Mateu 26
26
Mulelo wa ku bulaya Jesu
(Mar 14.1-2; Luk 22.1-2; Joa 11.45-53)
1Jesu ha s'a felize ku luta zeo kaufela, a li kwa balutiwa ba hae. 2#Mut 12.1-27 “Sina ha mu izibela ni mina, ku siyezi mazazi a mabeli feela kuli ku eziwe Mukiti wa Paseka, fo na, Mwan'a Mutu, ni ta isiwa ku y'o kokotelwa fa sifapahano.”
3Baprisita ba bahulu ni ba bahulu ba sicaba sa Majuda kiha ba kopana kaufela mwa lapa la Kayafa, muprisita yo muhulu. 4Ba lelisana ka mo ba ta swalela Jesu ka butali kuli ba mu bulaye. 5Ne ba li, “Lu si ke lwa mu swala ka nako ya mukiti, kakuli sicaba si ka swana sa eza mufili-fili.”
Musali u sela sende fa toho ya Jesu mwa Betania
(Mar 14.3-9; Joa 12.1-8)
6Jesu n'a inzi mwa ndu ya Simoni wa mbingwa, mwa Betania. 7#Luk 7.37-38 Kwa taha musali ya n'a lwezi piza ya alabastera ye ne tezi mafula a sende, a teko ye tuna. A sela Jesu sende yeo fa toho ha n'a nz'a ca. 8Balutiwa ha ba bona cwalo, ba nyema hahulu, mi ba li, “Sinyehelo yeo kaufela ki yañi? 9Kakuli sende yeo i ne i ta kona ku lekiswa mali a mañata, mi mali ao n'a ta fiwa babotana!”
10Jesu a lemuha ze ne ba bulela, mi a li ku bona, “Kiñi ha mu kataza musali yo? U ni ezelize nto ye nde. 11#Mul 15.11 Kakuli mu ta inanga ni babotana nako kaufela, kono na, ha mu na ku inanga ni na kamita. 12Kezo y'a ezize, h'a selile sende fa mubili wa ka, ki ku ni lukiseza kepelo. 13Luli na mi bulelela kuli ko li ta bulelwa kaufela mwa lifasi Litaba ze Nde zeo za Mubuso wa Mulimu, musali yo u ta hupulwa ka kezo y'a ezize.”
Judasi u lumela ku beteka Jesu
(Mar 14.10-11; Luk 22.3-6)
14Kono yo muñwi wa balutiwa ba lishumi ka ba babeli, ya bizwa Judasi Isikariota, a ya kwa baprisita ba bahulu. 15A li ku bona, “Mu ta ni fañi, haiba ni mi fumanela Jesu?” Kiha ba bala mali a mashumi a malalu a muwaya-waya wa silivela, mi ba mu fa ona. 16Ku zwa hona fo, Judasi a bata nako ye nde ya ku swalisa Jesu.
Jesu u ca Paseka ni balutiwa ba hae
(Mar 14.12-21; Luk 22.7-14, 21-23; Joa 13.21-30)
17Ka lizazi la pili la Mukiti wa Mahobe a si na Mumela, balutiwa ba taha ku Jesu ba t'o buza, ba li, “K'o bata kuli lu y'o ku lukiseza mulalelo wa Paseka ki kakai?”
18Jesu a li ku bona, “Mu kene mwa munzi, mu ye ku mutu yo muñwi, mi mu y'o li ku yena, ‘Muluti u li, Nako ya ka i fakaufi. Balutiwa ba ka, ni na, lu ka t'o cela Paseka mwa ndu ya hao.’ ”
19Balutiwa ba eza sina mw'a n'a ba bulelezi Jesu, mi ba lukisa mulalelo wa Paseka.
