzamaisi wa masole, ni masole ba ba ne ba libelela Jesu ni yena, ha ba bona zikinyeho ya lifasi ni ze ne ezahala kaufela, ba saba hahulu, mi ba li, “Kanti luli ne li Mwan'a Mulimu!”

55 # Luk 8.2-3 Ne ku na ni basali ba bañata foo, ba ba ne ba talimezi ba li kwahulenyana. Ne ba latelezi Jesu ku zwa kwa Galilea, ba nze ba mu tusa.

56Mwahal'a bona ne ku na ni Maria wa munzi wa Magdala, ni Maria m'ahe Jakobo ni Josefa, ku beya m'ahe bana ba Zebedea.

Jesu wa bulukwa

(Mar 15.42-47; Luk 23.50-56; Joa 19.38-42)

57Ka nako ya manzibwana, munna yo muñwi ya n'a fumile, wa mwa munzi wa Arimatea, a fita. N'a bizwa Josefa, mi ni yena i ne li mulutiwa wa Jesu. 58A ya ku Pilato, mi a y'o kupa situpu sa Jesu. Pilato kih'a laela kuli Josefa a si fiwe. 59Josefa a nga situpu, a si putela mwa lisila le lisweu, le linca. 60A si beya mwa libita la hae l'a n'a sa z'o conkomona mwa licwe. Kih'a pikuluseza licwe le lituna fa munyako wa libita, mi a zamaya. 61Maria wa mwa Magdala ni Maria yo muñwi ne ba inzi fakaufi ba talimezi libita.

Balibeleli ba libita

62Habusa, ili lizazi le li tatama la ku itukiseza Paseka, baprisita ba bahulu ni Bafalisi ba y'o kopanela ku Pilato. 63Ba li, “Mulena, lu sa hupula kuli lihata lani, ha ne li sa pila, ne li bulezi kuli, ‘Ni ta zuha kwa bafu mwamulaho a mazazi a malalu.’ 64Cwalehe, u laele kuli libita li libelelwe hande ku fitela lizazi la bulalu, kuli balutiwa ba hae ba si ke ba t'o mu uzwa ni ku bulelela batu kuli u zuhile kwa bafu. Buhata bo bwa mafelelezo, bu ta ba bo bu maswe mane ku fita bwa pili.”

65Pilato a ba bulela, a li, “Masole ki ba. A mu zamaye, mu y'o libelela libita mo mu konela kaufela.”

66Kiha ba ya, ba tiisa libita ka ku beya liswayo fa licwe, mi ba siya balibeleli fateñi.

Currently Selected:

Mateu 27: Lozi09

Highlight

Copy

Compare