20Manzibwana Jesu ni balutiwa ba hae ba lishumi ka ba babeli ba ina fa tafule, ba ca. 21Ha ne ba nze ba ca, Jesu a li, “Ni mi bulelela niti, ‘Yo muñwi wa mina u ta ni beteka.’ ”
22Balutiwa ba swaba hahulu, mi ba kala ku mu buza, a li muñwi ka a li muñwi, ba li, “Kana i ka ba na, Mulena?”
23 #
Lipi 41.9
Jesu a ba alaba, a li, “Yo muñwi ya sunsa ni na mwa mukeke ki yena ya ta ni beteka! 24Na, Mwan'a Mutu, ni ta shwa sina mo ku ñolezwi, kono bumai ki bwa mutu ya ta beteka na, Mwan'a Mutu! I ne i ka ba bunde kambe mutu yo n'a si ka pepwa!”
25Judasi, yena ya n'a mu beteka, a buza, a li, “Kana ki na, Muluti?”
Jesu a mu alaba, a li, “Ao ki manzwi a hao!”
Mulalelo wa Mulena
(Mar 14.22-26; Luk 22.14-20; 1 Bakor 11.23-25)
26Ha ne ba nze ba ca, Jesu a nga buhobe, mi a sin'o itumela ku Mulimu, a bu komauna, mi a bu fa balutiwa ba hae, a li, “A mu nge, mu ce, se ki mubili wa ka.”
27Cwale a nga sinwiso, mi a sin'o itumela ku Mulimu, a ba fa sona, a li, “Mu nge, mu hupisane kaufel'a mina. 28#Mut 24.8; Jer 31.31-34 Se ki mali a ka, a tiisa bulikani bwa Mulimu, mi a sululezwi batu kaufela, kabakala swalelo ya libi. 29Na mi bulelela, ni li, ‘Ha ni sa na ku nwa waine yeo hape ku fitela lizazi le ni ta nwa waine ye nca ni mina mwa Mubuso wa Ndate.’ ”
30Cwale ba opela pina, mi ba ya kwa Lilundu la Likota za Olive.
Jesu u bulela kuli Pitrosi u ta mu latula
(Mar 14.27-31; Luk 22.31-34; Joa 13.36-38)
31 #
Zak 13.7
Cwale Jesu a li kwa balutiwa ba hae, “Bona busihu bo, kaufela mina mu ta ni sabela, mu ni siye ni li nosi kakuli ku ñozwi kuli, ‘Ni ta bulaya mulisana, mi mutapi wa lingu u ta hasanela kai ni kai.’ 32#Mat 28.16 Kono ha ni se ni zuhile kwa bafu, ni ta itangeta kwa Galilea.”
33Pitrosi kih'a bulela, a li ku Jesu, “Na, ha ni na ku ku sabela ni kamuta, ba bañwi niha ba ta eza cwalo!”
34Jesu a mu alaba, a li, “Ni ku bulelela niti, ni li, ‘Bona busihu bo, mukombwe u si ka lila kale, u ta be s'o ni latuzi halalu.’ ”
35Pitrosi a li ku yena, “Ha ni na ku ku latula, nihaiba ku shwa ni ta shwa ni wena!”
Mi ni bona balutiwa ba bañwi kaufela ba bulela cwalo.
Jesu u lapela mwa Getsemani
(Mar 14.32-42; Luk 22.39-46)
36Cwale Jesu a fita ni balutiwa ba hae mwa sibaka se si bizwa Getsemani, mi a li ku bona, “A mu ine fa, ha ni sa ya fani ku y'o lapela.” 37A ya ni Pitrosi ni bana ba Zebedea ba babeli. A kenelwa ki maswabi ni ñalelwa ye tuna. 38A li ku bona, “Maswabi a mwa pilu ya ka ki a matuna, mane inge ni ka shwa. Mu siyale fa, mu tone ni na.”
39Ha s'a ba siile hanyinyani, a ikwiseza fafasi ka pata, mi a lapela, a li, “Ndate, ha ne i ka ba kuli kwa konahala, kambe n'o ka zwisa sinwiso se sa manyando ku na. Kono ku eziwe m'o latela, isiñi mo ni latela na.”
40Kih'a kutela kwa balutiwa bao ba balalu, mi a ba fumana ba lobezi. A li ku Pitrosi, “Kikabakalañi ha mu palelwa ku tona ni na, nihaili hola i liñwi feela? 41Mu tone, mi mu lapele kuli mu si ke mwa kena mwa muliko. Pilu ya mutu i lata ku eza hande, kono mubili wa hae wa fokola.”
42Jesu a ya hape lwa bubeli, mi a lapela cwana, a li, “Ndate, haiba ku sa konahali kuli sinwiso se sa manyando si fitelele ni si ka nwela ku sona, fohe ku eziwe mo u latela!” 43A kutela hape kwa balutiwa ba hae, mi a ba fumana ba lobezi kakuli ne ba palelwa ku tona.
44Jesu a ba siya hape, mi a y'o lapela lwa bulalu, a nz'a bulela manzwi a swana. 45Kih'a kutela kwa balutiwa mi a li ku bona, “Kanti mu sa lobezi ni ku pumula? A mu bone! Nako i fitile ya kuli na, Mwan'a Mutu, ni beiwe mwa mazoho a baezalibi. 46A mu yeme, lu zamayeñi! A mu bone, ya ni beteka ki yo. U fitile!”
Jesu wa swalwa
(Mar 14.43-50; Luk 22.47-53; Joa 18.3-12)
47Jesu n'a sa bulela cwalo, ha ku fita Judasi, yo muñwi wa balutiwa ba lishumi ka ba babeli. N'a zamaya ni batu ba bañata ba ba ne ba lwezi lisabule ni milamu. Batu bao ne ba lumilwe ki baprisita ba bahulu ni ba bahulu ba sicaba sa Majuda. 48Judasi, yena ya n'a beteka Jesu, n'a file batu bao sisupo. N'a ize, “Mutu ye ni ta tubeta ki yena yo, ye mu bata. Mu mu swale!”
49Judasi h'a fita, a yelela feela ku Jesu, mi a li ku yena, “Lumela, Muluti!” Mi a mu tubeta.
50Jesu a mu alaba, a li, “Mulikani, eza kapili s'o tezi!”
Ba bañwi kiha ba sutelela, mi ba mu swala. 51Yo muñwi wa ba ba ne ba li ni Jesu a comola sabule ya hae, mi a puma mutang'a muprisita yo muhulu zebe. 52Jesu kih'a li ku yena, “Kutiseza sabule ya hao mwa sipusu sa yona, kakuli ba ba swala sabule kaufela ba ta bulaiwa ka sabule. 53Kana ha u zibi kuli ha ne ni ka tokwa tuso ne ni ta kupa Ndate, mi n'a ta kona ku ni lumela honafo limpi ze lishumi ka ze peli za mangeloi, mane ni ku fita, nji? 54Kono ha ne ku ta ba cwalo, ze ñozwi mwa mañolo ne li ta ezahala cwañi, ze li ku swanezi ku ezahala cwalo?”
55 #
Luk 19.47; 21.37 Cwale Jesu a li kwa nyangela, “Kana kikuli ni sisinyi nji, ha mu tile ni lisabule ni milamu ku t'o ni swala? Ne ni inanga mazazi kaufela mwa malapa a Tempele, ni nze ni luta, mi ha mu si ka ni swala. 56Kono, zeo kaufela ha li ezahalile kikuli ku talelezwe ze ñozwi mwa Mañolo ki bapolofita.”
Honafo, balutiwa kaufela ba mu siya, ba saba.
Jesu u iswa kwa Kuta
(Mar 14.53-65; Luk 22.54-55, 63-71; Joa 18.13-14, 19-24)
57Ba ba ne ba sweli Jesu ba mu isa kwa lapa la Kayafa, muprisita yo muhulu, koo ne ba kopanezi Baluti ba Mulao ni ba bahulu ba sicaba. 58Pitrosi a latelela Jesu a nz'a li kwahule, mane a t'o fita kwa lapa la muprisita yo muhulu. A kena mwa lapa, mi a ina fafasi ni balibeleli ku bona se si ta ezahala kaufela. 59Baprisita ba bahulu ni ba Kuta kamukana ba lika ku fumana litaba za buhata ze ba ka tama Jesu ka zona kuli ba kone ku mu bulaya. 60Kono ba palelwa ku li fumana niha ne ku tile lipaki ze ñata za buhata. Kwa mafelelezo kwa taha batu ba babeli. 61#Joa 2.19 Ba li, “Mutu yo n'a bulezi kuli wa kona ku tuba Tempele ya Mulimu ni ku i yaha sinca hape mwa mazazi a malalu feela.”
62Muprisita yo muhulu a yema, mi a li ku Jesu, “Kana ha u na s'o ka alaba ka litaba ze ba ku tama ka zona, ze?” 63Kono Jesu a kuza feela. Muprisita yo muhulu hape a li ku yena, “Ni ku konka ka libizo la Mulimu ya pila, u lu bulelele haiba ki wena Mesia, Mwan'a Mulimu.”
64 #
Dan 7.13
64 Jesu a mu alaba, a li, “Ee, sina m'o bulelela! Kono na mi bulelela, ni li, ‘Ku zwa honafa, mu ta ni bona, na, Mwan'a Mutu, ni inzi ku la bulyo la Mulimu ya maata. Mu ta ni bona ha ni taha fa malu a lihalimu!’ ”
65 #
Malivi 24.16
Honafo, muprisita yo muhulu a pazula liapalo za hae, mi a li, “U nyefuzi! Ha lu sa tokwa lipaki! Mu sa z'o ikutwela h'a nyefula! 66Mina, mu hupula cwañi?”
Ba alaba, ba li, “U fosize. U swanela ku shwa.”
67 #
Isa 50.6
Cwale ba mu kwelaka mati fa pata, ba mu nataka ka liñondo. Ba bañwi ne ba mu bakaula. 68Mi ba li, “Lu polofitele, Mesia! U lu bulelele kuli ya ku natile ki mañi!”
Pitrosi u latula Jesu
(Mar 14.66-72; Luk 22.56-62; Joa 18.15-18, 25-27)
69Pitrosi n'a inzi kwande, mwa lapa, ha ku fita musizana, ili yo muñwi wa batanga ba muprisita yo muhulu. A taha, mi a t'o li ku yena, “Ni wena n'o inzi ni Jesu wa kwa Galilea.”
70Kono a latula fapil'a batu kaufela, a li, “Ha ni zibi s'o bulela.” 71Kih'a ya kwa munyako wa lapa. Mutanga yo muñwi wa musizana a mu bona, mi a bulelela ba ba ne ba li teñi fo, a li, “Mutu yo n'a inzi ni Jesu wa Nazareta.”
72Pitrosi a hana hape mi a alaba, a li, “Na konka luli. Ha ni mu zibi mutu yo!”
73Mwamulaho a nakonyana, batu ba ba ne ba yemi foo ba taha ku Pitrosi, mi ba li ku yena, “Kaniti luli ni wena u yo muñwi wa bona, kakuli mukwa w'o bulela ka ona wa ku paka luli!”
74Pitrosi kih'a kala ku konka, a li, “Ha ni mu zibi mutu yo!”
Honafo, mukombwe wa lila. 75Pitrosi a hupula s'a n'a mu bulelezi Jesu, ha n'a ize, “Mukombwe u si ka lila kale, u ta be s'o ni latuzi halalu!” Kih'a zwela kwande, mi a lila ni ku itiulula.
Currently Selected:
Mateu 26: Lozi09
Highlight
Share
Copy
Want to have your highlights saved across all your devices? Sign up or sign in
Lozi Interconfessional Bible, Catholic Edition © Bible Society of Zambia, 2009.